Jẹnẹsis
22 Asaọkiephana rẹ ọnana vwọ wan nu, Ọghẹnẹ rẹ uyota na da davwen Ebraham ni, ọ da ta kẹ: “Ebraham!” ọ da kpahen: “Mẹvwẹ na!” 2 Ọtiọyena ọ da ta: “Biko, reyọ ọmọ wẹn, ọmọ wẹn ọvuọvo ru wo vwo ẹguọnọ rọyen mamọ na, Aizik, rere wo kpo otọ ri Moraya, wọ reyọ vwo ze izobo rẹ ẹtorhẹ vwẹ ugbenu ọvo ri mi che dje kẹ wẹ.”
3 Ọtiọyena Ebraham de vrẹn vwẹ edegburhiọke, ọ da rhuẹrẹ ekẹkẹtẹ rọyen phiyọ, ọ da reyọ idibo rọyen ivẹ nene oma kugbe ọmọ rọyen Aizik. Ọ da bẹrẹ irhe rẹ izobo rẹ ẹtorhẹ na, o de vrẹn, ọ da yan kpo asan rẹ Ọghẹnẹ rẹ uyota na dje kẹ. 4 Vwẹ ẹdẹ rerha, Ebraham da kpare opharo, ọ da mrẹ asan na vwẹ ugboko. 5 Asaọkiephana Ebraham da ta kẹ idibo rọyen: “Ovwan mudia etinẹ kẹrẹ ekẹkẹtẹ na, ẹkẹvuọvo mẹvwẹ vẹ ọmọshare na che kpo oboyin ra ga ẹga ji rhivwin bru ovwan rhe.”
6 Ọtiọyena Ebraham de mu irhe rẹ izobo rẹ ẹtorhẹ na, o de mu ayen kẹ ọmọ rọyen Aizik. O de mu imwerhanre vẹ aphia* vwẹ obọ, ayen ihwo ivẹ na ke yanran kuẹgbe. 7 Ọtiọyena Aizik da ta kẹ ọsẹ rọyen Ebraham: “Ọsẹ mẹ!” Ọ da kpahen: “E, ọmọ mẹ!” Ọ da ta: “Erhanre kugbe irhe na hẹ etinẹ, ẹkẹvuọvo ogodẹ re che vwo ze izobo rẹ ẹtorhẹ na rhọ?” 8 Ebraham da ta: “Ọghẹnẹ komobọ rọyen cha vwẹ ogodẹ re che vwo ze izobo rẹ ẹtorhẹ na kẹ avwanre, ọmọ mẹ.” Ọtiọyena ayen ihwo ivẹ na da yanran kugbe.
9 Ukuotọ rọyen, ayen de rhi te asan rẹ Ọghẹnẹ rẹ uyota na dje kẹ na, Ebraham da so agbada phiyọ etiyin, ọ da rhuẹrẹ irhe na phiyọ. Ọ da gba ọmọ rọyen Aizik abọ vẹ awọ, o de muo phiyọ enu rẹ agbada na, vwẹ enu rẹ irhe na. 10 Ọtiọyena Ebraham da rionbọ rọyen phia, ọ da reyọ aphia* na rere o hwe ọmọ rọyen. 11 Ẹkẹvuọvo amakashe ri Jihova de se vwo nẹ idjuvwu na rhe, ọ da ta: “Ebraham, Ebraham!” ọ da kpahen: “Mẹvwẹ na!” 12 Ọtiọyena ọ da ta: “Wọ wan ọmọ na omaa, wo ruo emu vuọvo kakakaa, kidie asaọkiephana me rhe riẹn re nẹ wo vwo oshọẹdjẹ rẹ Ọghẹnẹ, kidie wo si ọmọ wẹn, ọmọ wẹn ọvuọvo na nu kẹ vwẹẹ.” 13 Ọtiọyena Ebraham da kpare opharo, vwẹ obaro rọyen ọ da mrẹ egbon rẹ idjo rọyen gba dje etu rẹ odin. Ọtiọyena Ebraham da yanran, ọ da reyọ egbon na, o de vwo ze izobo rẹ ẹtorhẹ ukperẹ ọmọ rọyen. 14 Ebraham de se odẹ rẹ asan na Jihova-jaire.* Kọyensorọ a je vwọ ta nonẹna: “Vwẹ ugbenu ri Jihova, Ọ cha kẹ avwanre.”
15 Amakashe ri Jihova de se Ebraham obọ rivẹ vwo nẹ idjuvwu na rhe, 16 ọ da ta: “‘Me vwẹ oma mẹ vwo duvwun iyorin,’ ọtiọyen Jihova tare, ‘nẹ kidie nẹ wo ru ọnana, wo si ọmọ wẹn, ọmọ wẹn vuọvo na nu kẹ vwẹ naa, 17 vwọrẹ imuẹro, mi che bruba kẹ wẹ, me je cha nẹrhẹ emọ* wẹn dia buebun kerẹ isio rẹ idjuvwu na, kerẹ ehavwo* rehẹ orhoma rẹ abadi, emọ* wẹn ke cha re ughwẹ rẹ irere* rẹ ivwighrẹn rayen. 18 Womarẹ emọ* wẹn kọyen ẹgborho rehẹ akpọ na eje che vwo vwo ebruphiyọ kẹ oma rayen, kidie wọ kerhọ rẹ urhuru mẹ.’”
19 Ọyena vwọ wan nu, Ebraham de rhivwin bru idibo rọyen ra, ayen de vrẹn, ayen de rhivwin kpo Biẹ-shiba; Ebraham kọ dia Biẹ-shiba.
20 Ọke vwọ yanran, a da rhe niyẹnrẹn kẹ Ebraham nẹ: “Milka ji vwiẹ emọ kẹ oniọvo wẹn Nehọ re: 21 Ọz ọmọkpako rọyen, Bọz oniọvo rọyen, Kẹmuẹl ọsẹ rẹ Eram, 22 Kisẹd, Hezọ, Pildash, Jidlaf, kugbe Bẹtuẹl.” 23 Bẹtuẹl da rhe dia ọsẹ ri Rebeka. Milka yen vwiẹ emọ ẹrenren nana kẹ Nehọ, oniọvo rẹ Ebraham. 24 Ọsen rọyen re se Ruma ji vwiẹ emọ kẹ: Tiba, Geham, Tehash, kugbe Meaka.