Jẹnẹsis
1 Vwẹ ọtonphiyọ yen Ọghẹnẹ vwọ ma idjuvwu na vẹ akpọ na.
2 Asaọkiephana akpọ na ofefe, emu vuọvo herọọ, ebri rhurhu ame na, jẹ ẹgba rẹ Ọghẹnẹ vwọ wian* rhe kpenẹ kpenẹ vwẹ enu rẹ ame na.
3 Ọghẹnẹ da ta: “E jẹ elo dia.” Elo da rhe dia. 4 Ọghẹnẹ da rhe mrẹ nẹ elo na yovwirin, Ọghẹnẹ kọ hẹriẹ elo na vwo nẹ ebri. 5 Ọghẹnẹ de se elo na Uvo,* o de rhe se ebri na Ason. Ovwọnvwọn de rhi te, urhiọke de ji rhi te, ẹdẹ rẹsosuọ.
6 Ọtiọyena Ọghẹnẹ da ta: “E jẹ ophephe dia uvwre rẹ ame na, e jẹ ohẹriẹ dia uvwre rẹ ame na vẹ ame na.” 7 Ọtiọyena Ọghẹnẹ de ru ophephe na, ọ da hẹriẹ ame rehẹ obotọ rẹ ophephe na vwo nẹ ame rehẹ obenu rẹ ophephe na. Ọ da rhe dia ọtiọyen. 8 Ọghẹnẹ de se ophephe na Odjuvwu.* Ovwọnvwọn de rhi te, urhiọke de ji rhi te, ẹdẹ rivẹ.
9 Ọtiọyena Ọghẹnẹ da ta: “E jẹ ame rehẹ otọ rẹ idjuvwu na koko vwẹ asan ọvo, rere otọ ọyaya vwomaphia.” Ọ da rhe dia ọtiọyen. 10 Ọghẹnẹ de se otọ ọyaya na Otọrakpọ, ẹkẹvuọvo ame ri kokori na, o de se Abadi. Ọghẹnẹ da mrẹ nẹ o yovwirin. 11 Ọghẹnẹ da ta: “E jẹ odin djẹ nẹ otọ na rhe, ekankọn re mọ ibi kugbe irhe re mọ emamọ dohwo doka rọyen, re mọ emamọ vẹ ibi vwẹ otọrakpọ na.” Ọ da rhe dia ọtiọyen. 12 Odin kọ djẹ nẹ otọ na cha, ekankọn re mọ ibi kugbe irhe re mọ emamọ vẹ ibi, dohwo doka rọyen. Ọtiọyena Ọghẹnẹ da mrẹ nẹ o yovwirin. 13 Ovwọnvwọn de rhi te, urhiọke de ji rhi te, ẹdẹ rerha.
14 Ọtiọyena Ọghẹnẹ da ta: “E jẹ irhukpẹ dia ophephe rẹ idjuvwu na, rere ohẹriẹ vwọ dia uvwre rẹ ason vẹ uvo, ayen me dia kerẹ eka vwọ kẹ aruọke kugbe ẹdẹ kugbe ikpe. 15 Ayen cha dia kerẹ irhukpẹ vwẹ ophephe rẹ idjuvwu na, rẹ ayen vwo lo mu otọrakpọ na.” Ọ da rhe dia ọtiọyen. 16 Ọghẹnẹ da ma irhukpẹ ride ivẹ na, urhukpẹ ro me lo* na kọyen suẹn vwẹ uvo,* urhukpẹ rẹ elo rọyen kpotọ* na kọyen rhe suẹn vwẹ ason, ọtiọyen ji te isio na. 17 Ọtiọyena Ọghẹnẹ de phi ayen phiyọ ophephe rẹ idjuvwu na rere i vwo lo mu otọrakpọ na, 18 ayen ji vwo sun vwẹ uvo kugbe ason rere ayen vwo phi ohẹriẹ phiyọ uvwre rẹ urhukpẹ na kugbe ebri na. Ọtiọyena Ọghẹnẹ da mrẹ nẹ o yovwirin. 19 Ovwọnvwọn de rhi te, urhiọke de ji rhi te, ẹdẹ rẹne.
20 Ọghẹnẹ da ta: “E jẹ ame na vọn vẹ emama* ri vwo arhọ, e jẹ emama re rhan, rhan vwẹ enu rẹ akpọ na wan ophephe rẹ idjuvwu na.” 21 Ọghẹnẹ da ma emama* ride rehẹ abadi na kugbe emama eje ri vwo arhọ, re yan re je rhẹrhẹ vwẹ ame na dohwo doka rọyen, kugbe emama eje ri vwo ibekpe re rhan dohwo doka rọyen. Ọghẹnẹ da mrẹ nẹ o yovwirin. 22 Ọtiọyena Ọghẹnẹ de bruba kẹ ayen, ọ da ta: “We vwiẹ we bunphiyọ rere ovwan vọn ame rẹ abadi na, e jẹ emama re rhan na dia buebun vwẹ akpọ na.” 23 Ovwọnvwọn de rhi te, urhiọke de ji rhi te, ẹdẹ riyorin.
24 Ọtiọyena Ọghẹnẹ da ta: “E jẹ otọrakpọ na vwẹ emama* ri vwo arhọ phia dohwo doka rọyen, eranvwe re dia orere kugbe eranvwe ri kpono* kugbe eranvwe rẹ aghwa dohwo doka rọyen.” Ọ da rhe dia ọtiọyen. 25 Ọghẹnẹ da ma eranvwe rẹ aghwa na dohwo doka rọyen kugbe eranvwe re dia orere dohwo doka rọyen kugbe eranvwe na eje ri kpono vwẹ otọ na dohwo doka rọyen. Ọghẹnẹ da mrẹ nẹ o yovwirin.
26 Ọtiọyena Ọghẹnẹ da ta: “E jẹ avwanre ma* ohworakpọ họhọ oma rẹ avwanre, rere ayen dia kerẹ avwanre, e jẹ ayen sun iyerin rehẹ abadi na kugbe emama re rhan vwẹ idjuvwu na, eranvwe re dia orere kugbe akpọ na eje vẹ koka koka rẹ eranvwe ri kpono vwẹ otọrakpọ na.” 27 Ọghẹnẹ da ma ohworakpọ họhọ oma rọyen, ọ marọ họhọ oma rọyen; aye gbe ọshare yen ọ ma ayen. 28 Vwọba, Ọghẹnẹ de bruba kẹ ayen, ọ da ta kẹ ayen: “We vwiẹ we bunphiyọ, ovwan vọn akpọ na rere ovwan suon, ovwan sun iyerin rehẹ abadi na kugbe emama re rhan vwẹ idjuvwu na kugbe emama eje ri vwo arhọ, re yan vwẹ otọrakpọ na.”
29 Ọtiọyena Ọghẹnẹ da ta: “Me vwẹ ekankọn re mọ ibi rehẹ otọrakpọ na eje vwọ kẹ ovwan kugbe irhe na eje re mọ emamọ ri vwo ibi. E jẹ ayen dia emuọre kẹ ovwan. 30 Vwọ kẹ eranvwe rẹ aghwa na eje kugbe emama na eje re rhan vwẹ idjuvwu na kugbe erọnvwọn eje ri vwo arhọ* re yan vwẹ otọrakpọ na, me vwẹ ẹbe rẹ aghwa na eje vwọ kẹ ayen kerẹ emuọre.” Ọ da rhe dia ọtiọyen.
31 Ọyena vwọ wan nu, Ọghẹnẹ da mrẹ erọnvwọn eje rọ mare, nighere! O yovwirin mamọ. Ovwọnvwọn de rhi te, urhiọke de ji rhi te, ẹdẹ resan.