Diutaronomi

6 “Enana yen iji, irhi, kugbe orhiẹn-ebro rẹ Jihova Ọghẹnẹ rẹ ovwan vwọ phia nẹ e vwo yono ovwan, rere ovwan vwo ru nene ayen ọke rẹ ovwan da shariẹ vrẹ ra ro otọ rẹ ovwan cha reyọ kerẹ ughwẹ na, 2 rere ovwan vwọ djoshọ rẹ Jihova Ọghẹnẹ rẹ ovwan, ovwan vwọ sẹro rẹ irhi rọyen eje kugbe iji rọyen re me vwọ kẹ ovwan na—te ovwan, te emeshare rẹ ovwan, kugbe ivwrọmọ rẹ ovwan re dia emeshare—vwẹ ẹdẹ rẹ akpọ rẹ ovwan eje, rere ovwan sa vwọ dia ọke grongron. 3 Ovwan me kerhọ, E Izrẹl, ovwan me jomaotọ ru nene ayen rere o se vwo yovwin kẹ ovwan, ovwan me je dia buebun mamọ vwẹ otọ rọ djẹ ọkẹre rẹ ameivie vẹ ame ọnyọn na, kirobo rẹ Jihova Ọghẹnẹ rẹ esẹ rẹ ovwan ride ve kẹ ovwan.

4 “Ovwan kerhọ, E Izrẹl: Jihova Ọghẹnẹ rẹ avwanre na Jihova ọvuọvo. 5 Ovwan mi vwo ẹguọnọ rẹ Jihova Ọghẹnẹ rẹ ovwan vẹ ubiudu rẹ ovwan eje, erhi* rẹ ovwan eje, kugbe ogangan rẹ ovwan* eje. 6 Eta nana ri mi ji iji rọyen kẹ ovwan nonẹna me dia evunrẹ ubiudu rẹ ovwan, 7 ovwan me vwẹ ayen vwo yono* emọ rẹ ovwan, ovwan me ta ota kpahen ayen ọke rẹ ovwan de chidia uwevwin rẹ ovwan, ọke rẹ ovwan da yan vwẹ idjerhe, ọke rẹ ovwan de sherhẹn totọ, kugbe ọke rẹ ovwan de vrẹn. 8 Ovwan gba ayen mu obọ rẹ ovwan kerẹ ẹkarophiyọ, e me dia kerẹ obo ra vwọ gba uyovwin vwẹ arhare rẹ ovwan.* 9 Ovwan si ayen phiyọ enu rẹ anurhoro rẹ uwevwin rẹ ovwan kugbe ẹchẹ* rẹ ovwan.

10 “Ọke rẹ Jihova Ọghẹnẹ rẹ ovwan da reyọ ovwan ro otọ ro duvwun iyorin kẹ esẹ rẹ ovwan ride Ebraham, Aizik, kugbe Jekọp nẹ ọyen cha vwọ kẹ ovwan na—irere ride re pha yoyovwin rẹ ovwan bọnree, 11 iwevwin re vọnre vẹ koka koka rẹ omamọ erọnvwọn rẹ ovwan wian phiyọọ, ọgọdọ ra tọn phiyọ evunrẹ oragha rẹ ovwan tọnree, egba rẹ ivaini kugbe irhe rẹ oliv rẹ ovwan kọnree—ovwan da re, evun da je vọn ovwan, 12 ovwan me jomaotọ rere Jihova vwo jẹ ovwan ẹro ẹchọrọ, ohwo rọ reyọ ovwan nẹ otọ rẹ Ijipt rhe, vwo nẹ uwevwin rẹ eviẹn rhe. 13 Jihova Ọghẹnẹ rẹ ovwan yen ovwan cha djoshọ rọyen, ọyen ovwan cha ga, odẹ rọyen yen ovwan che vwo duvwun iyorin. 14 Ovwan yan nene eghẹnẹ efaa, keghẹnẹ keghẹnẹ rẹ ihwo re riariẹ ovwan phiyọ, 15 kidie Jihova Ọghẹnẹ rẹ ovwan rọhẹ ohri rẹ ovwan na ọyen Ọghẹnẹ rọ guọnọ ẹga ọsoso. Ovwan rhe ru ọtiọyeen, ophu ri Jihova Ọghẹnẹ rẹ ovwan kọ tua kpahen ovwan, ko che si ovwan nẹ enu rẹ akpọ na.

16 “Ovwan davwan Jihova Ọghẹnẹ rẹ ovwan nẹ kirobo rẹ ovwan davwenrọ ni vwẹ Masaah. 17 Ovwan mi gbẹrophiyotọ ru nene iji ri Jihova Ọghẹnẹ rẹ ovwan vẹ ẹkarophiyọ rọyen kugbe irhi rọyen rọ vuẹ ovwan nẹ ovwan ru nene na. 18 Ovwan mi ru obo ri shephiyọ vẹ obo ri yovwirin vwẹ ẹro ri Jihova, rere o se vwo yovwin kẹ ovwan, ovwan je sa vwọ ro otọ oyoyovwin na je re ughwẹ rọyen, otọ rẹ Jihova duvwun iyorin nẹ ọyen cha vwọ kẹ esẹ rẹ ovwan ride na, 19 womarẹ ọ vwọ djẹ ivwighrẹn rẹ ovwan eje vwo nẹ obaro rẹ ovwan, kirobo rẹ Jihova veri.

20 “Ọke rẹ emọ rẹ ovwan da nọ ovwan vwẹ ọke rọ cha vwẹ obaro na nẹ, ‘Die yen ẹkarophiyọ na, irhi na, kugbe orhiẹn-ebro rẹ Jihova Ọghẹnẹ rẹ avwanre vwọ kẹ ovwan na mudiaphiyọ?’ 21 ọke yena kẹ ovwan cha vuẹ emọ rẹ ovwan nẹ, ‘Avwanre dia eviẹn kẹ Fero vwẹ Ijipt, ẹkẹvuọvo Jihova reyọ avwanre nẹ Ijipt rhe vẹ obọ ọgangan. 22 Ọtiọyena vwẹ irharo rẹ avwanre, Jihova ko ruẹ eka vẹ igbevwunu ride re je sua oghwọrọ, vwẹ enu rẹ Ijipt, vwẹ enu ri Fero, kugbe enu rẹ evwruwevwin rọyen eje. 23 Ọ da reyọ avwanre nẹ etiyin rhe rere ọ reyọ avwanre rhe etinẹ, ọ vwọ kẹ avwanre otọ ro duvwun iyorin nẹ ọyen cha vwọ kẹ esẹ rẹ avwanre ride. 24 Ọtiọyena Jihova de ji iji kẹ avwanre nẹ avwanre ru nene irhi nana eje je djoshọ rẹ Jihova Ọghẹnẹ rẹ avwanre fikirẹ erhuvwu ri bẹdẹ rẹ avwanre, rere avwanre se vwo rhe yerẹn kirobo rẹ avwanre hepha nonẹna. 25 O che mudiaphiyọ ophiọnphiọn vwọ kẹ avwanre siẹrẹ avwanre da nabọ ru nene iji nana eje vwọrẹ ẹmienyo ri Jihova Ọghẹnẹ rẹ avwanre, kirobo ro ji iji rọyen kẹ avwanre.’