Diutaronomi

8 “Ovwan jomaotọ ru nene iji na eje re me vwọ kẹ ovwan nonẹna, rere ovwan se vwo rhe yerẹn ji buẹnphiyọ, ovwan je vwọ yanran ra re ughwẹ rẹ otọ rẹ Jihova duvwun iyorin nẹ ọyen cha vwọ kẹ esẹ rẹ ovwan ride na. 2 Ovwan karophiyọ ugbo oshesheri rẹ Jihova Ọghẹnẹ rẹ ovwan nẹrhẹ ovwan yan vwẹ ẹgbukpe 40 nana vwevunrẹ aton na, rọ vwọ nẹrhẹ ovwan vwomakpotọ, rọ je vwọ davwen ovwan ni rere ọ vwọ riẹn obo rehẹ ubiudu rẹ ovwan, sẹ ovwan cha sẹro rẹ iji rọyen yẹrẹ ovwan che ru ọtiọyeen. 3 Ọtiọyena ọ da nẹrhẹ ovwan vwomakpotọ je nẹrhẹ owẹnvwe hwe ovwan, ọ da vwẹ imana rẹ ovwan yẹrẹ esẹ rẹ ovwan riẹnre jovwoo vwọ ghẹrẹ ovwan, rere ọ vwọ nẹrhẹ ovwan riẹn nẹ ohworakpọ cha sa dia womarẹ ibrẹdi* ọvoo, ẹkẹvuọvo ohworakpọ cha dia womarẹ kota kota ro nẹ unu ri Jihova rhe. 4 Iwun rẹ ovwan bẹrẹre yẹrẹ kẹ awọ rẹ ovwan vwọre vwẹ ẹgbukpe 40 nanaa. 5 Ovwan nabọ riẹn vwẹ ubiudu rẹ ovwan nẹ kirobo rẹ ohwo kpọ ọmọ rọyen viẹ, ọtiọyen Jihova Ọghẹnẹ rẹ ovwan je kpọ ovwan viẹ vwẹ ọke yena.

6 “Asaọkiephana ovwan me sẹro rẹ iji ri Jihova Ọghẹnẹ rẹ ovwan womarẹ ovwan vwọ yan vwẹ idjerhe rọyen je djoshọ rọyen. 7 Kidie Jihova Ọghẹnẹ rẹ ovwan reyọ ovwan kpo otọ oyoyovwin, otọ rẹ ivwori rẹ ame hepha,* igbugbu rẹ ame re djẹ vwẹ iyara kugbe ekogho rẹ igbenu na, 8 otọ rẹ iwiti vẹ ibali, ivaini rẹ igrepu, irhe rẹ ifigi, kugbe ipọmigranẹti, otọ rẹ evwri rẹ oliv vẹ ame ọnyọn, 9 otọ rẹ emuọre che jẹ kanrọ, o vwo emu vuọvo rọ cha kanre ovwaan, otọ ra da mrẹ utehru vwẹ ibiukuta rọyen, ovwan cha tọn mrẹ ẹrovwo vwẹ igbenu rọyen.

10 “Ovwan da re, evun da je vọn ovwan re, ovwan mi jiri Jihova Ọghẹnẹ rẹ ovwan fikirẹ otọ oyoyovwin rọ vwọ kẹ ovwan na. 11 Ovwan jomaotọ rere Jihova Ọghẹnẹ rẹ ovwan vwo jẹ ovwan ẹro ẹchọrọ womarẹ ovwan vwo jẹ iji rọyen, orhiẹn-ebro rọyen, kugbe irhi rọyen rọ vwọ kẹ ovwan nonẹna ẹyọnrọn. 12 Ovwan da re, evun da je vọn ovwan, ovwan da bọn iwevwin iyoyovwin je dia evun rayen, 13 ọke rẹ erhuẹn rẹ ovwan kugbe ẹvwe vẹ igodẹ rẹ ovwan de buẹnphiyọ re, idọnọ efuanfon vẹ iro rẹ ovwan de ji buẹnphiyọ re, ovwan de ji vwo erọnvwọn ejobi gbidiki re, 14 ovwan kparoma vwẹ ubiudu rẹ ovwaan, ọ da rhe nẹrhẹ Jihova Ọghẹnẹ rẹ ovwan chọrọ ovwan ẹro, ohwo rọ reyọ ovwan nẹ otọ rẹ Ijipt rhe, vwo nẹ uwevwin rẹ eviẹn rhe, 15 rọ nẹrhẹ ovwan wan aton rode ro muoshọ, rọ vọnre vẹ eredekọ ri vwo obi kugbe ekpakpasimagha vẹ otọ ọyaya rẹ ame hephaa. Ọ nẹrhẹ ame djẹ nẹ oragha ọgangan rhe 16 ọ da vwẹ imana rẹ esẹ rẹ ovwan riẹnre jovwoo vwọ ghẹrẹ ovwan vwevunrẹ aton na, rere ọ vwọ nẹrhẹ ovwan vwomakpotọ, rọ je vwọ davwen ovwan ni rere o vwo yovwin kẹ ovwan vwẹ obaro na. 17 Wọ da ta vwevunrẹ ubiudu wẹn nẹ, ‘Ẹgba romobọ mẹ vẹ ogangan romobọ mẹ yen mi vwo koko efe nana kẹ oma mẹ,’ 18 karophiyọ nẹ Jihova Ọghẹnẹ rẹ ovwan yen kẹ ovwan ẹgba rẹ ovwan vwo fe, rere o se vwo ru nene ọphọ ro duvwun iyorin rọyen kẹ esẹ rẹ ovwan ride, kirobo rọ hepha nonẹna.

19 “Jihova Ọghẹnẹ rẹ ovwan da chọrọ ovwan ẹro, ovwan da je yan nene eghẹnẹ efa, ovwan da ga ayen je vwẹ uyovwin kpotọ kẹ ayen, mi soseri vwọso ovwan nonẹna nẹ o vwo obo rọ wanree, ovwan cha ghwọrọ. 20 Kerẹ ẹgborho sansan rẹ Jihova cha ghwọrọ vwẹ obaro rẹ ovwan na, ọtiọyen ovwan cha ghwọrọ kidie ovwan rhọnvwe kerhọ rẹ urhuru ri Jihova Ọghẹnẹ rẹ ovwaan.