Jẹnẹsis

2 Ọtiọyena Ọghẹnẹ da ma idjuvwu na vẹ akpọ na kugbe erọnvwọn eje rehẹ evun rayen re. 2 Vwẹ ẹdẹ righwrẹn na, jẹ Ọghẹnẹ ruiruo ro ruẹ nure, kọ tuẹn omaerovwon phiyọ vwẹ ẹdẹ righwrẹn na vwo nẹ iruo rọyen eje ro ruẹ. 3 Ọghẹnẹ de bruba kẹ ẹdẹ righwrẹn na, o de ruo fon, kidie ẹdẹ yena yen Ọghẹnẹ vwọ ton omaerovwon phiyọ vwo nẹ erọnvwọn eje rọ mare, erọnvwọn eje ro vwori vwẹ ẹwẹn nẹ ọyen che ru.

4 Ọnana ikuegbe rẹ idjuvwu na vẹ otọrakpọ na ọke ra vwọ ma ayen, vwẹ ẹdẹ rẹ Jihova* Ọghẹnẹ vwọ ma otọrakpọ na vẹ odjuvwu na.

5 Odin rẹ aghwa vuọvo je rhe dia otọrakpọ naa, ẹbe rẹ aghwa vuọvo je rhe djẹẹ, kidie Jihova Ọghẹnẹ ji rhi ruo rere osio vwọ rhọ ku otọrakpọ naa, o ji vwo ohwo vuọvo ro che voro otọ naa. 6 Ẹkẹvuọvo evwru mi mu nẹ otọrakpọ na kpenu, ọ me kpọrhọ otọ na eje.

7 Jihova Ọghẹnẹ da vwẹ ekpẹn rẹ otọ na vwọ ma ohwo, ọ da wẹn ẹwẹn rẹ arhọ phiyọ iwen rọyen, ohwo na da rhe dia ohwo ro yerẹn.* 8 Vwọba, Jihova Ọghẹnẹ da kọn ogba ọvo vwẹ Idẹn, vwẹ ẹbẹre ọnre va nẹcha; etiyin kọyen o phi ohwo ro mare na phiyọ. 9 Ọtiọyena Jihova Ọghẹnẹ da nẹrhẹ kurhe kurhe ro fẹro ro ji fẹriọ djẹ nẹ otọ na rhe, ọtiọyen ji te urhe rẹ arhọ na vwẹ uherevie rẹ ogba na kugbe urhe rẹ erianriẹn rẹ obo ri yovwirin vẹ obo re brare.

10 Asaọkiephana o vwo urhie ọvo rọ djẹ nẹ Idẹn cha rọ kpọrhọ ogba na, etiyin ọ da ghare oma phiyọ irhie ẹne.* 11 Odẹ rẹ ọrẹsosuọ na yen Paishọn; ọyen riariẹ otọ ri Havilah eje phiyọ, asan rẹ oro hepha. 12 Oro rẹ otọ yena pha yoyovwin. Igọmu ri Dẹliọm* kugbe ubiukuta rẹ ọniks jehẹ etiyin. 13 Odẹ rẹ urhie rivẹ na yen Gaihọn; ọyen riariẹ otọ ri Kush eje phiyọ. 14 Odẹ rẹ urhie rerha na yen Hidẹkẹl;* ọyen ọ ro kpo ẹbẹre ọnre va nẹcha rẹ Asiria. Urhie rẹne na yen Yufretis.

15 Jihova Ọghẹnẹ da reyọ ọshare na, o de phio phiyọ ogba rẹ Idẹn rere o voro je vwẹrote. 16 Jihova Ọghẹnẹ je vwẹ iji nana vwọ kẹ ọshare na: “Wọ sa re evun vọn vwo nẹ kurhe kurhe rẹ ogba na rhe. 17 Ẹkẹvuọvo vwọ kẹ urhe rẹ erianriẹn rẹ obo ri yovwirin vẹ obo re brare na, wọ ria nẹ evun rọyeen, kidie ẹdẹ ru wọ re nẹ evun rọyen, o vwo obo rọ wanree wo che ghwu.”

18 Ọtiọyena Jihova Ọghẹnẹ da ta: “O yovwirin rẹ ọshare na ọvo vwọ rha dia ọtiọyeen. Me cha ma ọchuko vwọ kẹ rere ọ dia ọrivẹ rọyen.” 19 Asaọkiephana Jihova Ọghẹnẹ kọ ma keranvwe keranvwe rẹ aghwa na kugbe kemama kemama re rhan vwẹ idjuvwu na nẹ otọ na cha, kọ vwẹ ayen vwo rhe ọshare na rere ọ mrẹ obo ro che se ayen ọvuọvo; kodẹ kodẹ rẹ ọshare na se kemama kemama* ri vwo arhọ na, kọyen odẹ rọyen. 20 Ọtiọyena ọshare na de mu odẹ kẹ eranvwe na eje re dia orere kugbe emama re rhan vwẹ idjuvwu na kugbe keranvwe keranvwe rẹ aghwa na, ẹkẹvuọvo vwọ kẹ ọshare na, o vwo ọchuko vuọvo rọ dia ọrivẹ rọyeen. 21 Ọtiọyena Jihova Ọghẹnẹ da nẹrhẹ ọshare na vwerhẹn ovwerhẹn okokodo, ọke rọ vwọ vwerhẹn, ọ da reyọ ubiedada rọyen ọvo, o de rhurhu uvwo rẹ asan na. 22 Jihova Ọghẹnẹ da vwẹ ubiedada rọ reyọ nẹ oma rẹ ọshare na vwọ ma aye, ọ da reyọ vwo rhe ọshare na.

23 Ọtiọyena ọshare na da ta:

24 Fikirẹ ọtiọyena ọshare kọ yanjẹ ọsẹ vẹ oni rọyen vwo, ko churu mu aye rọyen, kẹ ayen dia ugboma ọvo. 25 Ayen ihwo ivẹ na ke diarọ ẹbẹban, ọshare na vẹ aye rọyen; dedena oma vo ayeen.