Ọbe Rivẹ ri Samuẹl
23 Enana eta re koba ri Devid:
“Ota ri Devid ọmọ ri Jẹsi,
Ota rẹ ọshare ra kpare kpenu,
Ọ rẹ Ọghẹnẹ ri Jekọp jẹreyọ,
Ọbuine re vwo ẹguọnọ rọyen rọ sua ine rẹ Izrẹl.*
2 Ẹwẹn ri Jihova wan oma mẹ ta ota;
Ota rọyen hẹ ẹrẹnvwe mẹ.
3 Ọghẹnẹ rẹ Izrẹl ta ota;
Oragha rẹ Izrẹl ta kẹ vwẹ nẹ:
‘Ọ ro suẹn ihworakpọ da dia ọvwata,
O de suẹn vwẹ oshọẹdjẹ rẹ Ọghẹnẹ,
4 Ọ pha kerẹ elo rẹ urhiọke vwẹ ọke rẹ ọnre na de lo,
Urhiọke ro vwo evwruu.
Ọ pha kerẹ elo vwẹ ọke rẹ osio da rhọ nu,
Rọ nẹrhẹ odin djẹ nẹ otọ cha.’
5 Ọ dia ọtiọyen yen uwevwin mẹ hepha vwẹ obaro rẹ Ọghẹnẹ?
Kidie o nene uvwe re ọphọ ri bẹdẹ,
O dje obo ro che ru fiotọ re, me riẹnre nẹ o che ru obo ro veri.
Kidie o mudiaphiyọ usivwin mẹ karekare kugbe aghọghọ mẹ eje,
Ọ dia ọyensorọ ọ vwọ nẹrhẹ o yovwin kẹ vwẹ?
6 Ẹkẹvuọvo e do eshare re che se vwo ru emuọvoo eje kufia kerẹ imirhe ri vwo inwe,
Kidie a cha sa vwẹ obọ tọrọ ayeen.
7 Ọke rẹ ohwo da vwẹ obọ te ayen,
Ofori nẹ ọ vwẹ utehru kugbe oshuẹ vwọ choma,
Ofori nẹ a vwẹ erhanre torhẹ ayen muotọ riẹriẹriẹ vwẹ asan rẹ ayen hepha.”
8 Enana yen edẹ rẹ egba ofovwin ri Devid: Joshẹb-bashibat ohwo rẹ orua ri Hakmonai, osun rẹ egba ofovwin erha na. O vwo ọke ọvo rọ vwọ reyọ oshuẹ rọyen vwo hwe eshare 800. 9 Ọ rọ vwọ kpahọn yen Ẹlieza ọmọ ri Dodo, ọmọ rẹ Ahohai, ọ hẹ usun rẹ egba ofovwin erha re vẹ Devid gba herọ ọke rẹ ayen vwọ vwẹ ihwo ri Filistia jehwẹ. Ihwo ri Filistia siomakoko vwẹ etiyin vwọ kẹ ofovwin, ọke rẹ ihwo rẹ Izrẹl vwọ mrẹ ayen djẹ, 10 o vrẹn nẹ asan ro mudia phiyọọ, kọ teyan ihwo ri Filistia na hwe bẹsiẹ obọ rọyen vwọ rhọ, obọ rọyen da rhe ghọn fikirẹ ọlọkọ rọ yọnrọnre na. Ọtiọyena Jihova da ghwa ophikparobọ* rode rhe vwẹ ẹdẹ yena; ihwo na de nene ra ghwẹ ekuakua rẹ ihwo ro hweri na.
11 Ọ rọ vwọ kpahọn yen Shama ọmọ rẹ Egi ohwo ri Hara. Ihwo ri Filistia na ghwomakoko vwẹ Lihai, vwẹ otọ ọvo ra kọn ilẹntil vọn; ihwo na da djẹ fikirẹ ihwo ri Filistia na. 12 Ẹkẹvuọvo o mudia phiyọ uherevie rẹ aghwa na, ọ rhọnvwere nẹ a reyọọ, jẹ ọ teyan ihwo ri Filistia na hwe, ọtiọyena Jihova da ghwa ophikparobọ* rode rhe.
13 Eshare erha vwẹ usun rẹ isun 30 na de bru Devid ra vwẹ unu rẹ ukuta rẹ Adọlam vwẹ ọke rẹ orhọ na, jẹ ihwo ri Filistia wonphiyọ* Iyara* ri Rẹfeim. 14 Vwẹ ọke yena Devid hẹ asan ro fuoma na, jẹ ẹko ọvo rẹ isodje rẹ ihwo ri Filistia hẹ Bẹtlẹhẹm. 15 Devid da ta: “Mane ke me sa mrẹ ame da vwo nẹ orhare* rọ kẹrẹ anurhoro ri Bẹtlẹhẹm na!” 16 Ọtiọyena egba ofovwin erha na da vwẹ ogangan vwọ ro asan rẹ ihwo ri Filistia na wonphiyọ, ayen de vo ame vwo nẹ orhare rọ kẹrẹ anurhoro ri Bẹtlẹhẹm, ayen de muo rhe Devid; ẹkẹvuọvo ọ rhọnvwe daa, o de kuo kuotọ vwẹ obaro ri Jihova. 17 Ọ da ta: “Mi che se ru ọnanaa, E Jihova, me da ọbara rẹ eshare ri phi arhọ* rayen phiyọ ẹdia rẹ imuoshọ na?” Ọtiọyena ọ rhọnvwe daa. Enana erọnvwọn rẹ egba ofovwin rọyen erha na ruru.
18 Abishai oniọvo ri Joab ọmọ ri Zẹruya yen osun rẹ egba ofovwin erha efa; ọ vwẹ oshuẹ rọyen hwe eshare 300, a je riẹn odẹ rọyen kerẹ egba ofovwin erha na. 19 Dede nẹ ọyen me titi vwẹ usun rẹ egba ofovwin erha ri chekọ na, ọyen jẹ onotu rayen, jẹ ẹdia rọyen rho te ọ rẹ egba ofovwin erha rẹsosuọ naa.
20 Bẹnaya ọmọ ri Jehoyada ọyen ọshare ro fiudugberẹ,* o ru emu ride buebun vwẹ Kabziẹl. Ọ teyen emeshare ivẹ rẹ Ariẹl ohwo ri Moab hwe, ọ da ro ukpotọ vwẹ ẹdẹ ọvo rẹ imicho vwo she, o de hwe okpohrokpo. 21 Ọ je teyen ohwo rẹ Ijipt ọvo rọ rhoro mamọ hwe. Dede nẹ ohwo rẹ Ijipt na yọnrọn oshuẹ vwẹ obọ rọyen, ọ da yanran vẹ ọkpọ, o de fru oshuẹ na nẹ obọ rẹ ohwo rẹ Ijipt na, ọ da vwẹ oshuẹ robọ rọyen na vwọ teyọn hwe. 22 Enana erọnvwọn rẹ Bẹnaya ọmọ ri Jehoyada ruru, a je riẹn odẹ rọyen kirobo ra riẹn edẹ rẹ egba ofovwin erha na. 23 Dede nẹ o titi vrẹ ọgban na, jẹ ẹdia rọyen rho te ọ rẹ erha naa. Ẹkẹvuọvo Devid reyerọ vwo mu vwẹ enu rẹ ihwo re rhẹrẹ.
24 Asahẹl oniọvo ri Joab hẹ usun rẹ ọgban na: Ẹlhenan ọmọ ri Dodo ri Bẹtlẹhẹm, 25 Shama ohwo ri Herọd, Ẹlaika ohwo ri Herọd, 26 Hilẹz ohwo ri Palti, Aira ọmọ rẹ Ikẹsh ohwo ri Tẹkoa, 27 Abi-iza ohwo rẹ Anatọt, Mẹbọnnai ohwo ri Husha, 28 Zalmọn ohwo rẹ Ahohai, Meharai ohwo ri Nẹtofa, 29 Hilẹb ọmọ ri Beanah ohwo ri Nẹtofa, Itai ọmọ ri Raibai ri Gibia rẹ ihwo rẹ orua ri Bẹnjamin, 30 Bẹnaya ohwo ri Piratọn, Hidai rẹ iwadi* ri Geash, 31 Ebai-abọn ohwo ri Bẹt-araba, Azmavẹt ohwo ri Bahurim, 32 Elayaba ohwo ri Shealbim, emọ ri Jeshin, Jonatan, 33 Shama ohwo ri Hara, Ahayam ọmọ ri Shera ohwo ri Hara, 34 Ẹlifẹlẹt ọmọ rẹ Ahasbai ọmọ ri Meakat, Elayam ọmọ rẹ Ahitofẹl ohwo ri Gailo, 35 Hẹzrọ ohwo ri Kamẹl, Pearai ohwo rẹ Arab, 36 Aigal ọmọ ri Netan ri Zoba, Benai ohwo rẹ uvwiẹ ri Gad, 37 Zilẹk ohwo rẹ Amọn, Neharai ohwo ri Biẹrọt, ohwo ro muẹ ekuakua ofovwin ri Joab ọmọ ri Zẹruya, 38 Aira ohwo rẹ Itri, Gerẹb ohwo rẹ Itri, 39 kugbe Yuraya ohwo ri Hẹt—ayen eje 37.