Ọrivẹ re si Rhe Ihwo ri Kọrẹnt
8 Asaọkiephana iniọvo, avwanre guọnọ jẹ ovwan riẹn kpahen ẹse rẹ Ọghẹnẹ re muwan rọye-en re dje vwọ kẹ ikoko rehẹ Masidonia. 2 Vwẹ ọke rẹ ayen vwọ rioja rẹ ọdavwini ọgangan, dede nẹ ayen igbere oboba, jẹ aghọghọ ro rhe ayen mu ayen vwo djephia nẹ ayen feri vwọrẹ ẹwẹn womarẹ ẹse rẹ oghẹresan rẹ ayen ruru. 3 Kidie ayen ruro nene oborẹ ẹgba rayen muru, e, mi soseri rọyen nẹ ayen tobọ ru vrẹ ọtiọyen, 4 ayen vwẹ ọhọ robọ rayen vwọ rẹ avwanre kọke kọke nẹ a kẹ ayen uphẹn rẹ ayen vwọ kokẹ rẹ arodọnvwẹ, rẹ ayen vwo vwobọ vwẹ iruo rẹ ukẹcha vwọ kẹ ihwo efuanfon na. 5 Ọ ghwa dia oborẹ avwanre rhẹro rọyen ọvo-o, ẹkẹvuọvo ẹsosuọ, ayen vwẹ oma rayen kpahotọ kẹ Ọrovwori na vẹ avwanre kirobo rẹ Ọghẹnẹ guọnọre. 6 Ọtiọyena, avwanre jiriro kẹ Taitọs nẹ iruo rọ tonphiyọ vwẹ ohri rẹ ovwan na, o ruo re, kọyen ẹreyọ rẹ okẹ rẹ arodọnvwẹ rẹ ovwan vwọ kpahotọ. 7 Ọtiọyena, kirobo rẹ ovwan vwo bun vwẹ kemu kemu, vwẹ esegbuyota, vwẹ ota, vwẹ erianriẹn, vwẹ ẹgbaẹdavwọn eje kugbe ẹguọnọ rẹ avwanre vwo kpahen ovwan, ovwan gba je kokẹ rẹ arodọnvwẹ nana bun ọtiọyen.
8 Me ta ọnana, ọ dia ọ ri mi vwo jurhi kẹ ovwa-an, ẹkẹvuọvo rẹ ovwan vwọ riẹn kpahen ẹgbaẹdavwọn rẹ ihwo efa, me je vwọ riẹn sẹ ẹguọnọ rẹ ovwan ghene ọ rẹ obọdẹn. 9 Kidie ovwan riẹn ẹse re muwan rọye-en rẹ Ọrovwavwanre Jesu Kristi, dede nẹ o feri, ọ da rhe dia ogbere fikirẹ ovwan, rere ovwan vwo fe womarẹ ẹdia rẹ ogbere rọyen.
10 Ọnana iroroẹjẹ mẹ: We ru ọnana fikirẹ erere rẹ ovwan, kidie ọ dia ovwan de ton irueru nana phiyọ vwẹ ẹgbukpe ọvo rọ wanre na-a, ẹkẹvuọvo ovwan ji dje owenvwe rẹ ovwan vwo ruo phia. 11 Ọtiọyena, ovwan ru oborẹ ovwan tonphiyọ na re, rere ovwan vwẹ owenvwe vuọvo rẹ ovwan vwọ tuọnphiyọ na ji vwo ruo re, vwo nene oborẹ ẹgba rẹ ovwan muru. 12 Owenvwe na da herọ nure, ọyen o de me je Ọghẹnẹ kidie oborẹ ohwo vwori yen ọ vwọ kẹ okẹ, ọ dia obo ro je vwo-o. 13 Kidie me guọnọ ruo lọhọ kẹ ihwo efa, mi mi rhe ruo gan kẹ ovwa-an; 14 ẹkẹvuọvo rere erọnvwọn eje sa vwọ dia abavo, ovwan reyọ oborẹ ovwan vwo bun asaọkiephana vwo ru ọdavwẹ rayen, rere ayen reyọ oborẹ ayen vwo bun vwo ru ọdavwẹ rẹ ovwan, rere erọnvwọn na eje sa vwọ dia abavo. 15 Kirobo re siro: “Ohwo ro vwo bun, o vwo bun nọ-ọ, ohwo ro vwo bu-un, obo ro vwori hanvwe nọ-ọ.”
16 Akpẹvwẹ kẹ Ọghẹnẹ ro phi oka rẹ ọdavwẹ ọgangan rẹ avwanre vwo kpahen ovwan na phiyọ ubiudu ri Taitọs, 17 kidie o ru nene uchebro rẹ avwanre vwọ kẹ, ẹkẹvuọvo fikirẹ owenvwe ọgangan ro vwori, ọ vwẹ ẹwẹn robọ rọyen vwo brẹ ovwan cha asaọkiephana. 18 Ẹkẹvuọvo avwanre ji oniọvo ọvo nene cha, ohwo rẹ iruo rẹ iyẹnrẹn esiri rọyen kperusi vwẹ ikoko na ejobi. 19 Ọ dia ọyena ọvo-o, ẹkẹvuọvo ikoko na je reyọ vwo mu nẹ o nene avwanre vwẹ oyan rẹ avwanre vwọ ghara okẹ rẹ arodọnvwẹ nana, rọ cha ghwa urinrin bru Ọrovwori na ra, ji djephia nẹ avwanre muegbe rẹ avwanre vwọ vwẹ ukẹcha kẹ ihwo efa. 20 Ọtiọyena avwanre jomaotọ rere ohwo vuọvo vwo jẹ echobọ ẹmrẹ vwẹ oma rẹ avwanre vwọ kpahen utoro nana rẹ ihwo torori nẹ otọ rẹ ẹwẹn rhe, rẹ avwanre ghara na. 21 Kidie avwanre ‘fuevun vwẹrote erọnvwọn eje, ọ dia vwẹ ẹro ri Jihova* ọvo-o, ẹkẹvuọvo ji te ọ rẹ ihworakpọ.’
22 Vwọba, avwanre ji oniọvo rẹ avwanre nene ayen, ohwo rẹ avwanre davwen ni abọ buebun je mrẹvughe nẹ o gbẹrophiyotọ ruẹ erọnvwọn. Jẹ asaọkiephana, o gbẹrophiyotọ vrẹ obo ri jovwo fikirẹ ẹro rọ vwọso ovwan. 23 Ọ da dianẹ e vwo ẹwẹn ivivẹ kpahen Taitọs, ọyen ọrivẹ mẹ, ohwo re me vẹ ọyen gba wian kuẹgbe fikirẹ erhuvwu rẹ ovwan; yẹrẹ e de vwo ẹwẹn ivivẹ kpahen iniọvo na, ayen iyinkọn rẹ ikoko na kugbe urinrin ri Kristi. 24 Ọtiọyena, we dje ẹguọnọ kẹ ayen rere ikoko na sa vwọ riẹn oboresorọ avwanre vwọ reyọ ovwan vwọ yonma.