Livitikọs

20 Jihova da ta kẹ Mosis: 2 “Wọ me ta kẹ ihwo rẹ Izrẹl nẹ, ‘O vwo obo rọ wanree, e jẹ e hwe kohwo kohwo rẹ Izrẹl kugbe kọrhorha kọrhorha rọ dia evunrẹ Izrẹl rọ vwẹ ọmọ rọyen kẹ Molẹk. Ihwo rẹ otọ na me vwẹ ikuta vwo phio hwe. 3 Mẹvwẹ komobọ cha vwọso ohwo yena, ki mi che bro* nẹ ohri rẹ ihwo rọyen, kidie ọ vwẹ emọ rọyen evo kẹ Molẹk, o de gbe asan ọfuanfon mẹ ẹgua je phọphọ odẹ ọfuanfon mẹ. 4 Ihwo rẹ otọ na da vwẹ arogba vwo rhurhu ẹro rayen vwọ kẹ oborẹ ohwo yena ruru rọ vwọ vwẹ emọ rọyen vwọ kẹ Molẹk, ayen rha teyọn hwee, 5 vwọrẹ imuẹro, mẹvwẹ komobọ cha vwọso ohwo yena vẹ orua rọyen. Ki mi che bru* ohwo yena nẹ ohri rẹ ihwo rọyen, ọtiọyen ji te ihwo eje re vwomaba vwo nene Molẹk gbe ọfanrhiẹn.

6 “‘Vwọ kẹ ohwo* ro brẹ ihwo ri nene emekashe rẹ Idẹbono ruẹ kuẹgbe kugbe ebọepha ra rere o vwo jẹ evun ẹfuọn kẹ vwẹ,* vwọrẹ imuẹro me cha vwọso ohwo* yena, ki mi che bro* nẹ ohri rẹ ihwo rọyen.

7 “‘Ovwan mi ru oma rẹ ovwan fon je dia fuanfon, kidie mẹvwẹ Jihova Ọghẹnẹ rẹ ovwan. 8 Ovwan me yonrọn irhi mẹ ji ru nene ayen. Mẹvwẹ Jihova, ohwo ro ruẹ ovwan fuan na.

9 “‘Ọ da dianẹ ohwo ọvo herọ rọ hanrhe* ọsẹ rọyen yẹrẹ oni rọyen, o vwo obo rọ wanree, e jẹ a teyọn hwe. Rọ vwọ dianẹ ọ hanrhe ọsẹ rọyen yẹrẹ oni rọyen na, ọbara rọyen hẹ enu rẹ uyovwin rọyen.

10 “‘Asaọkiephana vwọ kpahen ọshare ro nene aye rẹ ọshare ọfa gbe igberadja: O vwo obo rọ wanree, e jẹ a teyen ohwo ro nene aye rẹ ọrivẹ rọyen gbe igberadja na hwe, te ọshare ro gbe igberadja kugbe aye ro igberadja na. 11 Ọshare ro nene aye rẹ ọsẹ rọyen vwerhẹn phọphọ ọsẹ rọyen.* O vwo obo rọ wanree, e jẹ a teyen ayen ihwo ivẹ na hwe. Ọbara rayen hẹ enu rẹ uyovwin rayen. 12 Ọ da dianẹ ọshare nene aye rẹ ọmọ rọyen vwerhẹn, o vwo obo rọ wanree, e jẹ a teyen ayen ihwo ivẹ na hwe. Ayen vwọso obo ri shephiyọ. Ọbara rayen hẹ enu rẹ uyovwin rayen.

13 “‘Ọ da dianẹ ọshare nene ọshare ọfa vwerhẹn kirobo rẹ ohwo nene aye vwerhẹn, ayen ihwo ivẹ na ru emu rẹ ẹgua. O vwo obo rọ wanree, e jẹ a teyen ayen hwe. Ọbara rayen hẹ enu rẹ uyovwin rayen.

14 “‘Ọ da dianẹ ọshare reyọ aye vẹ oni rọyen kugbe, ọyen emu ra ghẹmrẹ.* E jẹ a vwẹ erhanre vwọ torhẹ vẹ ayen ihwo ivẹ na, rere uruemu ra ghẹmrẹ vwo jẹ ohri rẹ ovwan ẹdia ọfa.

15 “‘Ọ da dianẹ ọshare nene eranvwe vwerhẹn, o vwo obo rọ wanree, e jẹ a teyọn hwe, ovwan mi ji hwe eranvwe na. 16 Ọ da dianẹ aye bru eranvwe ra ro vwo nene vwerhẹn, ovwan mi hwe aye na vẹ eranvwe na. O vwo obo rọ wanree, e jẹ a teyen ayen hwe. Ọbara rayen hẹ enu rẹ uyovwin rayen.

17 “‘Ọ da dianẹ ọshare nene oniọvo rọyen ọmọtẹ vwerhẹn, owenẹ ọ dia ọmọ rẹ ọsẹ rọyen yẹrẹ ọmọ rẹ oni rọyen, ọ da mrẹ ẹban rẹ ọmọtẹ na, ọmọtẹ na da je mrẹ ẹban rọyen, ọyen ophọphọvwe. E jẹ a teyen ayen hwe vwẹ irharo rẹ emọ rẹ ihwo rayen. Ọ phọphọ oniọvo rọyen ọmọtẹ.* E jẹ ọ rioja rẹ oruchọ rọyen.

18 “‘Ọ da dianẹ ọshare nene aye rọ mrẹ ọke rọyen vwerhẹn, ọ vẹ ọyen da mroma, ayen ihwo ivẹ na phọphọ ọbara rọyen ro hwẹ na. E jẹ e bru* ayen ihwo ivẹ na nẹ ohri rẹ ihwo rayen.

19 “‘Wẹ vẹ oniọvo rẹ oni wẹn rẹ ọmọtẹ yẹrẹ oniọvo rẹ ọsẹ wẹn rẹ ọmọtẹ mromaa, kidie ọyena cha dia ophọphọvwe vwọ kẹ oniọvo rẹ evun wẹn. E jẹ ayen rioja rẹ oruchọ rayen. 20 Ọshare ro nene aye rẹ oniọvo rẹ ọsẹ rọyen vwerhẹn phọphọ oniọvo rẹ ọsẹ rọyen.* E jẹ ayen rioja rẹ umwemwu rayen. E jẹ ayen ghwu, ayen che vwiẹẹ. 21 Ọ da dianẹ ọshare reyọ aye rẹ oniọvo rọyen, ọyen emu rẹ ẹgua. Ọ phọphọ oniọvo rọyen.* Ayen che vwiẹẹ.

22 “‘Ovwan muọghọ kẹ irhi mẹ eje kugbe orhiẹn-ebro mẹ eje, ovwan nene ayen rere otọ re me reyọ ovwan ra rẹ ovwan cha dia na vwo jẹ ovwan ẹkpa kuẹfia. 23 Ovwan nene irhi rẹ ẹgborho re me cha djẹ nẹ obaro rẹ ovwan naa; kidie ayen ru erọnvwọn nana eje, mi ji vwo utuoma kpahen ayen. 24 Ọyensorọ me vwọ ta kẹ ovwan: “Ovwan cha riuku rẹ otọ rayen, ke me cha vwọ kẹ ovwan kerẹ ughwẹ, otọ rọ djẹ ọkẹre rẹ ameivie vẹ ame ọnyọn. Jihova Ọghẹnẹ rẹ ovwan yen mi ruẹ, ohwo rọ hẹriẹ ovwan nẹ ihwo na.” 25 Ovwan mi phi ofẹnẹ phiyọ uvwre rẹ eranvwe rọ fonro vẹ ọ ro jẹfuọn kugbe uvwre rẹ ọphran rọ fonro vẹ ọ ro jẹfuọn; ovwan ruẹ oma rẹ ovwan* phiyọ emu rẹ utuoma womarẹ eranvwe yẹrẹ ọphran yẹrẹ kemu kemu ro kpono vwẹ otọ na re me hẹriẹ kẹ ovwan kerẹ obo ri jẹfuọọn. 26 Ovwan me dia fuanfon kẹ vwẹ, kidie mẹvwẹ ri Jihova, me fonro, me hẹriẹ ovwan vwo nẹ ihwo na rere ovwan dia emẹ.

27 “‘O vwo obo rọ wanree, e jẹ e hwe kọshare kọshare yẹrẹ kaye kaye ro nene emekashe rẹ Idẹbono ruẹ kuẹgbe yẹrẹ rọ bọ epha.* Ihwo na mi phi ayen hwe. Ọbara rayen hẹ enu rẹ uyovwin rayen.’”