Ẹyano

20 Ọyena vwọ wan nu, Ọghẹnẹ da ta eta nana eje:

2 “Mẹvwẹ Jihova Ọghẹnẹ rẹ ovwan rọ reyọ ovwan nẹ otọ rẹ Ijipt rhe, vwo nẹ uwevwin rẹ eviẹn rhe. 3 Ovwan vwo eghẹnẹ efa vwọ vrẹ vwẹẹ.*

4 “Ovwan kara oma vwọ kẹ oma rẹ ovwaan yẹrẹ kara obo re họhọ orọnvwọn rọhẹ idjuvwu na vwẹ obenu yẹrẹ akpọ na vwẹ obotọ yẹrẹ vwevunrẹ ame na vwẹ obotọ rẹ akpọ naa. 5 Ovwan vwẹ uyovwin kpotọ kẹ ayen yẹrẹ we jẹ a riẹriẹ ovwan vwọ ga ayeen, kidie mẹvwẹ ri Jihova Ọghẹnẹ rẹ ovwan na, mẹvwẹ Ọghẹnẹ rọ guọnọ ẹga ọsoso, rọ hwosa rẹ oruchọ rẹ esẹ vwọ kẹ emọ,* vwọ kẹ uvwiẹ rerha kugbe uvwiẹ rẹne rẹ ihwo ri vwo utuoma kpahen ovwẹ, 6 ẹkẹvuọvo ro dje ẹguọnọ ro jẹ rhẹriẹ vwọ kẹ ihwo ri vwo ẹguọnọ mẹ re je yọnrọn irhi mẹ re te uvwiẹ uriorin rayen.

7 “Ovwan reyọ odẹ ri Jihova Ọghẹnẹ rẹ ovwan vwo ruiruo vwẹ idjerhe ri jẹ ọghọ emuoo, kidie Jihova che jẹ oja egbe vwọ kẹ ohwo rọ reyọ odẹ rọyen vwo ruiruo vwẹ idjerhe ri jẹ ọghọ emuoo.

8 “Ovwan karophiyọ ẹdẹ Urovwoma na rere ovwan ruo fon. 9 Ovwan me wian ji ruiruo rẹ ovwan eje vwẹ ẹdẹ esan, 10 ẹkẹvuọvo ẹdẹ righwrẹn na ọyen ẹdẹ urovwoma vwọ kẹ Jihova Ọghẹnẹ rẹ ovwan. Ovwan ruiruo vuọvoo, te ovwan te emeshare rẹ ovwan te emetẹ rẹ ovwan te eviẹn rẹ ovwan eshare te eviẹn rẹ ovwan emetẹ te eranvwe rẹ ovwan re dia orere kugbe erhorha re dia irere rẹ ovwan.* 11 Kidie ẹdẹ esan yen Jihova vwọ ma idjuvwu kugbe otọrakpọ na, abadi na kugbe erọnvwọn eje rehẹ evun rayen, ọ da tuẹn omaerovwon phiyọ vwẹ ẹdẹ righwrẹn na. Kọyensorọ Jihova vwo bruba kẹ ẹdẹ Urovwoma na, o de ruo fon.

12 “Ovwan muọghọ kẹ esẹ vẹ ini rẹ ovwan, rere ovwan sa vwọ dia ọke grongron vwẹ otọ rẹ Jihova Ọghẹnẹ rẹ ovwan cha vwọ kẹ ovwan na.

13 “Ovwan hwe ohwoo.

14 “Ovwan gbe igberadjaa.

15 “Ovwan chujii.

16 “Ovwan soseri rẹ efian ọke rẹ ovwan de soseri kpahan ọrivẹ rẹ ovwaan.

17 “Ovwan vwo urhurusivwe kpahan uwevwin rẹ ọrivẹ rẹ ovwaan. Ovwan vwo urhurusivwe kpahan aye ọrivẹ rẹ ovwaan, ọviẹn rọyen ọshare yẹrẹ ọviẹn rọyen ọmọtẹ yẹrẹ erhuẹn rọyen yẹrẹ ekẹkẹtẹ rọyen yẹrẹ kemu kemu rẹ ọrivẹ rẹ ovwan vworii.”

18 Asaọkiephana ihwo na eje nyo edo rẹ agbraran na je mrẹ enu rọ nyavwaro na, ayen nyo edo rẹ ọgban na je mrẹ ugbenu na ro brẹ ivwirhi; enana rẹ ayen mrẹ ji nyo na da nẹrhẹ ayen phariẹ, ayen de mudia ugboko. 19 Ọtiọyena ayen da ta kẹ Mosis: “Ta ota kẹ avwanre, avwanre cha kerhọ, ẹkẹvuọvo wo jẹ Ọghẹnẹ ta ota kẹ avwanree, kidie oshọ muẹ avwanre nẹ avwanre che ghwu.” 20 Ọtiọyena Mosis da ta kẹ ihwo na: “Ovwan djoshọọ, kidie Ọghẹnẹ rẹ uyota na rhere rhe davwen ovwan ni, rere ovwan vwọ rha djoshọ rọyen, ovwan vwo jẹ umwemwu eruo.” 21 Ọtiọyena ihwo na de mudia ugboko, ẹkẹvuọvo Mosis de sikẹrẹ evwru ro muebri na, asan rẹ Ọghẹnẹ rẹ uyota na hepha.

22 Jihova da ta kẹ Mosis: “Ọnana yen oborẹ wọ cha ta kẹ ihwo rẹ Izrẹl, ‘Ovwan komobọ mrẹrẹ nẹ me ta ota kẹ ovwan nẹ odjuvwu rhe. 23 Ovwan ruẹ eghẹnẹ rẹ idọnọ efuanfon vwọ ba vwẹẹ, ovwan ji ruẹ eghẹnẹ rẹ iro vwọ kẹ oma rẹ ovwaan. 24 Agbada rẹ ekpẹn yen ovwan cha so kẹ vwẹ, ovwan mi ze izobo rẹ ẹtorhẹ rẹ ovwan vwẹ enu rọyen, izobo rẹ ọrekugbe rẹ ovwan,* igodẹ rẹ ovwan kugbe erhuẹn rẹ ovwan. Vwẹ kasan kasan re me da nẹrhẹ a karophiyọ odẹ mẹ, mi che bru ovwan rhe rhi bruba kẹ ovwan. 25 Ovwan da so agbada rẹ ikuta vwọ kẹ vwẹ, ovwan vwẹ ikuta ra vwẹ ekuakua rẹ ovwan vwo bru* vwọ suọọ. Kidie ovwan da vwẹ ichizo rẹ ovwan vwo te, jẹ ovwan gbe re ẹgua. 26 Ovwan ruẹ istẹpu ra wan yerẹn kpenu phiyọ agbada mẹẹ, rere e vwo jẹ ẹban rẹ ovwan ẹmrẹ vwẹ enu rọyen.’