Livitikọs

19 Jihova da rhoma ta ota kẹ Mosis, ọ da ta: 2 “Ta ota kẹ ọghwẹgbe rẹ ihwo rẹ Izrẹl eje rere wọ vuẹ ayen nẹ, ‘Ovwan me fon, kidie mẹvwẹ ri Jihova Ọghẹnẹ rẹ ovwan na, me fonro.

3 “‘Ovwan ohwo ọvuọvo mi muọghọ kẹ* ọsẹ rọyen vẹ oni rọyen, ovwan me sẹro rẹ ẹdẹ urovwoma mẹ. Mẹvwẹ Jihova Ọghẹnẹ rẹ ovwan. 4 Ovwan brẹ eghẹnẹ ifefe raa yẹrẹ ovwan ruẹ eghẹnẹ rẹ itehru kẹ oma rẹ ovwaan. Mẹvwẹ Jihova Ọghẹnẹ rẹ ovwan.

5 “‘Asaọkiephana, ovwan de ze izobo rẹ ọrekugbe kẹ Jihova, ovwan mi ze izobo na vwẹ idjerhe rẹ ovwan da mrẹ ẹroesiri kẹ oma rẹ ovwan. 6 E jẹ a riọ vwẹ ẹdẹ rẹ ovwan ze izobo na kugbe ẹdẹ rọ vwọ kpahọn, ẹkẹvuọvo a me vwẹ erhanre vwọ torhẹ obo ri chekọ vwẹ ẹdẹ rerha. 7 Ọ da dianẹ a re ẹbẹre ọvo rọyen vwẹ ẹdẹ rerha, ọyen emu rẹ ẹgua re che rhiabọreyọ vẹ ẹroesirii. 8 Ohwo rọ rerọ na cha rioja fikirẹ oruchọ rọyen, kidie o gbe orọnvwọn ọfuanfon ri Jihova ẹgua, ke bru* ohwo* yena nẹ ohri rẹ ihwo rọyen.

9 “‘Ọke rẹ ovwan de vun orhọ rẹ otọ rẹ ovwan, ovwan vuẹn ọkọkọ rẹ udju rẹ ovwan karekaree, ovwan ji gbugbon rẹ* orhọ rẹ ovwaan. 10 Vwọba, ovwan koko obo ri chekọ vwẹ ogba rẹ ivaini rẹ ovwan yẹrẹ tọrọ igrepu re hrare vwẹ ogba rẹ ivaini rẹ ovwaan. Ovwan me yanjẹ ayen vwo kẹ ivwiogbere* kugbe erhorha. Mẹvwẹ Jihova Ọghẹnẹ rẹ ovwan.

11 “‘Ovwan chujii, ovwan phiẹn ihwoo, ovwan je ghwa ohwohwo riaa. 12 Ovwan vwẹ odẹ mẹ vwo duvwun iyorin rẹ efiaan rere ovwan vwo jẹ odẹ rẹ Ọghẹnẹ rẹ ovwan ẹphọphọ. Mẹvwẹ Jihova. 13 Wọ ghwa ọrivẹ wẹn riaa, wo gborho ohwoo. Wo jẹ osa rẹ ọwiowian ru wọ reyọ phiyọ iruo dia obọ wẹn re te urhiọkee.

14 “‘Wọ hanrha* odierhọ yẹrẹ phi orọnvwọn phiyọ obaro rẹ orhuẹroo, wọ me djoshọ rẹ Ọghẹnẹ wẹn. Mẹvwẹ Jihova.

15 “‘Ovwan brorhiẹn rẹ oshenyẹẹ. Wo gbe arodọnvwẹ kẹ ogbere kidie nẹ ọyen ogberee yẹrẹ wo ji nẹ ọdafe ruẹẹ. Brorhiẹn rẹ abavo ọke ru wo de guẹdjọ rẹ ọrivẹ wẹn.

16 “‘Wọ hrahra efian vwo miovwo ohwo vwẹ ohri rẹ ihwo wẹẹn. Wo muẹdia vwọsua arhọ* rẹ ọrivẹ wẹẹn.* Mẹvwẹ Jihova.

17 “‘Wo vwo utuoma kpahan oniọvo wẹn vwevunrẹ ubiudu wẹẹn. Vwo imuẹro nẹ wọ ghwọku ọrivẹ wẹn rere wo vwo jẹ umwemwu eruo kerẹ ọyen.

18 “‘Wo ruẹ orukerii yẹrẹ phi ota phiyọ evun vwọ kpahen emọ rẹ ihwo wẹẹn, wo mi vwo ẹguọnọ rẹ ọrivẹ wẹn kerẹ omobọ wẹn. Mẹvwẹ Jihova.

19 “‘Ovwan me yọnrọn irhi mẹ: Ovwan jẹ oka rẹ eranvwe ivẹ rẹ ovwan re dia orere vwiẹ emọ kuẹgbee. Ovwan vwẹ oka rẹ ibi ivẹ vwọ kọn udju rẹ ovwaan, ovwan ji kuẹ ewun ra vwẹ oka rẹ oruru ivẹ vwo rhuon phiyọọ.

20 “‘Asaọkiephana ọ da dianẹ ọshare nene aye vwerhẹn, ọ vẹ ọyen da mroma jẹ aye na odibo ra cha vwọ kẹ ọshare ọfa rọvwọn kerẹ aye, ẹkẹvuọvo a je rhe tan hirhe yẹrẹ kẹ ugbomọphẹẹ, e je gboja kẹ ayen. Ẹkẹvuọvo a cha teyen ayen hwee, kidie e ji rhi siobọnoo. 21 E jẹ ọ vwẹ izobo rẹ abe rọyen vwo rhe Jihova vwẹ asan ra wan rua utughẹ ra da vwoma na, egbon ọvo rẹ izobo rẹ abe. 22 Orherẹn na cha vwẹ egbon rẹ izobo rẹ abe na vwo ru arhuẹrẹ kẹ vwẹ obaro ri Jihova fikirẹ umwemwu ro ruru na, a me vwẹ umwemwu ro ruru na vwo ghovwo.

23 “‘Ọke rẹ ovwan da ro evunrẹ otọ na, ovwan da kọn kurhe kurhe ra ria, ovwan mi ni emamọ rọyen kerẹ obo ri jẹfuọn ra gha. Ọ me dia emu rẹ ẹgha vwọ kẹ ovwan vwẹ ẹgbukpe erha. Ovwan riọọ. 24 Ẹkẹvuọvo vwẹ ukpe rẹne na, emamọ rọyen eje ke cha fon vwọ kẹ aghọghọ vwẹ obaro ri Jihova. 25 Vwẹ ukpe riyorin na, ovwan sa re emamọ rọyen rere ovwan sa vwọ vwẹ ayen ba oborẹ ovwan vunru vwẹ orhọ rẹ ovwan. Mẹvwẹ Jihova Ọghẹnẹ rẹ ovwan.

26 “‘Ovwan ria orọnvwọn vuọvo ro vwo ọbara vwẹ evun rọyeen.

“‘Ovwan bọ epha yẹrẹ ruẹ imajikii.

27 “‘Ovwan wanre* ẹton rehẹ ọkọkọ rẹ opharo rẹ ovwaan yẹrẹ brẹ ẹtuegban rẹ ovwan yanghan yanghaan.

28 “‘Ovwan brẹ ibrebru phiyọ ugboma rẹ ovwan fikirẹ ohwo ro ghwuruu,* ovwan ji brẹ eka rẹ itatu phiyọ oma rẹ ovwaan. Mẹvwẹ Jihova.

29 “‘Wọ phọphọ ọmọtẹ wẹn womarẹ wọ vwọ reyọ vwo gbe igberadjaa, rere otọ na vwo jẹ igberadja egbe, ọ me rhe vọn vẹ iruemu ra ghẹmrẹ.

30 “‘Wọ me sẹro rẹ ẹdẹ urovwoma mẹ, wo mi ji muọghọ kẹ* asan ọfuanfon mẹ. Mẹvwẹ Jihova.

31 “‘Ovwan brẹ ihwo ri nene emekashe rẹ Idẹbono ruẹ kuẹgbe raa, ovwan ji brẹ ebọepha raa, rẹ ayen da rhe nẹrhẹ ovwan dia ihwo ri jẹfuọn. Mẹvwẹ Jihova Ọghẹnẹ rẹ ovwan.

32 “‘Wo mi vrẹn mudia vwẹ obaro rẹ ohwo rẹ uyovwin rọyen djẹ esha, wo mi muọghọ kẹ ọmare, wọ me je djoshọ rẹ Ọghẹnẹ wẹn. Mẹvwẹ Jihova.

33 “‘Ọ da dianẹ ọrhorha nene ovwan dia evunrẹ otọ rẹ ovwan, ovwan vwẹ oja riọọ. 34 Ọrhorha ro nene ovwan dia me dia kerẹ ọmotọ vwẹ ohri rẹ ovwan; ovwan mi vwo ẹguọnọ rọyen kerẹ omobọ rẹ ovwan, kidie ovwan erhorha jovwo vwẹ otọ rẹ Ijipt. Mẹvwẹ Jihova Ọghẹnẹ rẹ ovwan.

35 “‘Ovwan vwẹ ovwanvwọ rẹ ọghware vwọ vwanvwa ugrongron, ọnyẹ, yẹrẹ oborẹ orọnvwọn bun tee. 36 Ovwan me vwẹ evwanvwọ egbagba vwo ruiruo, ovwanvwọ ọgbagba rẹ ọnyẹ, ovwanvwọ ọgbagba rẹ erọnvwọn eyaya,* kugbe ovwanvwọ ọgbagba rẹ erọnvwọn re họhọ ame.* Mẹvwẹ Jihova Ọghẹnẹ rẹ ovwan, rọ reyọ ovwan nẹ otọ rẹ Ijipt rhe. 37 Ọtiọyena ovwan me yọnrọn irhi mẹ eje kugbe orhiẹn-ebro mẹ eje, ovwan mi nene ayen. Mẹvwẹ Jihova.’”