Ọrivẹ re si Rhe Ihwo ri Kọrẹnt

6 Kerẹ ihwo re vẹ Ọghẹnẹ gba wian kuẹgbe, avwanre jiriro kẹ ovwan nẹ, ovwan de rhiabọreyọ ẹse rẹ Ọghẹnẹ re muwan rọye-en nu, ovwan kpairoro vrẹ oboresorọ a vwọ reyọ kẹ ovwa-an. 2 Kidie ọ tare nẹ: “Vwẹ ọke ro vwo fo nẹ mi dje ẹroesiri kẹ wẹ, mi nyo we, vwẹ ẹdẹ rẹ usivwin, me cha wẹ uko.” Nighere! Ọnana yen ọke rẹ Ọghẹnẹ che vwo dje ẹroesiri kẹ avwanre. Nighere! Ọnana yen ẹdẹ rẹ usivwin na.

3 Avwanre dia ekprowọ kẹ ihwo vwẹ idjerhe vuọvo-o, rere e vwo jẹ oruchọ ẹmrẹ vwẹ iruo rẹ odibo egbe rẹ avwanre; 4 ẹkẹvuọvo vwẹ kidjerhe kidjerhe avwanre dje oma rẹ avwanre phia kerẹ idibo rẹ Ọghẹnẹ, womarẹ edavwini buebun rẹ avwanre chirakon rọyen, womarẹ ukpokpogho, womarẹ ọke rẹ ọkanrovwẹ, womarẹ ebẹnbẹn, 5 womarẹ ehwe, womarẹ uwodi, womarẹ ozighi, womarẹ owian ọgangan, womarẹ ovwerhẹn ẹgha, womarẹ ọke rẹ ọkanrovwẹ rẹ emu; 6 womarẹ ẹfuọn, womarẹ erianriẹn, womarẹ edirin, womarẹ uruemu esiri, womarẹ ẹwẹn ọfuanfon, womarẹ ẹguọnọ rọ vrabọ rẹ omeru, 7 womarẹ eta rẹ uyota, womarẹ ẹgba rẹ Ọghẹnẹ, womarẹ ekuakua ofovwin rẹ ọsoso vwẹ obọrhen* kugbe obohwẹre,* 8 womarẹ urinrin kugbe ophọphọvwe, womarẹ orharhe iyẹnrẹn kugbe omamọ iyẹnrẹn. E nẹ avwanre kerẹ ihwo re phiẹn ihwo, dedena avwanre ta uyota, 9 kerẹ ihwo ra riẹnre-e, dedena jẹ e vughe avwanre, kerẹ ihwo ri ghwẹ,* jẹ nighere! avwanre yerẹn, kerẹ ihwo ra vwẹ oja re, dedena jẹ a teyen avwanre hwe-e, 10 kerẹ ihwo ri muomaphiyọ, ẹkẹvuọvo avwanre ghọghọ ọkieje, kerẹ igbere, ẹkẹvuọvo avwanre nẹrhẹ ihwo buebun fe, kerẹ ihwo ri vwo emuọvo-o, dedena avwanre vwo erọnvwọn ejobi.

11 Avwanre rhiunu* rẹ avwanre ta ota kẹ ovwan, ihwo ri Kọrẹnt, avwanre ji rhie ubiudu rẹ avwanre phiyọ ghwroro. 12 Avwanre gbere ughwru phiyọ ẹguọnọ rẹ avwanre vwo kpahen ovwa-an, ẹkẹvuọvo ovwan gbere ughwru phiyọ ẹguọnọ rẹ ovwan vwo kpahen avwanre. 13 Ọtiọyena, me ta ota kẹ ovwan kerẹ emọ mẹ, ovwan ji rhie ubiudu rẹ ovwan phiyọ ghwroro.

14 Wo kuomakugbe ihwo re dia Inenikristi-i. Oyerinkugbe vọ yen ọsoso kugbe jurhi ẹyọnrọn vwori? Yẹrẹ die yen urhukpẹ vẹ ebri vwo kugbe? 15 Vwọba, oyerinkugbe vọ yen Kristi vẹ Belial* vwori? Yẹrẹ die yen ohwo rọ dia Onenikristi* vẹ ohwo rọ dia Onenikristi-i vwo kugbe? 16 Ọrhọnvwekugbe vọ yen uwevwin rẹ Ọghẹnẹ vẹ edjọ vwo kugbe? Kidie avwanre uwevwin rẹ Ọghẹnẹ ro jeghwo; kirobo rẹ Ọghẹnẹ tare: “Me cha dia ohri rayen je yan vwẹ ohri rayen. Me cha dia Ọghẹnẹ rayen, ayen ke dia ihwo mẹ.” 17 “‘Ọtiọyena, we vrẹn nẹ ohri rayen, ovwan hẹrioma rẹ ovwan nẹ ayen,’ ọtiọyen Jihova* tare, ‘ovwan gbe vwẹ obọ te orọnvwọn ro jẹfuọ-ọn’”; “‘ki mi rhiabọreyọ ovwan.’” 18 “‘Ke me cha dia ọsẹ kẹ ovwan, ovwan ke dia emeshare vẹ emetẹ mẹ,’ ọtiọyen Jihova,* Ọromevwẹgba na tare.”