Joshua
5 Ugege rẹ ivie rẹ ihwo rẹ Amọ eje rehẹ ẹbẹre ọnre shera ri Jọdan na kugbe ivie rẹ ihwo ri Kenan eje rehẹ orhoma rẹ abadi na, vwo nyo nẹ Jihova ru ame ri Jọdan na kpọ yamu vwọ kẹ ihwo rẹ Izrẹl bẹsiẹ ayen vwọ shariẹ vrẹ nu, udu de nẹ ayen awọ,* ayen rhe se fiudugberi* fikirẹ ihwo rẹ Izrẹl naa.
2 Vwẹ ọke yena Jihova da ta kẹ Joshua nẹ: “Ru ephia rẹ ukuta kẹ oma wẹn rere wọ yanvwe eshare rẹ Izrẹl na obọ rivẹ.” 3 Ọtiọyena Joshua de ru ephia rẹ ukuta, ọ da je yanvwe eshare rẹ Izrẹl na vwẹ Gibiyat-haaralọt.* 4 Ọnana yen oboresorọ Joshua vwọ yanvwe ihwo na: Eshare eje vwẹ usun rẹ ihwo ri nẹ Ijipt rhe, eshare ri tedje rẹ ofovwin* ghwuru vwevunrẹ oyan rẹ aton na ọke rẹ ayen vwo vrẹ nẹ Ijipt nu. 5 A yanvwe ihwo eje ri vrẹ nẹ Ijipt, ẹkẹvuọvo a je rhe yanvwe ihwo eje re vwiẹre vwevunrẹ oyan rẹ aton na ọke rẹ ayen vwo vrẹn nẹ Ijipt nuu. 6 Ihwo rẹ Izrẹl na yan oyan rẹ ẹgbukpe 40 vwẹ aton na bẹsiẹ ẹgborho na eje vwo ghwure, kọyen eshare ri tedje rẹ ofovwin ri nẹ Ijipt rhe ri nyupho ri Jihovaa. Jihova duvwun iyorin kẹ ayen nẹ o vwo ọke vuọvo rẹ ọyen cha vwọ rhọnvwe nẹ ayen mrẹ otọ rẹ ọyen ri Jihova duvwun iyorin kẹ esẹ rayen ride nẹ ọyen cha vwọ kẹ avwanree. Otọ rọ djẹ ọkẹre rẹ ameivie vẹ ame ọnyọn. 7 Ọtiọyena ọ da vwẹ emọ rayen vwo wene ayen. Enana yen Joshua yanvwere; kidie a je rhe yanvwe ayen vwẹ oyan na jovwoo.
8 Ọke ra vwọ yanvwe ẹgborho na ejobi nu, ayen da domaji vwẹ asan rẹ ayen wonphiyọ* na bẹsiẹ oyanvwe rayen na vwo kpo.
9 Jihova da ta kẹ Joshua nẹ: “Nonẹna, mi si ehwẹjẹ rẹ Ijipt nẹ ovwan oma.” Ọtiọyena Gilga* kọyen e se asan na rhi te ọke na.
10 Ihwo rẹ Izrẹl na jehẹ asan rẹ ayen wonphiyọ na vwẹ Gilga, ayen de ru orẹ rẹ Ọwanvrẹ na vwẹ ovwọnvwọn rẹ ẹdẹ 14 rẹ emeranvwe rẹsosuọ vwẹ aton ri Jẹriko. 11 Ayen da tuẹn ẹriọ rẹ emu rẹ otọ na phiyọ vwẹ ẹdẹ rọ vwọ kpahen ẹdẹ rẹ Ọwanvrẹ na, ayen da je re ibrẹdi ro jephuo kugbe eka ra vwọ tọn vwẹ ẹdẹ vuọvo nana. 12 Ọke rẹ ayen vwọ riemu rẹ otọ na vwẹ ẹdẹ rọ vwọ kpahọn nu, imana rhe she ọfaa; imana vuọvo rha herọ vwọ kẹ ihwo rẹ Izrẹl naa, ẹkẹvuọvo kẹ ayen tuẹn ẹriọ rẹ emu rẹ otọ ri Kenan phiyọ vwẹ ukpe yena.
13 Ọke rẹ Joshua vwo sikẹre Jẹriko re, ọ da kpare opharo, ọ da mrẹ ọshare ọvo ro mudia vwẹ obaro rọyen vẹ ọlọkọ vwẹ obọ. Joshua da yan bro ra, ọ da nọ nẹ: “Ẹbẹre avwanre yen wọ hepha gbanẹ ẹbẹre rẹ ivwighrẹn rẹ avwanre?” 14 Ọ da kpahen nẹ: “Ẹjo, ẹkẹvuọvo me rhere kerẹ onotu* rẹ otuofovwin ri Jihova.” Ọtiọyena Joshua de she bọvwọn opharo rhuotọ, ọ da riẹn totọ, ọ da nọ nẹ: “Die yen ọrovwovwe guọnọ ta kẹ odibo rọyen?” 15 Onotu rẹ otuofovwin ri Jihova da kpahen kẹ Joshua nẹ: “Ku isabato wẹn nẹ awọ wẹn kidie asan ru wo mudia na asan ọfuanfon.” Siẹvuọvo na Joshua de ru ọtiọyen.