Livitikọs
18 Jihova da rhoma ta ota kẹ Mosis, ọ da ta: 2 “Ta ota kẹ ihwo rẹ Izrẹl rere wọ vuẹ ayen nẹ, ‘Mẹvwẹ Jihova Ọghẹnẹ rẹ ovwan. 3 Ovwan ruẹ kirobo rẹ ayen ruru vwẹ otọ rẹ Ijiptii, asan rẹ ovwan diare jovwo, ovwan ruẹ oborẹ ayen ruẹ vwẹ otọ ri Kenanii, asan re me reyọ ovwan ra na. Ovwan nene ẹkuruemu rayeen. 4 Ovwan nene orhiẹn-ebro mẹ, ovwan yọnrọn irhi mẹ ji ru nene ayen. Mẹvwẹ Jihova Ọghẹnẹ rẹ ovwan. 5 Ovwan yọnrọn irhi mẹ kugbe orhiẹn-ebro mẹ; kohwo kohwo ro ru ọtiọyen cha wan oma rayen rhọ. Mẹvwẹ Jihova.
6 “‘E jẹ ohwo vuọvo vwẹ usun rẹ ovwan bru oniọvo rọyen vuọvo rọ vẹ ọyen kpẹkpẹre ra rere o nene vwerhẹẹn.* Mẹvwẹ Jihova. 7 Wẹ vẹ ọsẹ wẹn mromaa, wẹ vẹ oni wẹn je mromaa. Oni wẹn yen o ruẹ, wẹ vẹ ọyen mromaa.
8 “‘Wẹ vẹ aye rẹ ọsẹ wẹn mromaa. Ọyen ophọphọvwe vwọ kẹ ọsẹ wẹn.*
9 “‘Wẹ vẹ oniọvo wẹn ọmọtẹ mromaa, owenẹ ọ dia ọmọ rẹ ọsẹ wẹn yẹrẹ ọmọ rẹ oni wẹn, owenẹ ọ dianẹ e vwiẹrẹ vẹ owẹ vwẹ evwruwevwin vuọvo yẹrẹ e vwiẹrẹ vwẹ otafe.
10 “‘Wẹ vẹ ọmọtẹ rẹ ọmọ wẹn rẹ ọmọshare vwiẹre yẹrẹ ọmọtẹ rẹ ọmọ wẹn rẹ ọmọtẹ vwiẹre mromaa, kidie ayen ẹban romobọ wẹn.
11 “‘Wẹ vẹ ọmọtẹ rẹ aye rẹ ọsẹ wẹn vwiẹre rọ dia ọmọ rẹ ọsẹ wẹn mromaa, kidie ọyen oniọvo wẹn rẹ ọmọtẹ.
12 “‘Wẹ vẹ oniọvo rẹ ọsẹ wẹn rẹ ọmọtẹ mromaa. Ọyen oniọvo evun rẹ ọsẹ wẹn.
13 “‘Wẹ vẹ oniọvo rẹ oni wẹn rẹ ọmọtẹ mromaa, kidie ọyen oniọvo evun rẹ oni wẹn.
14 “‘Wọ phọphọ oniọvo rẹ ọsẹ wẹn rẹ ọshare womarẹ wẹ vẹ aye rọyen vwọ mromaa. Ọyen ohwo rẹ orua wẹn.
15 “‘Wẹ vẹ aye rẹ ọmọ wẹn mromaa. Ọyen aye rẹ ọmọ wẹn, wẹ vẹ ọyen mromaa.
16 “‘Wẹ vẹ aye rẹ oniọvo wẹn mromaa, kidie ọyen emu rẹ ophọphọvwe vwọ kẹ oniọvo wẹn.*
17 “‘Wẹ vẹ aye kugbe ọmọ rọyen rẹ ọmọtẹ mromaa. Wọ reyọ ọmọtẹ rẹ ọmọ rọyen rẹ ọmọshare vwiẹre yẹrẹ ọmọtẹ rẹ ọmọ rọyen rẹ ọmọtẹ vwiẹre rere wẹ vẹ ọyen mromaa. Ayen iniọvo re vẹ ọyen kpẹkpẹre; ọyen uruemu ra ghẹmrẹ.*
18 “‘Wọ reyọ oniọvo rẹ aye wẹn vwo ruẹ aye rivẹ rere wẹ vẹ ọyen mroma jẹ oniọvo rọyen jehẹ akpọọ.
19 “‘Wo brẹ aye ra vwẹ ọke ri jẹfuọn rẹ afe rọyen rere wẹ vẹ ọyen mromaa.
20 “‘Wẹ vẹ aye rẹ ọrivẹ wẹn mromaa rere wọ dia ẹdia ri jẹfuọọn.
21 “‘Wo jẹ a vwẹ ọmọ wẹn vuọvo vwo ze izobo* kẹ Molẹkii. Wo gbe odẹ rẹ Ọghẹnẹ wẹn kuẹ vwẹ idjerhe tiọyenaa. Mẹvwẹ Jihova.
22 “‘Wo nene ọshare vwerhẹn vwẹ idjerhe vuọvo ru wo nene aye vwerhẹẹn. Ọyen emu rẹ ẹgua.
23 “‘E jẹ ọshare nene eranvwe vwerhẹn rere ọ vwọ dia ẹdia ri jẹfuọn fiki rọyeen; yẹrẹ aye vwẹ oma rọyen kpahotọ vwọ kẹ eranvwe rere ọ vẹ ọyen vwerhẹẹn. Ọyen emu rọ vwọso obo ri shephiyọ.
24 “‘Ovwan vwẹ ọvo vwẹ usun rẹ erọnvwọn nana vwo gbe oma rẹ ovwan ẹguaa, kidie erọnvwọn nana eje yen ẹgborho re me djẹ nẹ obaro rẹ ovwan na vwo gbe oma rayen ẹgua. 25 Ọtiọyena otọ na fonroo, me cha vwẹ oja vwọ riọ fikirẹ oruchọ rọyen, otọ na kọ cha kpa ihwo re dia evun rọyen kufia. 26 Ẹkẹvuọvo ovwan komobọ me yọnrọn irhi mẹ kugbe orhiẹn-ebro mẹ, ovwan ruẹ ọvuọvo vwẹ usun rẹ erọnvwọn rẹ ẹgua nanaa, owenẹ ọ dia ọmotọ yẹrẹ ọrhorha rọ dia ohri rẹ ovwan. 27 Kidie erọnvwọn rẹ ẹgua nana eje yen ihwo re dia otọ na jovwo tavwen ovwan ke rhe na ji ru, asaọkiephana otọ na rha foon. 28 Ọtiọyena otọ na rha cha kpa ovwan kufia kidie nẹ ovwan gbere ẹgua vwẹ idjerhe vuọvo rọ cha vwọ kpa ẹgborho re herọ tavwen ovwan ke rhe na kufiaa. 29 Kohwo kohwo ro ru ọvo vwẹ usun rẹ erọnvwọn rẹ ẹgua nana, ke bru ohwo na nẹ ohri rẹ ihwo rọyen. 30 Ovwan mi ru nene ive rẹ ovwan ve kẹ vwẹ, womarẹ ovwan vwo jẹ ọvo vwẹ usun rẹ ẹkuruemu rẹ ẹgua re ruru tavwen ovwan ke rhe na eruo, rere ovwan vwo jẹ oma rẹ ovwan egbe ẹgua wan oma rayen. Mẹvwẹ Jihova Ọghẹnẹ rẹ ovwan.’”