Jẹnẹsis
12 Jihova da ta kẹ Ebram: “Vrẹn nẹ otọ wẹn kugbe ohri rẹ ihwo rẹ orua wẹn kugbe uwevwin rẹ ọsẹ wẹn rere wo kpo otọ ri mi che dje kẹ wẹ na. 2 Mi che ru we phiyọ ẹgborho rode, mi che bruba kẹ wẹ, mi che ru odẹ wẹn rho, ku wọ cha dia ebruphiyọ. 3 Mi che bruba kẹ ihwo ri bruba kẹ wẹ, ke me cha hanrhe ihwo ri duvwun iyorin kẹ wẹ, wan oma wẹn kọyen erua na eje rehẹ otọ na che vwo vwo ebruphiyọ.”*
4 Ọtiọyena Ebram da yanran kirobo rẹ Jihova vuẹrẹ, Lọt de ji nene. Ebram hẹ ẹgbukpe 75 ọke ro vwo vrẹn nẹ Heran. 5 Ebram da reyọ aye rọyen Serai kugbe Lọt rọ dia ọmọ rẹ oniọvo rọyen vẹ erọnvwọn eje rẹ ayen kokori kugbe idibo* re vẹ ayen gba herọ vwẹ Heran, ayen da ro idjerhe rẹ ayen vwo kpo otọ ri Kenan. Ọke rẹ ayen vwo te otọ ri Kenan, 6 Ebram da yan otọ na rhirin re te ekogho ri Shikẹm, rọ kẹrẹ irhe ride ri Morẹ. Ọke yena jẹ ihwo ri Kenan hẹ otọ na. 7 Jihova da vwomaphia kẹ Ebram, ọ da ta: “Me cha vwẹ otọ nana kẹ emọ* wẹn.” Ọtiọyena ọ da so agbada vwẹ etiyin kẹ Jihova rọ vwomaphia kẹ na. 8 Ọke vwọ yanran o de vrẹn nẹ etiyin, o de kpo ekogho rẹ igbenu na vwẹ ẹbẹre ọnre va nẹcha ri Bẹtẹl, o de chiyin utughẹ rọyen phiyọ etiyin, Bẹtẹl hẹ ẹbẹre ọnre shera rẹ asan na, Ai hẹ ẹbẹre ọnre va nẹcha rọyen. Ọ da so agbada ọvo kẹ Jihova vwẹ etiyin, kẹ o se odẹ ri Jihova. 9 Ọke vwọ yan obaro, Ebram de vrẹn nẹ etiyin, o de mu oyan phiyọ kpo ẹbẹre rẹ Nẹgẹb hepha, ko nẹ asan ọvo vwo kpo ọfa.
10 Asaọkiephana owẹnvwe de fi vwẹ otọ na, Ebram de mu oyan phiyọ kpo Ijipt ra dia vwẹ ọmọke* kidie owẹnvwe na ganre mamọ vwẹ otọ na. 11 Ọ cha vwọ ro Ijipt, ọ da ta kẹ aye rọyen Serai: “Biko kerhọ mẹ! Me riẹnre nẹ wẹwẹ aye vẹ erhuvwu. 12 Ọtiọyena ọke rẹ ihwo rẹ Ijipt da mrẹ wẹ, kẹ ayen cha tanẹ, ‘Ọnana aye rọyen.’ Kẹ ayen cha teyen ovwẹ hwe ẹkẹvuọvo ayen me yanjẹ uwe vwo. 13 Biko tanẹ wẹwẹ oniọvo mẹ, rere o vwo yovwin kẹ vwẹ fiki wẹn, rere e vwo juvwe ehwe.”*
14 Ugege rẹ Ebram ghwa vwọ ro Ijipt, ihwo rẹ Ijipt de noso nẹ aye na vwo erhuvwu mamọ. 15 Ihwo ride rehẹ uwevwin ri Fero da mrẹ, kẹ ayen jiro vwọ kẹ Fero, ọtiọyena a da reyọ aye na kpo uwevwin ri Fero. 16 Ọ da riẹn Ebram ru fikirẹ Serai, o de rhi vwo igodẹ, erhuẹn, ekẹkẹtẹ rẹ eshare vẹ e rẹ eya, idibo eshare vẹ e rẹ eya, kugbe ikamẹl. 17 Jihova da vwẹ etiekọ egangan vwọ ghwiẹ Fero vẹ evwruwevwin rọyen fikirẹ Serai, aye rẹ Ebram. 18 Ọtiọyena Fero de se Ebram, ọ da ta: “Ọnana die yen wo ru vwe na? Diesorọ wọ rha vuẹ vwẹ nẹ aye wẹẹn? 19 Diesorọ wọ vwọ tanẹ, ‘Oniọvo mẹ,’ re me vwọ joma reyọ vwo ru aye mẹ? Aye wẹn na. Reyọ wọ yanran!” 20 Ọtiọyena Fero da vwẹ iji kẹ ihwo rọyen kpahọn, ayen de suon vẹ aye rọyen kugbe erọnvwọn ejobi ro vwori yanran.