Ẹyano

30 “Wo mi ru agbada ọvo ra da cha torhẹ insẹnsi; wọ me vwẹ urhe rẹ akesha vwo ruo. 2 Ẹbẹre ẹne rọyen me dia abavo, ugrongron rọyen me dia kubit ọvo,* ohẹhẹre rọyen kubit ọvo, o mi rhe kpenu te kubit ivẹ. E mi ruo vẹ idjo rọyen kugbe. 3 Wọ me vwẹ uvi rẹ oro vwọ pharọ: obenu rọyen, orhoma rọyen riariẹ, kugbe idjo rọyen; wọ me ma oro vwo bru ona phiyọ igogo ẹne rẹ obenu rọyen riariẹ. 4 Wọ me je vwẹ oro vwo ru isa ivẹ phiyọ ẹbẹre ivẹ ri hirharoku ohwohwo vwẹ obotọ rẹ ona ru wo bru phiyọ riariẹ na, enana keyen a cha chọrọ ekpọ re che vwo muo na phiyọ. 5 Vwẹ urhe rẹ akesha vwo ru ekpọ na rere wọ vwẹ oro vwọ phare ayen. 6 Wo mi muo phiyọ obaro rẹ ikọtini rọ kẹrẹ ekpeti rẹ Oseri na, vwẹ obaro rẹ urhurho re vwo rhurhu Oseri na, vwẹ asan re me da cha vwomaphia kẹ wẹ na.

7 “Erọn cha torhẹ insẹnsi ro gbon phanphanphan vwẹ enu rọyen, ọ me nẹrhẹ o bru ivwirhi vwẹ enu rẹ agbada na ọke ro de muegbe rẹ irhukpẹ na kurhiọke kurhiọke. 8 Vwọba, ọke rẹ Erọn da vwẹ irhukpẹ na vwo mu vwẹ ovwọnvwọn,* kọ cha torhẹ insẹnsi na. Ọyen izobo rẹ insẹnsi rẹ ọkieje vwẹ obaro ri Jihova vwẹ uvwiẹ rẹ ovwan eje. 9 Wọ torhẹ insẹnsi ra rhọnvwephiyọọ, yẹrẹ ze izobo rẹ ẹtorhẹ yẹrẹ izobo rẹ eka vwọọ, wo ji kuẹ izobo rẹ udi kuoo. 10 Erọn mi ru arhuẹrẹ vwẹ idjo rọyen obọ ọvo ẹgbukpe. Ọ me reyọ evo vwẹ usun rẹ ọbara rẹ izobo rẹ umwemwu rẹ arhuẹrẹ na vwo ru arhuẹrẹ kẹ obọ ọvo ẹgbukpe vwẹ uvwiẹ rẹ ovwan eje. Ọyen obo re ma fon kẹ Jihova.”

11 Ọyena vwọ wan nu, Jihova da ta kẹ Mosis: 12 “Kọke kọke ru wo de kere emọ rẹ Izrẹl, ayen ọvuọvo me tan arhọ* rọyen mie Jihova vwẹ ọke rẹ ikekeri na. Ayen che ru ọtiọyen rere ọtiekọ vuọvo vwo jẹ ayen ebro cha vwẹ ọke re de kere ayen na. 13 Ọnana yen oborẹ ihwo eje re kereri na cha vwọ kpahotọ: ubro ri shẹkẹl* vwo nene uwan ri shẹkẹl rẹ asan ọfuanfon na.* Igira* uje vẹ shẹkẹl ọvo abavo. Ubro ri shẹkẹl yen utoro ra cha vwọ kẹ Jihova. 14 Kohwo kohwo re kereri ro te ẹgbukpe 20 kpenu cha vwẹ utoro ri Jihova vwọ kpahotọ. 15 Owenẹ ọ dia ọdafe yẹrẹ ogbere, ubro ri shẹkẹl* yen ọ cha vwọ kpahotọ kerẹ utoro vwọ kẹ Jihova vwọ tan arhọ* rọyen hirhe. 16 Wọ me reyọ igho rẹ idọnọ efuanfon rẹ arhuẹrẹ na mie ihwo rẹ Izrẹl, rere wọ vwọ kpahotọ fikirẹ ẹga rẹ utughẹ ra da vwoma na, rọ vwọ dia kerẹ ẹkarophiyọ vwẹ obaro ri Jihova vwọ kẹ ihwo rẹ Izrẹl, rọ vwọ tan arhọ* rẹ ovwan hirhe.”

17 Jihova da rhoma ta kẹ Mosis: 18 “Vwẹ ẹrovwo vwo ru oze vẹ awọ rọyen; wo muo phiyọ uvwre rẹ utughẹ ra da vwoma na kugbe agbada na rere wo ku ame phiyọ. 19 Erọn vẹ emeshare rọyen cha hworhẹ abọ vẹ awọ rayen vwẹ etiyin. 20 Ọke rẹ ayen de kpo evunrẹ utughẹ ra da vwoma na yẹrẹ ayen de kpo asan agbada na re gbodibo ji ze izobo rẹ erhanre vẹ ivwirhi kẹ Jihova, ayen me vwẹ ame vwọ hworhẹ oma rayen rere ayen vwo jeghwo. 21 Ayen me hworhẹ abọ vẹ awọ rayen rere ayen vwo jeghwo, ọ me dia kerẹ urhi ri bẹdẹ vwọ kẹ ayen, vwọ kẹ Erọn vẹ emọ rọyen vwẹ uvwiẹ rayen eje.”

22 Jihova da rhoma ta kẹ Mosis: 23 “Reyọ ishani ri me yovwin: shẹkẹl 500 rẹ imai ro djeri, kugbe ubro rẹ ọyena, shẹkẹl 250 rẹ isinamọni rọ miẹmiẹ, shẹkẹl 250 rẹ ikalamọs rọ miẹmiẹ, 24 kugbe shẹkẹl 500 ri kashia ra vwanvwere vwo nene uwan ri shẹkẹl rẹ asan ọfuanfon na,* e vẹ ovwanvwọ ri hin* rẹ evwri rẹ oliv. 25 Wọ me reyọ vwo ru evwri rẹ ẹjẹreyọ ọfuanfon; ọ me dia obo ra vwẹ ona vwo ku kugbe. Kọ cha dia evwri rẹ ẹjẹreyọ ọfuanfon.

26 “Wo mi vwo ghworo utughẹ ra da vwoma na kugbe ekpeti rẹ Oseri na, 27 ọtiọyen ji te imẹjẹ na vẹ ekuakua rọyen eje, ogburhukpẹ na vẹ ekuakua rọyen, agbada rẹ insẹnsi na, 28 agbada rẹ izobo rẹ ẹtorhẹ na vẹ ekuakua rọyen eje, kugbe oze na vẹ awọ rọyen. 29 Wo mi ru ayen fon rere ayen dia obo re ma fon. Kohwo kohwo ro djobọte ayen kọ fon. 30 Wo mi ku evwri ku Erọn vẹ emeshare rọyen ji ru ayen fon rere ayen ga kerẹ irherẹn kẹ vwẹ.

31 “Wọ me ta kẹ ihwo rẹ Izrẹl nẹ, ‘Ọnana me dia evwri rẹ ẹjẹreyọ ọfuanfon vwọ kẹ vwẹ vwẹ uvwiẹ rẹ ovwan eje. 32 A reyọ vwo te ugboma rẹ ohworakpọọ, e ji ruẹ evwri vuọvo rọ họherọọ. Ọyen orọnvwọn ọfuanfon. Ọ me dia orọnvwọn ọfuanfon kẹ ovwan ọkieje. 33 Kohwo kohwo ro ru ori rọ họherọ, ọ da vwẹ evo vwẹ usun rọyen vwo te ohwo ra rhọnvwe kẹẹ,* ke bro* nẹ ohri rẹ ihwo rọyen.’”

34 Ọyena vwọ wan nu, Jihova da ta kẹ Mosis: “Reyọ ovwanvwọ rẹ abavo rẹ ishani nana: ame rẹ urhe ri stakti, ọnika, galbanọm ro gbon phanphanphan, kugbe uvi rẹ ifrankisẹnsi. 35 Reyọ ayen vwo ru insẹnsi; wọ me vwẹ ona vwo ku erọnvwọn nana ri gbon phanphanphan na kugbe, tue ughwanka phiyọ, wọ vwẹ orọnvwọn ọfa baa, ọ me dia fuanfon. 36 Wo mi duvwun evo vwẹ usun rọyen vworovworo, wo mi phi evo vwẹ usun rọyen phiyọ obaro rẹ Oseri na rọhẹ utughẹ ra da vwoma na, asan re me da cha vwomaphia kẹ wẹ na. Ọ me dia obo re ma fon kẹ ovwan. 37 Ovwan ruẹ insẹnsi ra vwẹ erọnvwọn nana ru vwọ kẹ oma rẹ ovwaan. Ovwan mi no kerẹ orọnvwọn rọ pha fuanfon vwọ kẹ Jihova. 38 Kohwo kohwo ro ru ọkpọ rọyen rọ vwọ riavwerhen rẹ ọnrhe rọyen, ke bro* nẹ ohri rẹ ihwo rọyen.”