Ọrẹsosuọ re si Rhe Ihwo ri Tẹsalonaika

5 Iniọvo, vwọ kpahen ọke kugbe ẹdẹ rẹ Ọghẹnẹ bruphiyọ na, o rhe fo e vwo si emu vuọvo rhe ovwa-an. 2 Kidie ovwan komobọ nabọ riẹn nẹ ẹdẹ ri Jihova* cha rhe kerẹ oji vwẹ ason. 3 Ọke rẹ ayen da tanẹ, “Ufuoma kugbe ofuvwegbe!” siẹvuọvo na, oghwọrọ mi rhi she teyen ayen kpregede, kerẹ evun rẹ uvwiẹ rọ miavwa aye rọ mrevun, ayen cha sa djẹ vabọ-ọ. 4 Ẹkẹvuọvo iniọvo, ovwan hẹ evunrẹ ebri-i, rẹ ẹdẹ na vwọ ro ovwan ọrhan kirobo rẹ elo rẹ urhiọke rua iji ọrha-an, 5 kidie ovwan eje emọ rẹ urhukpẹ kugbe emọ rẹ aruphẹn. Avwanre dia e rẹ ason yẹrẹ e rẹ ebri-i.

6 Ọtiọyena, e jẹ avwanre vwerhẹn kirobo rẹ ihwo ri chekọ na ruẹ-ẹ, ẹkẹvuọvo e jẹ avwanre rhẹrẹ ọkieje je sẹro rẹ iroro rẹ avwanre. 7 Kidie ihwo re vwerhẹn, vwerhẹn vwẹ ason, ihwo re da udi vroma, ruẹ ọtiọyen vwẹ ason. 8 Ẹkẹvuọvo vwọ kẹ avwanre re dia e rẹ aruphẹn na, e jẹ avwanre sẹro rẹ iroro rẹ avwanre ọkieje, rere avwanre ku ophapha rẹ udu rẹ esegbuyota kugbe ẹguọnọ phiyọ kugbe iphiẹrophiyọ rẹ usivwin kerẹ erhu ọgangan, 9 kidie ọ dia Ọghẹnẹ vwẹ avwanre vwo mu vwọ kẹ ophu-u, ẹkẹvuọvo rere avwanre vwo vwo usivwin womarẹ Ọrovwavwanre Jesu Kristi. 10 O ghwu kẹ avwanre rere owenẹ avwanre rhẹrẹ ọkieje yẹrẹ avwanre vwerhẹn,* avwanre vẹ ọyen sa vwọ dia kugbe. 11 Ọtiọyena, ovwan rhe phiuduphiyọ ohwohwo awọ* je bọn ohwohwo gan kirobo rẹ ovwan ghini ruẹ enẹna.

12 Asaọkiephana iniọvo, avwanre rẹ ovwan nẹ ovwan muọghọ vwọ kẹ ihwo re wian gangan vwẹ ohri rẹ ovwan, re vwẹrote ovwan vwevunrẹ Ọrovwori na, ji bru ovwan uche; 13 ovwan muọghọ rẹ oghẹresan kẹ ayen vwọrẹ ẹguọnọ fikirẹ iruo rẹ ayen ruẹ. Ovwan nene ohwohwo yerinkugbe vwọrẹ ufuoma. 14 Vwọba, avwanre rẹ ovwan iniọvo, nẹ ovwan vwẹ orhọesio* kẹ ihwo ri jẹ ọrhuẹrẹphiyotọ enene, ovwan vwẹ uchebro kẹ ihwo rẹ udu rayen kuọrọnre,* ovwan bicha otu re vwiẹrẹre, ovwan vwo edirin rẹ ihwo ejobi. 15 Ovwan vwo imuẹro nẹ ohwo vuọvo vwẹ umwemwu vwọ hwosa rẹ umwemwu kẹ ohwo ọfa-a, ẹkẹvuọvo ovwan vwẹ ọkieje vwo ru erhuvwu kẹ ohwohwo kugbe ihwo ejobi.

16 Ovwan ghọghọ ọkieje. 17 Ovwan nẹrhovwo ọkieje. 18 Ovwan kpẹvwẹ Ọghẹnẹ vwọ kẹ erọnvwọn ejobi. Ọnana yen ọhọre rẹ Ọghẹnẹ vwọ kẹ ovwan vwevunrẹ Kristi Jesu. 19 Ovwan fun erhanre rẹ ẹwẹn na-a. 20 Ovwan vwẹ ẹro ri sakamu* vwo nẹ aroẹmrẹ-ẹ. 21 Ovwan vwo imuẹro rẹ erọnvwọn ejobi; ovwan yọnrọn obo ri yovwirin kokoroko. 22 Ovwan kẹnoma kẹ koka koka rẹ umwemwu.

23 E jẹ Ọghẹnẹ rẹ ufuoma na komobọ ru ovwan fon karekare. E jẹ ẹwẹn kugbe erhi* kugbe ugboma rẹ ovwan rọ pha gbagba vwẹ kidjerhe kidjerhe na iniọvo, dia ẹdia ri jẹ ekan evwo vwẹ ọke rẹ ọrhire* rẹ Ọrovwavwanre Jesu Kristi. 24 Ohwo ro se ovwan na fuevun, o che ghini ru erọnvwọn nana.

25 Iniọvo, ovwan rha nẹrhovwo kẹ avwanre.

26 Ovwan yeren iniọvo na ejobi vẹ unuẹfiọnfiọn ọfuanfon.

27 Me vwẹ odẹ rẹ Ọrovwori na vwọ rẹ ovwan nẹ ovwan se ọbe nana kẹ iniọvo na ejobi.

28 E jẹ ẹse re muwan rọye-en rẹ Ọrovwavwanre Jesu Kristi nene ovwan dia.