Ukeri
23 Ọtiọyena Belam da ta kẹ Belak: “So egbada ighwrẹn phiyọ etinẹ na rere wo muegbe rẹ erhuẹn ighwrẹn kugbe egbon ighwrẹn vwọ kẹ vwẹ.” 2 Belak de ghwe ru kirobo rẹ Belam tare na. Belak vẹ Belam da vwẹ erhuẹn ọvo vẹ egbon ọvo vwo ze izobo vwẹ enu rẹ agbada na ọvuọvo. 3 Belam da ta kẹ Belak: “Mudia etinẹ kẹrẹ izobo rẹ ẹtorhẹ wẹn rere me yanran. Ọkiọvo Jihova cha ta ota kẹ vwẹ. Obo rọ vuẹ vwẹ eje, me cha vuẹ wẹ.” Ọtiọyena ọ da yanran kpo ugbenu otete ọvo rẹ odin hephaa.
4 Ọghẹnẹ da ta ota kẹ Belam, Belam da kpahen kẹ: “Me so egbada ighwrẹn, me da vwẹ erhuẹn ọvo vẹ egbon ọvo vwo ze izobo vwẹ enu rẹ agbada na ọvuọvo.” 5 Jihova de phi ota nana phiyọ unu ri Belam: “Rhivwin bru Belak ra, ọnana yen oborẹ wọ cha vuẹ.” 6 Ọtiọyena o de rhivwin, ọ da mrẹ nẹ Belak vẹ isun ri Moab mudia kẹrẹ izobo rẹ ẹtorhẹ rọyen. 7 O de bru isẹ nana:
“Belak ovie ri Moab reyọ ovwẹ nẹ Eram rhe,
Vwo nẹ igbenu rehẹ ẹbẹre ọnre va nẹcha na rhe:
‘Yanrhe rhi duvwun iyorin kẹ Jekọp kẹ vwẹ.
E, yanrhe rhe hanrhe Izrẹl.’
8 Mavọ mi se vwo duvwun iyorin kẹ ihwo rẹ Ọghẹnẹ duvwun iyorin kẹẹ?
Mavọ me sa vwọ hanrhe ihwo rẹ Jihova hanrheree?
9 Vwẹ enu rẹ eragha na me da kparo mrẹ ayen,
Vwẹ enu rẹ igbenu itete na me da kparo mrẹ ayen.
Kerẹ ihwo, ayen ọvo yen dia etiyin;
Ayen kere oma rayen ba ẹgborho ri chekọ naa.
10 Ono yen se kere ibiekpẹn ri Jekọp
Yẹrẹ tobọ kere ẹkẹn ọvo rẹ ẹkẹn ẹne rẹ Izrẹl?
E ji mi* ghwu ughwu rẹ ọvwata,
E jẹ oba mẹ dia kerẹ ọrayen.”
11 Belak da ta kẹ Belam: “Die yen wo ru vwe na? Me reyọ owẹ rhe nẹ wo rhi duvwun iyorin kẹ ivwighrẹn mẹ, ẹkẹvuọvo ku wọ rhoma bruba kẹ ayen.” 12 Ọ da kpahen: “Ọ dia oborẹ Jihova phi phiyọ unu mẹ yen me cha ta?”
13 Belak da ta kẹ: “Biko nene uvwe kpo asan ọfa ru wọ da sa mrẹ ayen. Ẹbẹre ọvo rayen ọvo yen wọ cha mrẹ; wọ cha mrẹ ayen ejee. Duvwun iyorin kẹ ayen kẹ vwẹ vwẹ etiyin.” 14 Ọtiọyena ọ da reyọ kpo udju ri Zofim, vwo kpo obenu ri Pisga, ọ da so agbada ighwrẹn je reyọ erhuẹn ọvo vẹ egbon ọvo vwo ze izobo vwẹ enu rẹ agbada na ọvuọvo. 15 Belam da ta kẹ Belak: “Mudia etinẹ kẹrẹ izobo rẹ ẹtorhẹ wẹn rere mi re nene ta ota vwẹ oboyin.” 16 Jihova da ta ota kẹ Belam, o de phi ota nana phiyọ unu rọyen: “Rhivwin bru Belak ra, ọnana yen oborẹ wọ cha vuẹ.” 17 Ọtiọyena o de bro ra, ọ da mrẹ nẹ ọ hẹrhẹ vwẹ asan rẹ izobo rẹ ẹtorhẹ rọyen hepha, jẹ isun ri Moab na vẹ ọyen herọ. Belak da nọ: “Die yen Jihova tare?” 18 O de bru isẹ nana:
“Vrẹn Belak, rere wọ kerhọ.
Nyo vwe, E ọmọ ri Zipọ.
19 Ọghẹnẹ dia ohworakpọ ghevweghe ro guẹn efiaan,
Yẹrẹ kẹ ọmọ rẹ ohworakpọ ro wene ẹwẹn rọyeen.*
Ọke rọ da ta ota kpahen orọnvwọn, o rhe ruo?
Ọke rọ da ta ota, o rhe ruo gba?
20 Nighere! A reyọ ovwẹ rhe rhi bruba kẹ;
Asaọkiephana O bruba kẹ ayen re, me cha sa rhaan.
21 Ọ vwẹ uphẹn kẹ ẹgba rẹ imajiki vuọvo nẹ ọ vwọso Jekọpuu,
O je vwẹ uphẹn kẹ okpetu vuọvo nẹ ọ vwọso Izrẹẹl.
Jihova Ọghẹnẹ rọyen vẹ ayen herọ,
E ji tito mamọ kerẹ ovie vwẹ ohri rayen.
22 Ọghẹnẹ reyọ ayen nẹ Ijipt cha.
Ọ pha kerẹ idjo rẹ erhuẹn rẹ aghwa vwọ kẹ ayen.
23 Kidie o vwo ephaẹbọ rẹ okpetu vuọvo rọ vwọso Jekọpuu,
Yẹrẹ ephaẹbọ vuọvo rọ vwọso Izrẹẹl.
Vwẹ ọke nana ka sa ta kpahen Jekọp vẹ Izrẹl:
‘Ni oborẹ Ọghẹnẹ ruru!’
24 Enana ihwo ri che vrẹn mudia kerẹ okpohrokpo,
Kerẹ okpohrokpo, ọyen ọvo cha kpare oma rọyen vrẹn.
O che sherhẹẹn bẹsiẹ rọ vwọ mrẹ obo ro che hwe re
Je da ọbara rẹ i re hweri.”
25 Ọtiọyena Belak da ta kẹ Belam: “Ọ da dianẹ wo che se duvwun iyorin kẹẹ, wo rhe ji brẹba kẹẹ.” 26 Belam da kpahen kẹ Belak: “Me vuẹ wẹ jovwo nẹ, ‘Oborẹ Jihova tare eje yen mi che ru’?”
27 Belak da ta kẹ Belam: “Biko yanrhe rere me reyọ owẹ kpo asan ọfa. Ọkiọvo o che shephiyọ vwẹ ẹro rẹ Ọghẹnẹ rẹ uyota na ru wo vwo duvwun iyorin kẹ vwọ kẹ vwẹ vwẹ etiyin.” 28 Ọtiọyena Belak da reyọ Belam kpo enu ri Piọ, rọ dia asan ra da kparo mrẹ Jẹshaimọn.* 29 Belam da ta kẹ Belak: “So egbada ighwrẹn phiyọ etinẹ na rere wo muegbe rẹ erhuẹn ighwrẹn kugbe egbon ighwrẹn vwọ kẹ vwẹ.” 30 Belak de ghwe ru kirobo rẹ Belam tare, ọ da vwẹ erhuẹn ọvo vẹ egbon ọvo vwo ze izobo vwẹ enu rẹ agbada na ọvuọvo.