Luk

15 Asaọkiephana ihwo ri phi osa uyovwin kugbe irumwemwu na eje ke riariẹ phiyọ rere ayen se vwo nyo ota rọyen. 2 Ihwo ri Farisi na kugbe isiẹbe na ke ta kẹ ohwohwo nẹ: “Ọshare nana rhiabọreyọ irumwemwu ji nene ayen riemu.” 3 O de ru udje nana kẹ ayen, rọ vwọ tanẹ: 4 “Ọshare vọ vwẹ usun rẹ ovwan na ro vwo igodẹ 100 rẹ ọvo rayen de ghwru, ro che jẹ 99 na ẹyan jovwo vwevunrẹ aton na, rọ da yanran ra guọnọ ọvuọvo ro ghwruru na bẹsiẹ rọ vwọ mrẹ? 5 Ọke rọ da mrẹ, ko muo phiyọ igabọ rọyen, ọ me ghọghọ. 6 Ọke ro de te uwevwin, ko se igbeyan rọyen kugbe ihwo re dia kẹrẹ koko, ọ me ta kẹ ayen nẹ, ‘Ovwan nene uvwe ghọghọ, kidie me mrẹ ogodẹ mẹ ro ghwruru na re.’ 7 Me ta kẹ ovwan nẹ, vwẹ idjerhe vuọvo na, aghọghọ cha dia vwẹ obodjuvwu fikirẹ orumwemwu ọvo ro kurhẹriẹ vwọ vrẹ evwata 99 re guọnọ okurhẹriẹ-ẹ.

8 “Yẹrẹ aye vọ yen vwo igho ri drakma* ihwe, rẹ ọvo vwẹ usun ri drakma* na de ghwru, ro che jẹ urhukpẹ evwo muẹ, ro de hwerhe uwevwin rọyen je nabọ guọnọ bẹsiẹ rọ vwọ mrẹ? 9 Ọke rọ da mrẹ re, ko se igbeyan rọyen* kugbe ihwo re dia kẹrẹ, ọ me tanẹ, ‘Ovwan nene uvwe ghọghọ, kidie me mrẹ igho ri drakma* mẹ ro ghwruru na re.’ 10 Vwẹ idjerhe vuọvo na, me ta kẹ ovwan nẹ, aghọghọ dia vwẹ ohri rẹ emekashe rẹ Ọghẹnẹ fikirẹ orumwemwu ọvo ro kurhẹriẹ.”

11 Ọyena vwọ wan nu, ọ da tanẹ: “Ọshare ọvo vwo emeshare ivẹ. 12 Ọ rẹ otete na da ta kẹ ọsẹ rọyen nẹ, ‘Ọsẹ, kẹ vwẹ ẹkẹn rẹ ekuakua wẹn ro fori nẹ e dia emẹ.’ Ọtiọyena ọ da ghare ekuakua rọyen kẹ ayen. 13 Ẹdẹ evo vwọ wan nu, ọ rẹ otete na de koko erọnvwọn rọyen eje, o de mu oyan phiyọ kpo ẹkuotọ ọvo ro sheri mamọ, oboyin kọyen ọ da rhaphiẹ* ekuakua rọyen eje kufia womarẹ akpọ ri fanrhiẹ fanrhiẹ ro yerin. 14 Ọke rọ vwọ ghwọrọ ejobi nu, owẹnvwe ọgangan de fi vwẹ ẹkuotọ yena eje, ọ da rhe dia ẹdia rẹ ọkanrovwẹ. 15 Ọ tobọ ra vwomaba ọvo vwẹ usun rẹ emotọ rẹ ẹkuotọ na, ohwo na de jo kpo aghwa rọyen nẹ ọ ra vwẹrote isi. 16 O vwo urhurusivwe rọ vwọ re emu rẹ isi na ria,* ẹkẹvuọvo o vwo ohwo vuọvo rọ kẹ orọnvwọn vuọvo-o.

17 “Ọke rẹ ọhọ rọyen vwo rhivwin bro rhe, ọ da tanẹ, ‘Ihwo buebun rẹ ọsẹ mẹ reyọ phiyọ iruo mrẹ ibrẹdi ria chekọ, jẹ owẹnvwe hwe vwe ghwẹ vwẹ etinẹ! 18 Mi che vrẹn rere mi bru ọsẹ mẹ ra, me ta kẹ nẹ: “Ọsẹ, mi ru umwemwu vwọso odjuvwu, je vwọso owẹ. 19 Mi rhe fo ohwo ru wo se ọmọ wẹ-ẹn. Reyọ ovwẹ vwo ru ọvo vwẹ usun rẹ ihwo ru wọ reyọ phiyọ iruo.”’ 20 Ọtiọyena o de vrẹn, o de bru ọsẹ rọyen ra. Ọke rọ je vwọ hẹ ugboko, ọsẹ rọyen da kparo mrẹ, aro rọyen da dọn, ọ da djẹ yanran, ọ da gbanọ, ọ da fiọnfiọn vwọrẹ ẹguọnọ. 21 Ọmọ na da ta kẹ nẹ, ‘Ọsẹ, mi ru umwemwu vwọso odjuvwu, je vwọso owẹ. Mi rhe fo ohwo ru wo se ọmọ wẹ-ẹn.’ 22 Ẹkẹvuọvo ọsẹ na da ta kẹ idibo rọyen nẹ, ‘Kpakpata! ovwan reyọ ewun ogrongron rhe, ọ ro me yovwin, ovwan kuo phiyọ, ovwan phi ubiosa phiyọ obọ rọyen, ji ku isabato phiyọ awọ rọyen. 23 Ovwan je reyọ ọmọ rẹ erhuẹn rọ pha tubie tubie na rhe, ovwan hwe, rere avwanre re, je ghọghọ, 24 kidie ọmọ mẹ nana ghwuru jovwo, ẹkẹvuọvo ọ rhoma rhe akpọ re; o ghwruru jovwo, a mrẹrẹ re.’ Kẹ ayen riakpọ kuoma.

25 “Asaọkiephana ọmọ rọyen ọkpako hẹ evunrẹ udju jovwo, ro vwo rhivwin rhe ji sikẹrẹ uwevwin na, o de nyo edo rẹ ihwehworo kugbe ihwo ri gbeha. 26 Ọtiọyena o de se ọvo vwẹ usun rẹ idibo na te oma, ọ da nọ obo re phia. 27 Ọ da ta kẹ nẹ, ‘Oniọvo wẹn rhire, ọsẹ wẹn de hwe ọmọ rẹ erhuẹn rọ pha tubie tubie na, kidie o rhivwin bro rhe vẹ omakpokpọ.’* 28 Ẹkẹvuọvo ophu ko muo, ọ rha rhọnvwe ro uwevwi-in. Ọsẹ na de nẹ evunrẹ uwevwin na rhe, kọ rẹ. 29 Ọ da kpahen kẹ ọsẹ rọyen nẹ, ‘Nighere! ikpe buebun yen me vwọ ga wẹ cha re, o vwo ọke vuọvo mi vwo jẹ urhi wẹn enene-e, dedena wọ je rhe vwẹ ọke vuọvo vwọ vwẹ ọmọ rẹ ẹvwe kẹ vwẹ nẹ mẹ vẹ igbeyan mẹ vwọ riakpọ-ọ. 30 Ẹkẹvuọvo ugege rẹ ọmọ wẹn nana rọ rhaphiẹ* ekuakua wẹn kufia vẹ igberadja na vwọ rhe, wo de hwe ọmọ rẹ erhuẹn rọ pha tubie tubie na vwọ kẹ.’ 31 Ọ da ta kẹ nẹ, ‘Ọmọ mẹ, ọkieje yen mẹ vẹ owẹ vwọ herọ, erọnvwọn eje ri mi vwori ewẹn. 32 Ẹkẹvuọvo ofori oma vwọ vwerhen avwanre rere a ghọghọ, kidie oniọvo wẹn na ghwuru jovwo, ẹkẹvuọvo ọ rhoma rhe akpọ re; o ghwruru jovwo, a mrẹrẹ re.’”