Ọbe rẹsosuọ ri Samuẹl
2 Ọtiọyena Hana da ta vwẹ ẹrhovwo nẹ:
“Ubiudu mẹ ghọghọ vwevunrẹ Jihova;
Jihova kpare idjo* mẹ kpenu.
Unu mẹ rhiephiyọ ghwroro vwọso ivwighrẹn mẹ,
Kidie me ghọghọ vwẹ iruo rẹ usivwin wẹn.
2 O vwo ohwo vuọvo rọ pha fuanfon kerẹ Jihovaa,
O vwo ohwo vuọvoo jokpanẹ owẹ,
O ji vwo oragha vuọvo kerẹ Ọghẹnẹ rẹ avwanree.
3 Wọ rha ta ota vẹ omaẹkparọọ;
Wo jẹ ota rẹ omaẹyan vuọvo nẹ unu wẹn chaa,
Kidie Jihova ọyen Ọghẹnẹ rẹ erianriẹn,
Ọyen re fuẹrẹn oborẹ ihwo ruẹ gbagba.
4 E vwirhin imirhabọ rẹ egba na,
Ẹkẹvuọvo a vwẹ ogangan kẹ ihwo re vwiẹrẹre.*
5 Ihwo re nabọ mrẹ emu ria jovwo cha wian vwọ kẹ ihwo efa fikirẹ ibrẹdi,
Ẹkẹvuọvo owẹnvwe rhe hwe ihwo rẹ owẹnvwe hwe jovwoo.
Ẹgan na vwiẹ emeshare ighwrẹn re,
Ẹkẹvuọvo aye ro vwo emọ buebun na rhi hirhephiyọ ọruvwohwo.*
7 Jihova sa nẹrhẹ ohwo dia ogbere, ọ je sa nẹrhẹ ohwo dia ọdafe;
Ọ sa vwẹ ohwo kpotọ, ọ je sa kpare ohwo kpenu.
8 Ọ kpara ihwo ri kpotọ kpenu vwo nẹ ekpẹn na;
O muẹ igbere na kpenu vwo nẹ erhurhu,*
Rere ayen vẹ isun vwo chidia,
Ọ vwẹ agbara rẹ ọghọ vwọ kẹ ayen.
Jihova yen vwo ichivwo rẹ akpọ na,
Ọ da nẹrhẹ otọ dia enu rayen.
9 Ọ sẹro rẹ idjerhe rẹ ihwo re fuevun kẹ,
Ẹkẹvuọvo e che rhurhu unu rẹ irumwemwu na vwẹ ebri,
Kidie ọ dia womarẹ ogangan yen ohwo vwo phiẹkparobọọ.
Jihova che guẹdjọ re te oba rẹ akpọ na,
Ọ cha vwẹ ogangan kẹ ovie rọyen
Ọ je cha kpare idjo* rẹ ohwo rọ jẹreyọ na kpenu.”
11 Ọyena vwọ wan nu, Ẹlkena de kpo uwevwin rọyen vwẹ Rema, ẹkẹvuọvo ọmọ na da rhe dia odibo ri* Jihova vwẹ obaro rẹ Ilai orherẹn na.
12 Asaọkiephana emọ rẹ Ilai erharhe rẹ ihwo; ayen muọghọ kẹ Jihovaa. 13 Ọnana yen oborẹ ayen ruẹ kpahan obo ro fori nẹ irherẹn na reyọ mie ihwo na: Kọke kọke rẹ ohwo de ze izobo, odibo rẹ orherẹn na ọvo me rhe vẹ ifọku* ro vwo akon erha vwẹ obọ vwẹ ọke re ji vwo rho eranvwe na, 14 o mi duvwon phiyọ evunrẹ oze na, ipọtu re vwo chere emu ro vwo abọ ivẹ na, itaso na, yẹrẹ ipọtu re vwo chere emu ro vwo obọ ọvo na. Kemu kemu rẹ ifọku na duvwunru, orherẹn na kọ reyọ kẹ oma rọyen. Ọyena kọyen oborẹ ayen ruẹ ihwo rẹ Izrẹl eje re cha Shailo. 15 Vwọba, tavwen ohwo ro ze izobo na ke tobọ torhẹ ivwri na, odibo rẹ orherẹn na ọvo me rhe, ọ me ta kẹ nẹ: “Vwẹ eranvwe kẹ orherẹn na rere ọ vwọ tọn. Ọ cha reyọ eranvwe re rhori mie wee, jokparẹ ọkpokpọ ọvo.” 16 Ọke rẹ ọshare na da ta kẹ nẹ: “Jẹ ayen ka torhẹ ivwri na tavwen wọ ke reyọ obo ri je we kẹ oma wẹn,”* ọ me ta: “Ẹjo, vwọ kẹ vwẹ nananana; ọ rha dia ọtiọyeen, me cha vwẹ ogangan reyọ!” 17 Ọtiọyena umwemwu rẹ idibo na da rhe rho gangan vwẹ obaro ri Jihova, kidie eshare na dje ọghọ phia kpahen izobo re ze kẹ Jihovaa.
18 Asaọkiephana Samuẹl gbodibo vwẹ obaro ri Jihova, o ku ẹfọd ra vwẹ amwa* ko phiyọ, dede nẹ omotete yen o ruẹ. 19 Vwọba, oni rọyen ko ko emewun rẹ obotafe ro jẹ abọ evwo vwọ kẹ, ọ me reyọ vwo rhe kukpe kukpe ọke rọ vẹ ọshare rọyen da rhe rhi ze izobo ri kukpe kukpe na. 20 Ilai da nẹrhovwo kẹ Ẹlkena vẹ aye rọyen, ọ da ta: “E jẹ Jihova nẹrhẹ aye nana vwiẹ ọmọ ọfa kẹ wẹ vwẹ ẹdia rẹ ọ ru wọ vwọ kẹ Jihova na.” Ayen de rhivwin kpo uwevwin. 21 Jihova de ruo rere Hana sa vwọ mrevun; o de vwiẹ emeshare erha efa kugbe emetẹ ivẹ. Jẹ ọmọ na Samuẹl rha rhuaphiyọ vwẹ obaro ri Jihova.
22 Asaọkiephana Ilai ghworo mamọ re, ẹkẹvuọvo o nyo kpahen erọnvwọn eje rẹ emọ rọyen ruẹ ihwo rẹ Izrẹl eje vẹ oborẹ ayen nene eya re ga vwẹ asan anurhoro rẹ utughẹ ra da vwoma na mroma. 23 Kọ ta kẹ ayen nẹ: “Diesorọ ovwan vwo ruẹ erọnvwọn tiọnana? Kidie erọnvwọn ri mi nyo mie ihwo na eje kpahan ovwan na brare. 24 Ẹjo, emọ mẹ, iyẹnrẹn ri mi nyo rọ hra nene ohri rẹ ihwo ri Jihova na yomaa. 25 Ọ da dianẹ ohwo ọvo ru umwemwu vwọso ohwo ọfa, ohwo sa rẹ Jihova vwọ kẹ;* ẹkẹvuọvo ọ da dianẹ ohwo ru umwemwu vwọso Jihova, kẹ ono yen sa rẹ kẹ?” Ẹkẹvuọvo ayen rhọnvwe kerhọ rẹ ọsẹ rayeen, kidie Jihova brorhiẹn nure nẹ ọyen cha teyen ayen hwe. 26 Vwẹ uvwre rẹ ọke nana, jẹ ọmọ re se Samuẹl na rha rhuaphiyọ vwẹ ugboma, o ji vwo ẹroesiri ri Jihova vẹ ọ rẹ ihwo na ọkieje.
27 Ohwo rẹ Ọghẹnẹ ọvo de bru Ilai rhe, ọ da ta kẹ nẹ: “Ọnana yen oborẹ Jihova tare: ‘Ọ dia omẹvwẹ yen nabọ dje oma mẹ kẹ uwevwin rẹ ọsẹ wẹn ọke rẹ ayen vwọ hẹ Ijipt kerẹ eviẹn kẹ uwevwin ri Fero? 28 A da sanọ vwo nẹ ivwiẹ rẹ Izrẹl eje rere ọ ga kerẹ orherẹn mẹ, rere o kpo agbada mẹ re ze izobo, ra torhẹ insẹnsi,* rere o ji ku ẹfọd phiyọ vwẹ obaro mẹ; me da vwẹ izobo ejobi rẹ ihwo rẹ Izrẹl* zeri womarẹ erhanre vwọ kẹ uwevwin rẹ ọsẹ wẹn rode. 29 Diesorọ ovwan vwọ vwẹ ẹro rẹ ọjẹfia vwo nẹ izobo kugbe okẹ mẹ ri mi ji iji rọyen nẹ a vwọ rhe asan re me dia? Diesorọ wo vwo muọghọ kẹ emọ wẹn nọ vwẹ womarẹ ovwan vwọ reyọ ẹbẹre ro me yovwin ri kokẹ kokẹ rẹ ihwo mẹ Izrẹl vwọ kpahotọ?
30 “‘Kọyensorọ Jihova Ọghẹnẹ rẹ Izrẹl vwọ tanẹ: “Me ghene tanẹ uwevwin wẹn vẹ uwevwin rẹ ọsẹ wẹn rode cha yan vwẹ obaro mẹ ọkieje.” Ẹkẹvuọvo asaọkiephana Jihova tanẹ: “Ọ rha cha dia ọtiọyeen, kidie ihwo ri muọghọ kẹ vwẹ yen mi che muọghọ kẹ, ẹkẹvuọvo ihwo re jẹ vwẹ fia, mi che ni ayen phovwin.” 31 Nighere! Ẹdẹ cha ri mi che vwo bru ogangan* wẹn vẹ ọ rẹ uwevwin rẹ ọsẹ wẹn kufia, rere ohwo vuọvo vwẹ uwevwin wẹn vwo jẹ dia te ọke ọghwo. 32 Wọ cha mrẹ ọvweghrẹn vwẹ asan re me dia vwẹ ohri rẹ emu esiri eje re ruru vwọ kẹ Izrẹl, o rhe vwo ọke vuọvo rẹ ohwo rọ ghworo cha vwọ dia uwevwin wẹẹn. 33 Ohwo wẹn ri mi bru kufia nẹ ẹga ra ga vwẹ agbada mẹẹ, cha nẹrhẹ wọ mrorẹ phorophoro, ọ je cha so uvweri kẹ wẹ,* ẹkẹvuọvo ọlọkọ yen a cha vwọ teyen ihwo ri me bun vwẹ uwevwin wẹn hwe. 34 Obo re cha phia vwọ kẹ emọ wẹn ivẹ na, Họfnai vẹ Finihas, cha dia oka kẹ wẹ: Ayen ihwo ivẹ che ghwu vwẹ ẹdẹ ọvuọvo. 35 Me cha vwẹ orherẹn rọ fuevun vwo mu kẹ oma mẹ. O che ru nene oborẹ ubiudu mẹ guọnọre;* me cha bọn uwevwin ri bẹdẹ vwọ kẹ, ọ cha yan vwẹ obaro rẹ ohwo re me jẹreyọ na ọkieje. 36 Kohwo kohwo ro chekọ vwẹ uwevwin wẹn cha rhe, ọ me vwẹ uyovwin kpotọ kẹ orherẹn na vwọ kẹ osaẹhwa rẹ igho kugbe ibrẹdi, ọ me ta: “Biko phi vwe phiyọ ọvo vwẹ usun rẹ ẹdia rẹ irherẹn na rere me vwọ mrẹ ibrẹdi re.”’”