Mak

7 Asaọkiephana ihwo ri Farisi na kugbe evo vwẹ usun rẹ isiẹbe na ri nẹ Jerusalẹm rhe da riariẹ phiyọ. 2 Ayen da mrẹ evo vwẹ usun rẹ idibo rọyen re vwẹ abọ ri jẹfuọn vwọ riemu, kọyen e ra hworhẹre-e.* 3 (Kidie ihwo ri Farisi na vẹ ihwo ri Ju eje riemu-u, jokpanẹ kẹ ayen hworhẹ abọ rayen te uwurhobọ tavwen, ayen churẹ muẹ ẹkuruemu rẹ ihwo awanre na, 4 ayen de nẹ eki rhe, ayen riemu-u, jokpanẹ kẹ ayen hworhẹ oma rayen tavwen. O ji vwo ẹkuruemu efa buebun re yono ayen rẹ ayen ji churu mu, kerẹ ebrophiyame rẹ iko, ijọgu, kugbe ipọtu ra vwẹ ẹrovwo ru.) 5 Ọtiọyena ihwo ri Farisi nana kugbe isiẹbe na da nọ nẹ: “Diesorọ idibo wẹn vwo jẹ ẹkuruemu rẹ ihwo awanre na enene, rẹ ayen vwọ riemu rayen vẹ abọ ri jẹfuọn?” 6 Ọ da ta kẹ ayen nẹ: “Aizaya nabọ mraro kpahen ovwan gbagba ihwo rẹ omeru na, kirobo re siro nẹ: ‘Ihwo nana vwẹ ẹbẹrunu rayen vwo muọghọ kẹ vwẹ, ẹkẹvuọvo ubiudu rayen pha shesheri kẹ vwẹ. 7 Ẹga rẹ ayen vwọ kẹ vwẹ ofefe, kidie iji rẹ ihworakpọ yen ayen yono.’ 8 Ovwan gbobọnyẹ iji rẹ Ọghẹnẹ, ovwan de churu mu ẹkuruemu rẹ ihworakpọ.”

9 Vwọba, ọ da ta kẹ ayen nẹ: “Ovwan vwẹ ona vwọ jẹ iji rẹ Ọghẹnẹ fia, rere ovwan sa vwọ yọnrọn ẹkuruemu rẹ ovwan. 10 Kerẹ udje, Mosis tare nẹ, ‘Muọghọ kẹ ọsẹ wẹn vẹ oni wẹn,’ ọ je tanẹ, ‘E jẹ e hwe kohwo kohwo rọ ta eta ebrabra kpahen* ọsẹ yẹrẹ oni rọyen.’ 11 Ẹkẹvuọvo ovwan tanẹ, ‘Ọ da dianẹ ohwo ta kẹ ọsẹ yẹrẹ oni rọyen nẹ: “Kemu kemu ri mi vwori ro se fierere kẹ wẹ ọyen kọban (kọyen okẹ ra vwọ kpahotọ kẹ Ọghẹnẹ),”’ 12 ovwan rhe jẹ o ruẹ orọnvwọn vuọvo kẹ ọsẹ yẹrẹ oni rọye-en. 13 Ọtiọyena ovwan ru ota rẹ Ọghẹnẹ phiyọ obo ri fiemu-u womarẹ ẹkuruemu rẹ ovwan phi phiyotọ kẹ ihwo efa. Ovwan ji ruẹ erọnvwọn buebun kerẹ ọnana.” 14 Ọtiọyena ọ da rhoma se otu na te oma, ọ da ta kẹ ayen nẹ: “Ovwan kerhọ mẹ, ovwan eje, rere ovwan riẹn otọ rọyen. 15 O vwo emu vuọvo rọ ro evunrẹ ohwo ro se gbe ẹgua-a; ẹkẹvuọvo erọnvwọn ri nẹ evunrẹ ohwo cha yen gbe ẹgua.” 16 *——

17 Asaọkiephana rọ vwọ yanjẹ otu na vwo ro evunrẹ uwevwin ọvo nu, idibo rọyen ke nọ kpahen udje na. 18 Ọtiọyena ọ da ta kẹ ayen nẹ: “Ovwan ji vwo ẹruọ kerẹ ayen? Ovwan rha riẹn nẹ o vwo emu vuọvo rọ ro evunrẹ ohwo ro se gbe ẹgua-a, 19 rọ vwọ dianẹ ọ dia evunrẹ ubiudu rọyen yen ọ roro-o, ẹkẹvuọvo evun rẹ ohwo na, ọ me wanvrẹ kpo ukpotọ?” Ọtiọyena, ọ da tanẹ emuọre ejobi fonro. 20 Vwo kpobarophiyọ, ọ da tanẹ: “Obo ri nẹ evunrẹ ohwo rhe yen gbe ẹgua. 21 Kidie vwo nẹ evunrẹ ubiudu rẹ ihwo, ọyen iroro rẹ umwemwu eje nẹcha: ọfanrhiẹn,* ujiecho, ozighẹ-ẹdẹ, 22 igberadja, urhuru, umwemwu, ophiẹnvwe, uruemu ra ghẹmrẹ,* ẹro rọ rioma gangan, eta rẹ ẹgua, omaẹkparọ, kugbe ughẹnghẹn.” 23 Erọnvwọn ebrabra nana eje nẹ evunrẹ ohwo cha, i mi gbe ẹgua.”

24 O de vrẹn nẹ etiyin, o de kpo ekogho ri Taya kugbe Saidọn, ọ da ro uwevwin ọvo vwẹ etiyin, jẹ ọ guọnọre nẹ ohwo vuọvo riẹn kpahọ-ọn, ẹkẹvuọvo ọ sa djahen oma rọye-en. 25 Ugege yena, aye ọvo rẹ ẹwẹn ro jẹfuọn kpokpo ọmọtẹ rọyen de nyo kpahọn, ọ da rhe rhi she teyen otọ vwẹ asan awọ rọyen. 26 Aye na ohwo ri Grik ro nẹ ẹkuotọ ri Sairofonisha rhe;* kọ rẹ nẹ ọ djẹ ẹwẹn rẹ Idẹbono na nẹ oma rẹ ọmọtẹ rọyen. 27 Ẹkẹvuọvo ọ da ta kẹ nẹ: “Ẹsosuọ jẹ emọ na re evun vọn, kidie ofori ra vwọ reyọ ibrẹdi rẹ emọ na, e mi do vwọ kẹ emeranko-o.” 28 Ẹkẹvuọvo aye na da kpahen kẹ nẹ: “E, ọga, dedena emeranko rehẹ otọ rẹ imẹjẹ na ria i ri she nẹ abọ rẹ imitete na.” 29 Ọtiọyena ọ da ta kẹ nẹ: “Kidie nẹ wọ ta ọnana, yanran; ẹwẹn rẹ Idẹbono na nẹ oma rẹ ọmọtẹ wẹn re.” 30 Ọtiọyena ọ da yanran kpo uwevwin rọyen, ọ da mrẹ ọmọ na ro sherhẹn ehwa, ẹwẹn rẹ Idẹbono na nẹ oma rọyen re.

31 Ọke ri Jesu vwo rhivwin nẹ ekogho ri Taya, ọ da wan Saidọn vẹ ekogho ri Dikapolis* kpo abadi ri Galili. 32 Ayen de mu ọshare ọvo rọ dia odierhọ rọ je sa nabọ ta ota-a bro rhe vwẹ etinẹ, ayen da rẹ nẹ ọ ghwobọ rọyen kpahọn. 33 Ọ da reyọ vwo nẹ otu na kpo ọkọkọ. O de duvwun irhiabọ rọyen phiyọ erhọ rẹ ọshare na, ro vwo dje enya nu, ọ da vwẹ obọ te ẹrẹnvwe rọyen. 34 Ro vwo ni odjuvwu, o de ku ẹwẹn totọ, ọ da ta kẹ nẹ: “Efata,” kọyen, “Rhie.” 35 Ọtiọyena erhọ rọyen de rhie, ebẹnbẹn rẹ ota rọ riẹn ta jovwo-o na de no, kọ nabọ ta ota. 36 Ọtiọyena o de jurhi kẹ ayen nẹ ayen vuẹ ohwo vuọvo-o, ẹkẹvuọvo ro vwo jurhi kẹ ayen na jẹ ayen ji ghwoghwo. 37 Vwọrẹ uyota, o gbe ayen unu mamọ, ayen da tanẹ: “O ru erọnvwọn eje yoyovwin. Ọ tobọ nẹrhẹ idierhọ nyẹme, ihwo re sa ta ota-a da ta ota.