Mak

6 O de vrẹn nẹ etiyin, ọ da rhe ekogho robọ rọyen, idibo rọyen nenire. 2 Ọke rẹ Ẹdẹ Urovwoma na vwo te, kọ ton eyono phiyọ vwevunrẹ sinagọg na, o de gbe ihwo buebun ri nyoro unu, ayen da tanẹ: “Tivọ yen ọshare nana de yono erọnvwọn nana? Diesorọ a vwọ vwẹ aghwanre nana vwọ kẹ, re ji vwo ruiruo rẹ igbevwunu nana wan oma rọyen? 3 Ọnana ọkanrirhe na, ọmọ ri Meri kugbe oniọvo ri Jems, Josẹf, Judas, kugbe Saimọn, ọ dia ọtiọyen? Iniọvo rọyen rẹ emetẹ vẹ avwanre yen gba herọ, gbanẹ ọ dia ọtiọyen?” Ọtiọyena kẹ ayen kprowọ fiki rọyen. 4 Ẹkẹvuọvo Jesu da ta kẹ ayen nẹ: “Ọmraro vwo ọghọ vwẹ asan eje jokparẹ ekogho robọ rọyen kugbe ohri rẹ ihwo rẹ orua rọyen kugbe uwevwin robọ rọyen.” 5 Ọtiọyena o rhe se ruiruo rẹ igbevwunu vuọvo vwẹ etiyi-in, jokparẹ imihwo krẹn rẹ oma rayen ganre-e rọ ghwabọ kpahen, ro de sivwin ayen. 6 Vwọrẹ uyota, o gbere unu nẹ ayen vwo esegbuyota-a. Ọ da yanran re kin eko na ro vwo yono.

7 Asaọkiephana o de se Ihwivẹ na, ko ji ayen yanran ivivẹ, ọ da kẹ ayen ogangan vwẹ enu rẹ ẹwẹn ri jẹfuọn na. 8 Vwọba, o de jurhi kẹ ayen nẹ, ayen ghwa orọnvwọn vuọvo nene oma vwẹ oyan na-a, jokparẹ ọkpọ—ayen ghwa ibrẹdi-i, ayen ghwa ekpu rẹ emu-u, ayen ji phi igho* phiyọ umwehun raye-en⁠— 9 ẹkẹvuọvo ayen ku isabato phiyọ, ayen kuẹ iwun ivẹ phiyọ-ọ.* 10 Vwọba, ọ da ta kẹ ayen nẹ: “Kasan kasan rẹ ovwan da ro uwevwin, ovwan dia etiyin bẹsiẹ rẹ ovwan vwo vrẹn nẹ asan na. 11 Kasan kasan rẹ ihwo rẹ ekogho na rhe rhiabọreyọ ovwan yẹrẹ kerhọ rẹ ovwa-an, ọke rẹ ovwan de nẹ etiyin, ovwan tue ekpẹn nẹ awọ rẹ ovwan rọ vwọ dia oseri vwọ kẹ ayen.” 12 Ọtiọyena ayen da yanran re ghwoghwo nẹ ihwo kurhẹriẹ, 13 ayen da djẹ ẹwẹn rẹ Idẹbono buebun phia, ayen da vwẹ evwri vwo ghworo ihwo buebun re họnvwa ọga, ayen de sivwin ayen.

14 Asaọkiephana Ovie Hẹrọd de nyo kpahen ọnana, kidie odẹ ri Jesu kperusi nene asan eje re, ihwo ke tanẹ: “A kpare Jọn ro Brẹ Ihwo Phiyame na nẹ ughwu re, kọyensorọ o se vwo ruiruo rẹ igbevwunu nana.” 15 Ẹkẹvuọvo efa tanẹ: “Ọyen Ilaija.” Efa je tanẹ: “Ọyen ọmraro kerẹ ọvo vwẹ usun rẹ emraro rẹ awanre na.” 16 Ẹkẹvuọvo ọke ri Hẹrọd vwo nyo kpahọn, ọ da tanẹ: “Jọn ri mi bru uyovwin rọyen no na, ọyen a kpare vrẹn na.” 17 Kidie Hẹrọd komobọ yen ji ihwo re mu Jọn, ọ da gba mu phiyọ uwodi fikirẹ Hẹrodias, aye rẹ oniọvo rọyen Filip, kidie ọ rọvwenrọ. 18 Kidie Jọn vuẹ Hẹrọd kọke kọke nẹ: “Urhi rhọnvwere nẹ wọ reyọ aye rẹ oniọvo wẹ-ẹn.” 19 Ọtiọyena Hẹrodias de phio phiyọ evun, kọ guọnọ hwe, ẹkẹvuọvo o se ruo-o. 20 Oshọ ri Jọn muẹ Hẹrọd kidie ọ riẹnre nẹ ọvwata kugbe ohwo ọfuanfon yen o ruẹ, ọtiọyena kọ sẹro rọyen. Ọke ro vwo nyo mie nu, ọ rha riẹn obo ro che ru-u, dedena oma je vwerhọn ro vwo nyo mie.

21 Ẹkẹvuọvo uphẹn na de rhiephiyọ vwẹ ẹdẹ ri Hẹrọd vwọ ria orẹ rẹ ẹdevwiẹ rọyen, ro vwo chere emu vwọ kẹ ihwo ride kugbe inotu ride rẹ isodje kugbe eshare ri Galili ri me titi. 22 Ọmọtẹ ri Hẹrodias da rhe, o de gbeha, oma da vwerhen Hẹrọd vẹ ihwo ri nene riemu na.* Ovie na da ta kẹ ọmọtẹ na nẹ: “Nokpẹn ri kemu kemu ru wọ guọnọre, ke me cha vwọ kẹ wẹ.” 23 E, o duvwun iyorin kẹ nẹ: “Kemu kemu ru wọ nokpẹn rọyen mie vwe, me cha vwọ kẹ wẹ, tobọ te ubro rẹ uvie mẹ dede.” 24 Ọtiọyena ọ da yanran ra ta kẹ oni rọyen nẹ: “Die yen me cha nokpẹn rọyen?” Ọ da tanẹ: “Uyovwin ri Jọn ro Brẹ Ihwo Phiyame na.” 25 Ugege yena, ọ da djẹ bru ovie na ra, ra yare oyare rọyen, ọ da tanẹ: “Me guọnọre nẹ wọ kẹ vwẹ uyovwin ri Jọn ro Brẹ Ihwo Phiyame na vwẹ ọsete ọphẹphẹghẹ nananana.” 26 Dede nẹ ọnana darọ gangan, jẹ ovie na guọnọ jẹ oyare rọyen na fia-a, fikirẹ iyorin ro duvwunru kugbe erhorha rọyen na.* 27 Ọtiọyena ovie na de ji ọvo vwẹ usun rẹ ihwo re rhẹrẹ na yanran ugege yena, ọ da vuẹ nẹ ọ ra reyọ uyovwin ri Jọn rhe. Ọtiọyena ọ da yanran, o de re bru uyovwin rọyen no vwẹ uwodi 28 o de mu uyovwin na phiyọ ọsete ọphẹphẹghẹ rhe, o de muo kẹ ọmọtẹ na, ọmọtẹ na de muo kẹ oni rọyen. 29 Ọke rẹ idibo rọyen vwo nyo kpahọn, ayen da rhe, ayen de mu orivwin rọyen, ayen de muo phiyọ ushi.*

30 Iyinkọn na da riariẹ Jesu phiyọ, ayen da niyẹnrẹn rẹ erọnvwọn eje rẹ ayen ruru vẹ oborẹ ayen yono ihwo vwọ kẹ. 31 Ọ da ta kẹ ayen nẹ: “Ovwan yanrhe, rere e kpo asan ro siomanu, rere ovwan rovwoma emerha.” Kidie ihwo buebun yancha je yanran, ayen rha tobọ vwo ọke rẹ ayen vwo rovwoma je riemu dede-e. 32 Ọtiọyena ayen da ro okọ rẹ ayen vwo kpo asan ofuefu rere ayen ọvo dia etiyin. 33 Ẹkẹvuọvo ihwo mrẹ ayen rẹ ayen vwọ yanran, ihwo buebun da rhe riẹn kpahọn, ayen da vwẹ owowọ vwọ djẹ nẹ irere na ejobi rhe, ayen da kare ayen te oboyin. 34 Ro vwo wontọ, ọ da mrẹ otu buebun, aro rayen da dọn, kidie ayen họhọ igodẹ ri vwo osu-un. Ko yono ayen erọnvwọn buebun.

35 Asaọkiephana ọke she re, idibo rọyen de bro rhe, ayen da ta kẹ nẹ: “Etinẹ na sherabọ kẹ irere na, ọke ji she re. 36 Siobọnẹ ayen rere ayen sa vwọ ro ekogho vẹ eko re riariẹ etinẹ na phiyọ ra dẹ orọnvwọn re.” 37 Ọ da kpahen kẹ ayen nẹ: “Ovwan kẹ ayen oborẹ ayen cha re.” Ọtiọyena ayen da ta kẹ nẹ: “Avwanre yanran ra dẹ ibrẹdi rẹ idinari* 200 vwọ kẹ ihwo na re?” 38 Ọ da ta kẹ ayen nẹ: “Bro ibrẹdi yen ovwan vwori? Ovwan yanran re no!” Ọke rẹ ayen vwo no nu, ayen da tanẹ: “Iyorin kugbe erin ivẹ.” 39 Ọ da vuẹ ihwo na eje nẹ ayen chidia totọ ẹkuẹko vwẹ enu rẹ odi ekpokpọ na. 40 Ọtiọyena ayen de chidia ẹkuẹko rẹ 100 kugbe 50. 41 Rọ vwọ reyọ ibrẹdi iyorin kugbe erin ivẹ na, ọ da kpare opharo rọyen ni odjuvwu, ọ da nẹrhovwo. O de bru ibrẹdi na, kọ vwẹ ayen kẹ idibo rọyen rere ayen mu ayen phiyọ obaro rẹ ihwo na, ọ da ghare erin ivẹ na kẹ ayen eje. 42 Ọtiọyena ayen ejobi da re, evun da vọn ayen. 43 Ayen de koko ibere 12 re vọnre vẹ e ra re chekọ, erin na vwọba-a. 44 Eshare 5,000 yen re ibrẹdi na.

45 Ọtiọyena vwọrẹ jẹ ọke ehwe, ọ da tanẹ idibo rọyen ro okọ rere ayen kobaro kẹ ọyen kpo ẹbẹre ochekọ rẹ abadi na rẹ Bẹtsaida hepha, rẹ ayen vwọ yanran na, o de siobọnẹ otu na. 46 Ẹkẹvuọvo rọ vwọ vuẹ ayen kẹsiẹfa nu, o de kpo ugbenu ọvo ra nẹrhovwo. 47 Ọke rẹ ovwọnvwọn vwo te, okọ na hẹ evunrẹ uherevie rẹ abadi na, ẹkẹvuọvo ọyen ọvo yehẹ otọ. 48 Ọtiọyena rọ vwọ mrẹ nẹ ayen pharha rẹ ayen vwo bi okọ na kidie odju na kpokpo ayen, vwẹ omarẹ orhẹrẹ rẹne rẹ ason na,* ko bru ayen cha, jẹ ọ yan vwẹ enu rẹ abadi na; ẹkẹvuọvo kọ guọnọ wanvrẹ ayen. 49 Ọke rẹ ayen vwọ mrẹ rọ yan vwẹ enu rẹ abadi na, ayen da tanẹ: “Ọnana evwerhẹn!” Ayen de kperi phia. 50 Kidie ayen eje mrẹrẹ, oshọ de mu ayen. Ẹkẹvuọvo ugege yena ọ da ta kẹ ayen nẹ: “Ovwan fiudugberi! Omẹvwẹ; ovwan djoshọ-ọ.” 51 Ọtiọyena ọ da ro okọ rẹ ayen hepha na, odju na de kpotọ. Ọnana de gbe ayen unu mamọ, 52 kidie ayen je rhe riẹn oborẹ ibrẹdi na mudiaphiyọ-ọ, udu rayen ji rhi vwo ẹruọ-ọ.

53 Ayen vwo te ẹbẹre ochekọ na, ayen de rhi te Gẹnẹsarẹt, ayen de churu okọ na kẹrẹ etiyin. 54 Ẹkẹvuọvo ugege rẹ ayen vwo wontọ nẹ okọ na, ihwo de vughe. 55 Ayen da djẹ nene ekogho yena eje, kẹ ayen vwẹ ehwa muẹ ihwo rẹ oma rayen ganre-e cha asan rẹ ayen nyori nẹ ọ hepha. 56 Kasan kasan rọ da ro eko yẹrẹ irere yẹrẹ ekogho, kẹ ayen muẹ ihwo re muọga phiyọ afieki na, kẹ ayen rẹ nẹ o jẹ ayen di djobọte ejọjọ rẹ ewun rẹ obotafe rọyen. Oma rẹ ihwo eje ri djobọte da gan.