Ọbe rẹsosuọ ri Samuẹl
19 Ọke vwọ yan obaro, Sọl da ta kẹ Jonatan ọmọ rọyen vẹ idibo rọyen eje nẹ ọyen guọnọ teyen Devid hwe. 2 Ọ vwọ dianẹ Jonatan ọmọ ri Sọl vwo ẹguọnọ ri Devid mamọ na, Jonatan da vuẹ Devid nẹ: “Ọsẹ mẹ Sọl, guọnọ owẹ teyan hwe. Biko nomaso vwẹ urhiọke rere wo kpo asan rẹ odjahọn, wo siomanu vwẹ etiyin. 3 Me cha yanran re mudia kẹrẹ ọsẹ mẹ vwevunrẹ aghwa ru wọ cha dia na. Me cha ta ota kẹ ọsẹ mẹ kpahen owẹ, ọ da dianẹ mi nyo ota, vwo imuẹro nẹ me cha vuẹ wẹ.”
4 Ọtiọyena Jonatan da ta omamọ rẹ ota kpahen Devid kẹ ọsẹ rọyen Sọl. Ọ da ta kẹ nẹ: “E jẹ ovie ruẹ umwemwu kpahan Devid odibo rọyeen, kidie o ru umwemwu vwọso owẹẹ, wọ je mrẹ erere vwo nẹ obo ro ru vwọ kẹ wẹ. 5 O phi arhọ rọyen phiyọ ẹdia rẹ imuoshọ* ra teyen ohwo ri Filistia na hwe, ọtiọyena Jihova da ghwa ophikparobọ* rode rhe Izrẹl eje. Wọ mrẹ rẹ, wọ je ghọghọ gangan. Ọtiọyena diesorọ wo vwo ru umwemwu vwọso ọbara rẹ ohwo rẹ abọ rọyen fonro, ru wo vwo hwe Devid ekueku?” 6 Sọl da kerhọ rẹ Jonatan, Sọl de duvwun iyorin: “Jihova vwọ herọ na, a cha teyọn hwee.” 7 Ọyena vwọ wan nu, Jonatan de se Devid, ọ da vuẹ eta nana eje. Ọtiọyena Jonatan da reyọ Devid rhe Sọl, kọ ga kirobo ri jovwo.
8 Ọke vwọ yan obaro, ofovwin da rhoma she, Devid da yanran re nene ihwo ri Filistia na họnre, ọ da teyen ayen hwe buebun, ayen da mrẹ djẹ.
9 Orharhe rẹ ẹwẹn ro nẹ obọ ri Jihova rhe da ro oma ri Sọl ọke ro vwo chidia phiyọ uwevwin rọyen vẹ oshuẹ vwẹ obọ, jẹ Devid reyọ ihapu vwo hworo une. 10 Sọl davwẹngba rọ vwọ vwẹ oshuẹ na vwo phi Devid mu igbẹhẹ, ẹkẹvuọvo o de bioma kẹ Sọl, oshuẹ na de phi igbẹhẹ. Devid da djẹ vabọ vwẹ ason yena. 11 Sọl de ji ikọn kpo uwevwin ri Devid ra rhẹrẹ, rere ayen teyọn hwe vwẹ urhiọke, ẹkẹvuọvo aye ri Devid re se Maikal da vuẹ nẹ: “Wọ rha djẹ* vwẹ ason naa, orivwin wẹn yen a cha mrẹ odẹ rọ cha na.” 12 Ugege yena Maikal da lọrọ Devid wan ovakpo* na kpotọ, rere ọ sa vwọ djẹ vabọ. 13 Maikal de mu oma ri tẹrafim,* o de muo sherhẹn ehwa, o de phi inẹti rẹ ẹton rẹ ẹvwe phiyọ asan uyovwin rọyen, ọ da vwẹ amwa phopho.
14 Asaọkiephana Sọl de ji ikọn re mu Devid, ẹkẹvuọvo Maikal da tanẹ: “Oma rọyen ganree.” 15 Ọtiọyena Sọl de ji ikọn ra mrẹ Devid, ọ da vuẹ ayen nẹ: “Ovwan muo muehwa rọyen na rhe vwe rere me teyọn hwe.” 16 Ọke rẹ ikọn na vwọ ro uwevwin, oma ri tẹrafim* hẹ ehwa na vẹ inẹti rẹ ẹton rẹ ẹvwe vwẹ asan rẹ uyovwin rọyen rha dia jovwo. 17 Sọl da ta kẹ Maikal nẹ: “Diesorọ wọ vwọ phiẹn vwẹ ọtiọna, ru wọ vwọ nẹrhẹ ọvweghrẹn mẹ djẹ vabọ?” Maikal da kpahen kẹ Sọl nẹ: “Ọ ta kẹ vwẹ nẹ, ‘Juvwe djẹ vabọ yẹrẹ me cha teyen owẹ hwe!’”
18 Asaọkiephana Devid djẹ vabọ re, o de bru Samuẹl ra vwẹ Rema. Ọ da vuẹ erọnvwọn eje rẹ Sọl ruro. Ọ vẹ Samuẹl da yanran, ayen da dia Naiọt. 19 Ọke vwọ yan obaro, a da vuẹ Sọl nẹ: “Nighere! Devid hẹ Naiọt vwẹ Rema.” 20 Siẹvuọvo na Sọl de ji ikọn re mu Devid. Ọke rẹ ayen vwọ mrẹ e re dia ekpako vwẹ usun rẹ emraro na re mraro, jẹ Samuẹl mudia ro vwo suẹn ayen, ẹwẹn rẹ Ọghẹnẹ da ro oma rẹ ikọn ri Sọl, kẹ ayen ji ruẹ kerẹ emraro.
21 Ọke ra vwọ vuẹ Sọl kpahọn, o de ji ikọn efa ugege yena, kẹ ayen ji ruẹ kerẹ emraro. Ọtiọyena Sọl da rhoma ji ikọn efa, ẹko rerha, kẹ ayen ji ruẹ kerẹ emraro. 22 Ukuotọ rọyen, Sọl de ji kpo Rema. Ọke ro vwo te ọgọdọ rode rọhẹ Siku, ọ da nọ: “Tivọ yen Samuẹl vẹ Devid hepha?” Ayen da kpahen nẹ: “Ayen hẹ Naiọt vwẹ Rema.” 23 Sọl vwọ hẹ idjerhe nẹ etiyin kpo Naiọt vwẹ Rema, ẹwẹn rẹ Ọghẹnẹ da je ruọ oma, ko ruẹ kerẹ ọmraro rọ vwọ yanran na, bẹsiẹ o vwo te Naiọt vwẹ Rema. 24 Ọ da je bẹrẹ iwun rọyen ji ru kerẹ ọmraro vwẹ obaro ri Samuẹl, o de sherhẹn etiyin ẹbẹban* vwẹ ẹdẹ vẹ ason yena eje. Kọyensorọ ayen vwọ tanẹ: “Sọl jẹ ọvo vwẹ usun rẹ emraro na?”