Ọbe Rivẹ ri Samuẹl
5 Ọke vwọ yan obaro, ivwiẹ rẹ Izrẹl ejobi de bru Devid rhe vwẹ Hẹbrọn, ayen da tanẹ: “Nighere! Avwanre ubeku vẹ uvwo wẹn.* 2 Vwẹ ọke re wanre rẹ Sọl vwọ dia ovie rẹ avwanre, wẹwẹ yen ohwo ro suẹn Izrẹl kpo ifovwin rọyen.* Jihova da ta kẹ wẹ nẹ: ‘Wo che sun ihwo mẹ Izrẹl, wọ cha dia osun vwẹ enu rẹ Izrẹl.’” 3 Ọtiọyena ekpako rẹ Izrẹl eje de bru ovie rhe vwẹ Hẹbrọn, Ovie Devid de nene ayen re ọphọ vwẹ Hẹbrọn vwẹ obaro ri Jihova. Ọyena vwọ wan nu, ayen da jẹ Devid reyọ kerẹ ovie vwẹ enu rẹ Izrẹl.
4 Devid hẹ ẹgbukpe 30 ọke rọ vwọ dia ovie, o sunru ẹgbukpe 40. 5 Vwẹ Hẹbrọn o sunru ẹgbukpe 7 gbe emeranvwe 6 vwẹ enu ri Juda, o de rhe sun vwẹ Jerusalẹm ẹgbukpe 33 vwẹ enu rẹ Izrẹl ejobi vẹ Juda. 6 Ovie na vẹ eshare rọyen de kpo Jerusalẹm re nene ihwo ri Jẹbus re dia otọ na họnre. Ayen da vwẹ Devid jehwẹ nẹ: “Wọ cha sa rhe obonẹẹ! Irhuẹro vẹ ikpono dede cha djẹ wẹ.” Kẹ ayen roro nẹ, ‘Devid cha sa ruọọ.’ 7 Ẹkẹvuọvo Devid da reyọ asan ra gbogba riariẹ ri Zayọn, rọ dia Orere ri Devid vwẹ asaọkiephana. 8 Ọtiọyena Devid da ta vwẹ ẹdẹ yena nẹ: “Ihwo ri nene ihwo ri Jẹbus họnre na wan ugbo rẹ ame na ra teyen ikpono vẹ irhuẹro ri vwo utuoma kpahen Devid* na hwe!” Kọyensorọ ra vwọ tanẹ: “O vwo ọke vuọvo rẹ irhuẹro vẹ ikpono na cha vwọ ro uwevwin naa.” 9 Ọyena vwọ wan nu, Devid kọ dia asan ra gbogba riariẹ na, e de se,* Orere ri Devid; Devid da tuẹn ebanbọn phiyọ vwẹ Asan ro Kpenu na* kugbe asan efa vwẹ orere na. 10 Ọtiọyena Devid kọ goma phiyọ goma phiyọ, Jihova Ọghẹnẹ rẹ otuofovwin na vẹ ọyen herọ.
11 Ovie Hairam ri Taya de ji ikọn bru Devid ji mu igedu rẹ isida rhe, o ji ji ekarirhe kugbe ihwo re vwẹ ikuta vwọ bọn igbẹhẹ rhe, ayen ke bọn uwevwin* ọvo kẹ Devid. 12 Devid riẹnre nẹ Jihova vwẹ ọyen mu ovie vwẹ enu rẹ Izrẹl, ọ je kpare uvie rọyen kpenu fikirẹ ihwo rọyen Izrẹl.
13 Devid da reyọ esen vẹ eya efa vwẹ Jerusalẹm ọke ro vwo nẹ Hẹbrọn rhe, e de vwiẹ emeshare vẹ emetẹ efa kẹ Devid. 14 Enana yen edẹ rẹ emọ re vwiẹ kẹ vwẹ Jerusalẹm: Shamua, Shobab, Netan, Solomọn, 15 Ibha, Ẹlaishua, Nifẹg, Jefaya, 16 Ẹlishama, Ẹlayada, kugbe Ẹlifẹlẹt.
17 Ọke rẹ ihwo ri Filistia na vwo nyo nẹ a jẹ Devid reyọ kerẹ ovie vwẹ enu rẹ Izrẹl re, ihwo ri Filistia na eje da rhe rhe guọnọ Devid. Ọke rẹ Devid vwo nyo kpahọn, ọ da yan kpo asan ra gbogba riariẹ na. 18 Etiyin ihwo ri Filistia na da rhe, ayen da hra nene Iyara* ri Rẹfeim. 19 Devid da nọ mie Jihova nẹ: “Me yanran re nene ihwo ri Filistia na họnre? Wo che phi ayen phiyọ obọ mẹ?” Ọtiọyena Jihova da ta kẹ Devid nẹ: “Yanran kidie mi che phi ihwo ri Filistia na phiyọ obọ wẹn.” 20 Ọtiọyena Devid da rhe Bel-pẹrezim, Devid da teyen ayen hwe vwẹ etiyin. Ọtiọyena ọ da ta: “Jihova phi ivwighrẹn mẹ kparobọ vwẹ obaro mẹ kerẹ igbẹhẹ ro rhirin she fikirẹ ame.” Ọyena yen sorọ ro vwo se asan na Bel-pẹrezim.* 21 Ihwo ri Filistia na da kpairoro vrẹ edjọ rayen vwẹ etiyin, Devid vẹ eshare rọyen de mu ayen yanran ra guọghọ.
22 Ọke vwọ yan obaro, ihwo ri Filistia na da rhoma rhe, ayen da hra nene Iyara* ri Rẹfeim. 23 Devid da nọ mie Jihova, ẹkẹvuọvo Ọ da kpahen kẹ nẹ: “Wọ yanran phiọnguun. Ukperẹ ọtiọyen, wan obuko ro ayen rere wo nene ayen họnre vwẹ obaro rẹ aghwa ri beka. 24 Ọke ru wo de nyo edo kerẹ edo rẹ ihwo re yan vwevunrẹ aghwa ri beka na, gba jowọ kpakpata kidie Jihova kobaro kẹ wẹ ra teyen otuofovwin rẹ ihwo ri Filistia na hwe re.” 25 Ọtiọyena Devid de ru kirobo rẹ Jihova ghwe ji iji rọyen kẹ, ọ da teyen ihwo ri Filistia na hwe vwo nẹ Giba rhirin re te Giza.