Iguẹdjọ

9 Ọke vwọ yan obaro Abimẹlẹk ọmọ ri Jerubel de bru iniọvo rẹ oni rọyen ra vwẹ Shikẹm, ọ da ta kẹ ayen vẹ orua rẹ ọsẹ rọyen rode ejobi nẹ:* 2 “Biko, nọ isun* ri Shikẹm eje nẹ, ‘Ọvọ yen me yovwin kẹ ovwan, rẹ emeshare ri Jerubel 70 eje vwo sun ovwan gbanẹ ọshare ọvo vwo sun ovwan? Ovwan karophiyọ nẹ mẹvwẹ ubeku vẹ uvwo rẹ ovwan.’”*

3 Ọtiọyena iniọvo rẹ oni rọyen de nene ta ọnana kẹ isun ri Shikẹm eje, ayen da rhọnvwe vwevunrẹ ubiudu rayen rẹ ayen vwo nene Abimẹlẹk, kidie ayen tare nẹ: “Oniọvo rẹ avwanre yen o ruẹ.” 4 Ọyena vwọ wan nu, ayen da reyọ idọnọ efuanfon 70 vwo nẹ uwevwin* ri Bel-birẹt vwọ kẹ, Abimẹlẹk da vwọ reyọ eshare ri vwo oborẹ ayen ruẹẹ ri ji yinvwaro nene oma. 5 O vwo ru ọyena nu, o de kpo uwevwin rẹ ọsẹ rọyen vwẹ Ọfra, o de hwe iniọvo rọyen, emọ ri Jerubel, eshare 70 vwẹ enu rẹ ukuta ọvo. Jotam rọ dia ọ rẹ otete eje vwẹ usun rẹ emọ ri Jerubel ọvo yen sivwin rhọ, kidie o siomanu.

6 Ọtiọyena isun ri Shikẹm eje kugbe Bẹt-milo eje de siomakoko, ayen da vwẹ Abimẹlẹk mu ovie vwẹ asan rọ kẹrẹ urhe rode na, vwẹ asan uchivwo rọhẹ Shikẹm.

7 Ọke rẹ ayen vwọ niyẹnrẹn rọyen kẹ Jotam nu, ugege yena ọ da yanran re mudia enu rẹ Ugbenu ri Gẹrizim, o de kperi se ayen vẹ upho ọgangan nẹ: “Ovwan kerhọ mẹ ovwan rẹ isun ri Shikẹm, Ọghẹnẹ kọ je kerhọ rẹ ovwan.

8 “O vwo ọke ọvo rẹ irhe vwọ yanran ra vwẹ ovie mu vwẹ enu rayen. Ọtiọyena ayen da ta kẹ urhe rẹ oliv nẹ, ‘Sun avwanre.’ 9 Ẹkẹvuọvo urhe rẹ oliv na da ta kẹ ayen nẹ, ‘Mi gbe jẹ evwri* mẹ rẹ ayen reyọ vwọ vwẹ urinrin kẹ Ọghẹnẹ vẹ ihworakpọ na vwo, rere mi re dju vwẹ enu rẹ irhe ri chekọ na?’ 10 Irhe na da ta kẹ urhe rẹ ifigi nẹ, ‘Yanrhe rere wo rhi sun avwanre.’ 11 Ẹkẹvuọvo urhe rẹ ifigi na da ta kẹ ayen nẹ, ‘Mi gbe jẹ avwerhen mẹ vẹ emamọ iyoyovwin re me mọ vwo, rere mi re dju vwẹ enu rẹ irhe ri chekọ na?’ 12 Irhe na da rha ta kẹ ivaini nẹ, ‘Yanrhe rere wo rhi sun avwanre.’ 13 Ivaini na da kpahen kẹ ayen nẹ, ‘Mi gbe jẹ iwaini kpokpọ mẹ rọ nẹrhẹ Ọghẹnẹ vẹ ihworakpọ ghọghọ na vwo, rere mi re dju vwẹ enu rẹ irhe na?’ 14 Ukuotọ rọyen, irhe ri chekọ na eje da ta kẹ umurhe ro vwo inwe na nẹ, ‘Yanrhe rere wo rhi sun avwanre.’ 15 Ọtiọyena umurhe ro vwo inwe na da ta kẹ irhe na, ‘Ọ da dianẹ ovwan ghene reyọ ovwẹ vwo muẹ ovie* vwẹ enu rẹ ovwan, ovwan gba yanrhe rere ovwan rhe guọnọ adjarhọ vwẹ otọ rẹ ophie mẹ. Ẹkẹvuọvo ọ rha dia ọtiọyeen, e jẹ erhanre nẹ evunrẹ umurhe ro vwo inwe na rhe rere ọ torhẹ irhe ri sida ri Lẹbanọn.’

16 “Asaọkiephana a sa tanẹ ọyen emu rẹ uyota vẹ ọghọ yen ovwan ruru, rẹ ovwan vwọ reyọ Abimẹlẹk vwo mu ovie, kẹ a je sa tanẹ ovwan dje uruemu uyoyovwin kẹ Jerubel vẹ evwruwevwin rọyen ji nene yerin kirobo ri foro? 17 Ọke rẹ ọsẹ mẹ vwọ họnre kẹ ovwan, o phi arhọ* rọyen phiyọ ẹdia rẹ imuoshọ ro vwo sivwin ovwan nẹ obọ ri Midian. 18 Ẹkẹvuọvo nonẹna ovwan vrẹn vwọso evwruwevwin rẹ ọsẹ mẹ ji hwe emeshare rọyen, eshare 70 vwẹ enu rẹ ukuta ọvo. Ọyena vwọ wan nu, ovwan da vwẹ Abimẹlẹk, ọmọ rẹ ọviẹn rọyen rẹ ọmọtẹ vwo mu ovie vwẹ enu rẹ isun ri Shikẹm, kidie oniọvo rẹ ovwan yen o ruẹ. 19 E, ọ da dianẹ emu rẹ uyota vẹ ọghọ yen ovwan ruẹ kẹ Jerubel vẹ evwruwevwin rọyen nonẹna, ovwan gbe nene Abimẹlẹk ghọghọ rere o ji nene ovwan ghọghọ. 20 Ẹkẹvuọvo ọ rha dia ọtiọyeen, e jẹ erhanre nẹ oma rẹ Abimẹlẹk rhe rere ọ torhẹ isun ri Shikẹm vẹ Bẹt-milo, e jẹ erhanre ji nẹ oma rẹ isun ri Shikẹm vẹ Bẹt-milo rhe rere ọ torhẹ Abimẹlẹk.”

21 Jotam da djẹ, o de kpo Biẹ, ọ da dia etiyin fikirẹ oniọvo rọyen Abimẹlẹk.

22 Abimẹlẹk de sun* Izrẹl vwẹ ẹgbukpe erha. 23 Ọtiọyena Ọghẹnẹ da nẹrhẹ ẹghwọ dia uvwre* rẹ Abimẹlẹk vẹ isun ri Shikẹm, ayen de nene Abimẹlẹk yerin vwẹ idjerhe rẹ ophiẹnvwe. 24 Ọnana phiare rere a sa vwọ reihri rẹ emọ ri Jerubel 70 ra teyen hwe na, rere ọbara rayen vwọ dia enu rẹ uyovwin rẹ oniọvo rayen Abimẹlẹk ro hwe ayen na kugbe enu rẹ uyovwin rẹ isun ri Shikẹm, kidie ayen vwẹ ukẹcha kẹ vwo hwe iniọvo rọyen. 25 Ọtiọyena isun ri Shikẹm de ji eshare ra hwa phiyọ hẹrhẹ vwẹ enu rẹ igbenu na, ayen mi gborho kohwo kohwo rọ wanvrẹ vwẹ idjerhe na. Ọke vwọ yanran na a da niyẹnrẹn rọyen kẹ Abimẹlẹk.

26 Ọtiọyena Geal ọmọ rẹ Ibẹd vẹ iniọvo rọyen da shariẹ vrẹ ro Shikẹm, isun ri Shikẹm da vwẹrosuọ. 27 Ayen da yanran kpo obo udju ji koko igrepu rẹ egba rẹ ivaini rayen, ayen de chiyin ayen, ayen de ru orẹ, ọyena vwọ wan nu ayen de kpo uwevwin rẹ ọghẹnẹ rayen, ayen da re je da ji duvwun iyorin kẹ Abimẹlẹk. 28 Ọtiọyena Geal ọmọ rẹ Ibẹd da tanẹ: “Ono yen Abimẹlẹk, ono yen Shikẹm rẹ avwanre vwọ ga? Ọ dia ọmọ ri Jerubel, ọ dia Zibo yen onotu rọyen? Ovwan ga eshare ri Hemọ ọsẹ ri Shikẹm! Ẹkẹvuọvo diesorọ avwanre vwọ ga? 29 Mane kẹ ihwo nana sa dia otọ rẹ usuon mẹ vwenẹ, mi rhe si Abimẹlẹk nẹ ẹdia rọyen.” Ọtiọyena ọ da ta kẹ Abimẹlẹk: “Ru otuofovwin wẹn bun rere wọ yan phia.”

30 Ọke rẹ Zibo osun rẹ orere na vwo nyo eta ri Geal ọmọ rẹ Ibẹd, ophu de muo gangan. 31 Ọtiọyena ọ da bẹbẹ* ji ikọn bru Abimẹlẹk ra tanẹ: “Nighere! Geal ọmọ rẹ Ibẹd vẹ iniọvo rọyen hẹ Shikẹm asaọkiephana, ayen kpara ẹwẹn rẹ ihwo rẹ orere nana vwọso owẹ. 32 Asaọkiephana wẹ vẹ eshare wẹn rhe vwẹ ason, rere ovwan hwa phiyọ hẹrhẹ vwevunrẹ udju na. 33 Ugege rẹ ọnre na da varhe vwẹ urhiọke, gbe vrẹn vwẹ edegburhiọke rere wo nene ihwo rẹ orere na họnre; ọke rọ vẹ eshare rọyen da rhe vwọso owẹ, ru kemu kemu ru wo se ru* vwo phio kparobọ.”

34 Ọtiọyena Abimẹlẹk vẹ ihwo na eje re vẹ ọyen gba herọ de vrẹn vwẹ ason, ayen da ghare oma phiyọ ẹko ẹne, ayen da hwa phiyọ hẹrhẹ Shikẹm. 35 Ọke rẹ Geal ọmọ rẹ Ibẹd vwọ yan phia ji mudia anurhoro rẹ orere na, Abimẹlẹk vẹ ihwo re vẹ ọyen gba herọ na de vrẹn nẹ asan rẹ ayen hwa phiyọ na rhe. 36 Ọke rẹ Geal vwọ mrẹ ihwo na, ọ da ta kẹ Zibo nẹ: “Nighere! Ihwo wontọ nẹ enu rẹ igbenu na cha.” Ẹkẹvuọvo Zibo da ta kẹ nẹ: “Ihoho rẹ igbenu na yen wọ mrẹ kerẹ ihworakpọ na.”

37 Geal da rhoma tanẹ: “Nighere! Ihwo wontọ nẹ asan ro kpenu rẹ orere na cha, ẹko ọvo wan idjerhe rẹ urhe rode ri Miọnẹnim cha.” 38 Zibo da kpahen kẹ nẹ: “Omaẹyan wẹn na kẹ ọrhọ asaọkiephana, wẹ rọ tare nẹ, ‘Ono yen Abimẹlẹk rẹ avwanre vwọ ga?’ Enana dia ihwo ru wọ senre? Gba ro otafe enẹna rere wo re nene ayen họnre.”

39 Ọtiọyena Geal da kobaro rẹ isun ri Shikẹm, o de nene Abimẹlẹk họnre. 40 Abimẹlẹk da vwọ tua, Geal da djẹ, e de hwe ihwo buebun gbere otọ rhirin re te anurhoro rẹ orere na.

41 Abimẹlẹk da dia Aruma, Zibo da djẹ Geal vẹ iniọvo rọyen vwo nẹ Shikẹm. 42 Vwẹ ẹdẹ rọ vwọ kpahọn ihwo na da ro evunrẹ udju na, a da vuẹ Abimẹlẹk kpahọn. 43 Ọtiọyena Abimẹlẹk da reyọ ihwo na, ọ da ghare ayen phiyọ ẹko erha, ayen da hwa phiyọ evunrẹ udju na. Ọke rọ vwọ mrẹ ihwo na ri nẹ evunrẹ orere na cha, o de nene ayen họnre je teyen ayen hwe. 44 Abimẹlẹk vẹ ẹko re vẹ ọyen gba herọ na da djẹ kpo obaro, ayen de mudia anurhoro rẹ orere na, jẹ ẹko ivẹ họnra ihwo eje rehẹ evunrẹ udju na, ayen da teyen ayen hwe. 45 Abimẹlẹk de nene ihwo rehẹ evunrẹ orere na họnre vwẹ ẹdẹ yena eje, o de phio kparobọ. O de hwe ihwo rehẹ evun rọyen je guọghọ orere na totọ, o de tue ughwanka phiyọ.

46 Ọke rẹ isun eje rẹ uwevwin ro kpenu ri Shikẹm vwo nyo kpahen ọnana, ayen de kpo asan adjarhọ* rẹ uwevwin* rẹ Ẹl-birẹt vwẹ ugege yena. 47 Ugege ra ghwa vwọ niyẹnrẹn kẹ Abimẹlẹk nẹ isun eje rẹ uwevwin ro kpenu ri Shikẹm na siomakoko, 48 Abimẹlẹk vẹ eshare eje re vẹ ọyen gba herọ na de yerin kpenu rẹ Ugbenu ri Zalmọn. Abimẹlẹk da reyọ ushurhe, o de she oghọn rẹ urhe ọvo, o de muo kpahen igabọ rọyen, ọ da ta kẹ ihwo re vẹ ọyen gba herọ na nẹ: “Oborẹ ovwan mrẹ vwẹ ri mi ruẹ na, ovwan brokpakpa ru ọtiọyen!” 49 Ọtiọyena ihwo na eje de ji she eghọn rẹ irhe, ayen de nene Abimẹlẹk. Ayen de mu eghọn na vwọ rẹrẹ asan adjarhọ na ji phi erhanre phiyọ. Ọtiọyena ihwo na eje rehẹ uwevwin ro kpenu ri Shikẹm na de ji ghwu, omarẹ ihwo 1,000, te eya te eshare.

50 Ọyena vwọ wan nu, Abimẹlẹk de kpo Tibẹz; ọ da gba riariẹ Tibẹz, o de phio kparobọ. 51 Uwevwin ọvo ro kpenu ra gbogba riariẹ hẹ uherevie rẹ orere na, eshare vẹ eya na eje kugbe isun rẹ orere na eje da djẹ kpo etiyin. Ayen da kanre ẹchẹ gboma, ayen de yerin kpo obenu rẹ uwevwin ro kpenu na. 52 Abimẹlẹk de kpo asan uwevwin ro kpenu na rere ọ ghwọrọ. O de kpo asan anurhoro rẹ uwevwin ro kpenu na rere o phi erhanre phiyọ. 53 Ọvo vwẹ usun rẹ eya na de siobọnẹ ọmọ rẹ ukuta she teyen uyovwin rẹ Abimẹlẹk, uyovwin rọyen da bẹre. 54 O de brokpakpa se odibo rọ ghwẹ ekuakua ofovwin rọyen na, ọ da ta kẹ nẹ: “Yoro ọlọkọ wẹn phia rere wo duvwun uvwe hwe, ayen vwo jẹ ta kpahen ovwẹ nẹ, ‘Aye yen hwere.’” Ọtiọyena odibo rọyen de duvwon fi, o de ghwu.

55 Ọke rẹ eshare rẹ Izrẹl vwọ mrẹ nẹ Abimẹlẹk ghwure, ayen eje de rhivwin kpo. 56 Enẹ kọyen Ọghẹnẹ hwosa kẹ Abimẹlẹk fikirẹ umwemwu ro ruru kpahen ọsẹ rọyen ro vwo hwe iniọvo rọyen 70. 57 Ọghẹnẹ de ji ruo rere umwemwu eje rẹ eshare ri Shikẹm ruru vwọ rhe dia enu rẹ uyovwin rayen. Ọtiọyena iyorin ri Jotam ọmọ ri Jerubel de mu ayen.