Iruo rẹ Iyinkọn Na
11 Asaọkiephana, iyinkọn na vẹ iniọvo rehẹ Judia de nyo nẹ ihwo rẹ ẹgborho na ji rhiabọreyọ ota rẹ Ọghẹnẹ re. 2 Ọtiọyena ọke ri Pita vwo te Jerusalẹm, ihwo ri titi oyanvwe da vwọsuọ,* 3 tanẹ: “Wọ ro evunrẹ uwevwin rẹ ihwo re yanvwere-e, wo de nene ayen riemu.” 4 Ọtiọyena Pita da nabọ dje ota na fiotọ kẹ ayen, rọ vwọ tanẹ:
5 “Me vwọ hẹ orere ri Jọpa nẹrhovwo, me da mrẹ emramrẹ rẹ orọnvwọn ọvo rọ họhọ amwa rode ra vwẹ igogo ẹne rọyen lọrọ nẹ obodjuvwu cha, a da lọrọ bru vwe rhe. 6 Me vwọ nabọ ni evun rọyen, me da mrẹ eranvwe ri vwo awọ ẹne vwẹ otọrakpọ na, eranvwe rẹ aghwa, i ri kpono kugbe emephran rẹ obodjuvwu. 7 Mi de ji nyo urhuru ọvo rọ ta kẹ vwẹ nẹ: ‘Vrẹn, Pita, hwe rere wọ re!’ 8 Ẹkẹvuọvo me da tanẹ: ‘Ẹjo kakaka, Ọrovwori, kidie emu rẹ ẹgua yẹrẹ orọnvwọn ro jẹfuọn je rhe ro unu mẹ dẹvo-o.’ 9 Obọ rivẹ, urhuru ro nẹ obodjuvwu rhe na da tanẹ: ‘Wẹwẹ na, wo se erọnvwọn rẹ Ọghẹnẹ ru fon nure, emu rẹ ẹgua-a.’ 10 Ọnana da phia obọ rerha, e de si erọnvwọn na ejobi rhivwin kpo obodjuvwu. 11 Vwẹ ọke yena ọvuọvo na, eshare erha mudia asan uwevwin rẹ avwanre dia na, e ji ayen nẹ Sizaria bru vwe rhe. 12 Ọtiọyena ẹwẹn na da vuẹ vwẹ nẹ mi nene ayen, mi vwo ẹwẹn ivivẹ kakaka-a. Ẹkẹvuọvo iniọvo esan nana ji nene uvwe ra, avwanre da ro evunrẹ uwevwin rẹ ọshare na.
13 “Ọ da vuẹ avwanre obo rọ mrẹ amakashe ro mudia uwevwin rọyen rọ tare nẹ: ‘Ji ihwo kpo Jọpa re se Saimọn re ji se Pita, 14 ọ cha vuẹ wẹ erọnvwọn re cha nẹrhẹ owẹ vẹ evwruwevwin wẹn ejobi vwo usivwin.’ 15 Ẹkẹvuọvo ọke me vwọ tuẹn ota ẹta phiyọ, ẹwẹn ọfuanfon na da ro ayen oma kirobo rọ je ro avwanre oma vwẹ ọtonphiyọ ye. 16 Ọtiọyena me da karophiyọ eta rẹ Ọrovwori na, rọ vwọ ta kọke kọke nẹ: ‘Ame yen Jọn bru ihwo phiyọ, ẹkẹvuọvo ẹwẹn ọfuanfon yen e che vwo bru ovwan phiyame.’ 17 Ọtiọyena, ọ da dianẹ Ọghẹnẹ kẹ ayen ẹserọphẹ vuọvo rọ vwọ kẹ avwanre ri se Ọrovwori na Jesu Kristi gbuyota, kẹ ono yen omẹvwẹ rọ dobọ rẹ Ọghẹnẹ ji?”*
18 Ọke rẹ ayen vwo nyo erọnvwọn nana, ayen rha vwọsuọ ọfa-a,* ayen da vwẹ urinrin kẹ Ọghẹnẹ, rẹ ayen vwọ tanẹ: “Kọyen Ọghẹnẹ je guọnọ nẹ ihwo rẹ ẹgborho na kurhẹriẹ rere ayen se vwo vwo arhọ.”
19 Asaọkiephana ihwo re hrabọ fikirẹ ukpokpogho rọ vwomaphia fikirẹ Stivin da djẹ shesheri kpo Fonisha, Saiprọs, kugbe Antiọk, jẹ ihwo ri Ju ọvo yen ayen ta ota na kẹ. 20 Ẹkẹvuọvo, evo vwẹ usun rẹ ihwo na ri nẹ Saiprọs kugbe Sairini rhe da rhe Antiọk, kẹ ayen ta ota kẹ ihwo re jẹ Grik, jẹ ayen ghwoghwo iyẹnrẹn esiri rẹ Ọrovwori na Jesu. 21 Vwọba, obọ ri Jihova* vẹ ayen herọ, ihwo buebun de rhi segbuyota, ayen de kurhẹriẹ bru Ọrovwori na ra.
22 Ukoko rọhẹ Jerusalẹm de nyo kpahen ayen, ayen de ji Banabas kpo Antiọk. 23 Ọke ro vwo te oboyin, rọ vwọ mrẹ ẹse rẹ Ọghẹnẹ re muwan rọye-en na, ọ da ghọghọ, kọ vwẹ uchebro kẹ ayen eje nẹ ayen rha vwẹ ubiudu rayen eje vwo muọghọ kẹ Ọrovwori na; 24 kidie ọyen ohwo esiri rọ vọnre vẹ ẹwẹn ọfuanfon, ro ji vwo esegbuyota ọgangan. Otu buebun da vwomaba Ọrovwori na. 25 Ọtiọyena o de kpo Tasọs ra nabọ frẹkotọ guọnọ Sọl. 26 Ọke rọ vwọ mrẹ nu, ọ da reyọ rhe Antiọk. Ọtiọyena ayen de kuomakugbe ukoko na ọsoso ẹgbukpe ọvo, ji yono ihwo buebun. Antiọk yen asan re de ke se idibo na Inenikristi womarẹ odjekẹ rẹ Ọghẹnẹ.
27 Vwẹ ọke yena, emraro de nẹ Jerusalẹm rhe Antiọk. 28 Ọvo vwẹ usun rayen re se Agabọs de vrẹn, ọ da mraro womarẹ ẹwẹn na nẹ owẹnvwe ọgangan che fi vwẹ otọrakpọ na ejobi, vwọrẹ uyota, ọ ghene phia vwẹ ọke ri Klọdiọs. 29 Ọtiọyena idibo na de brorhiẹn kirobo rẹ ẹgba rẹ ohwo ọvuọvo muru, rẹ ayen vwọ vwẹ okẹ rẹ ukẹcha vwo rhe iniọvo re dia Judia; 30 ayen de ghini ru ọtiọyen, ayen da vwọ kẹ Banabas vẹ Sọl nẹ ayen vwo rhe ekpako na.