Ẹvwọphia ri Jọn

16 Mi de nyo urhuru ọgangan ọvo ro nẹ asan ọfuanfon na rhe rọ ta kẹ emekashe ighwrẹn na nẹ: “Ovwan yanran re ku imize ighwrẹn rẹ ophu rẹ Ọghẹnẹ na ku akpọ na.”

2 Ọrẹsosuọ na da yanran re ku obo rehẹ evunrẹ omoze rọyen ku akpọ na. Ora rọ miavwa mamọ ro ji muoshọ da rhe dia oma rẹ ihwo ri vwo oka rẹ eranvwe rẹ aghwa na, re je vwẹ ẹga kẹ oma rọyen.

3 Ọrivẹ na de ku obo rehẹ evunrẹ omoze rọyen phiyọ abadi na. O de hirhephiyọ ọbara kerẹ ọ rẹ ohwo ro ghwuru, kemama kemama* ri vwo arhọ de ghwu, e, erọnvwọn rehẹ evunrẹ abadi na.

4 Ọrerha na de ku obo rehẹ evunrẹ omoze rọyen phiyọ irhie na kugbe igbugbu rẹ ame na. Ayen de hirhephiyọ ọbara. 5 Mi de nyo amakashe rọhẹ enu rẹ ame na rọ tanẹ: “Wẹwẹ rọ herọ enẹna, rọ je herọ rhabae, Ọ rọ fuevun na, wẹwẹ ọvwata, kidie wọ reyọ ẹdjọeguo nana vwọ phia, 6 kidie ayen ku ọbara rẹ ihwo efuanfon na kugbe ọ rẹ emraro na kuotọ, wọ je vwẹ ọbara kẹ ayen da nure; ọyen yovwin kẹ ayen.” 7 Mi de nyo agbada na rọ tanẹ: “E, Jihova* Ọghẹnẹ, Ọromevwẹgba na, uyota kugbe ọsoso yen ẹdjọeguo* wẹn.”

8 Ọrẹne na de ku obo rehẹ evunrẹ omoze rọyen ku ọnre na, a da rhọnvwe kẹ ọnre na nẹ ọ vwẹ erhanre torhẹ ihwo na. 9 Oheri ọgangan na da torhẹ ihwo na, ẹkẹvuọvo ayen da ta eta rẹ ẹgua kpahen odẹ rẹ Ọghẹnẹ ro vwo ogangan vwẹ enu rẹ etiekọ nana, ayen kurhẹriẹ je vwẹ urinrin kẹ-ẹ.

10 Ọriyorin na de ku obo rehẹ evunrẹ omoze rọyen ku ekete rẹ eranvwe rẹ aghwa na. Uvie rọyen de muebri, kẹ ayen ria ẹrẹnvwe rayen fikirẹ odjadja rayen, 11 ẹkẹvuọvo ayen da ta eta rẹ ẹgua kpahen Ọghẹnẹ rẹ odjuvwu na fikirẹ odjadja kugbe era rayen, ayen kurhẹriẹ vwo nẹ iruo raye-en.

12 Ọresan na de ku obo rehẹ evunrẹ omoze rọyen phiyọ urhie rode na Yufretis, ame rọyen da yamu rere a sa vwọ rhuẹrẹ idjerhe vwọ kẹ ivie ri nẹ ẹbẹre ọnre va nẹcha na cha.

13 Me da mrẹ eta erha ri jẹfuọn* re họhọ igoro ri nẹ unu rẹ okpodje na kugbe unu rẹ eranvwe rẹ aghwa na kugbe unu rẹ ọmraro rẹ efian na rhe. 14 Vwọrẹ uyota, ayen eta ri nẹ obọ rẹ emekashe rẹ Idẹbono rhe, ayen ruẹ eka, ayen bru ivie rẹ akpọ na ejobi ra re koko ayen vwọ kẹ ofovwin rẹ ẹdẹ rode rẹ Ọghẹnẹ Ọromevwẹgba na.

15 “Nighere! Me cha kerẹ oji. Omavwerhovwẹn dia vwọ kẹ ohwo rọ rhẹrẹ ọkieje, rọ je sẹro rẹ iwun rẹ obotafe rọyen, rere o vwo jẹ ẹbẹban ẹ vwọ yan rẹ ihwo de ni omavovwẹ rọyen.”

16 Ayen de koko ayen kpo asan ra vwẹ Hibru se nẹ Amagidọn.*

17 Ọrighwrẹn na de ku obo rehẹ evunrẹ omoze rọyen phiyọ odju na. Ọtiọyena urhuru ọgangan ọvo de nẹ asan ọfuanfon na rhe, vwo nẹ ekete na, rọ tanẹ: “Ọ phia re!” 18 Enu da nyavwaro, e de nyo urhuru sansan kugbe egbraran, otọ de kpogho gangan, a je rhe mrẹ oka rọyen dẹvo rhanvwẹ ọke rẹ ihworakpọ vwọ hẹ akpọ na-a, otọ ro kpoghori na kpogho sheri mamọ, ọ je gan mamọ. 19 Orere rode na da ghare kpo ẹkẹn erha, irere rẹ ẹgborho na de she; a da karophiyọ Babilọn Rode na vwẹ obaro rẹ Ọghẹnẹ, rere a vwọ vwẹ uko rẹ iwaini rẹ ophu ọgangan rọyen na vwọ kẹ. 20 Vwọba, kotọ kotọ rẹ ame riariẹ phiyọ da djẹ,* a rha mrẹ igbenu-u. 21 Imicho ride rẹ ọvuọvo rayen vwọ ọnyẹ te italẹnti ọvo* de she nẹ obodjuvwu rhe teyen ihwo na, ihwo na da ta eta rẹ ẹgua kpahen Ọghẹnẹ fikirẹ ọtiekọ rẹ imicho na, kidie ọtiekọ na ganre mamọ.