Diutaronomi
5 Mosis de koko Izrẹl eje, ọ da ta kẹ ayen: “E Izrẹl, ovwan nyo irhi kugbe orhiẹn-ebro ri mi ghwoghwo kẹ ovwan nonẹna, rere ovwan riẹn ayen je jomaotọ ru nene ayen. 2 Jihova Ọghẹnẹ rẹ avwanre nene avwanre re ọphọ vwẹ Horẹb. 3 Ọ dia esẹ rẹ avwanre ride yen Jihova vẹ ayen gba re ọphọ nanaa, ẹkẹvuọvo avwanre, avwanre eje re herọ vwẹ etinẹ nonẹna. 4 Jihova vẹ ovwan hirharoku ohwohwo, ọ da ta ota kẹ ovwan vwẹ ugbenu na, vwo nẹ evunrẹ erhanre na rhe. 5 Mi mudia uvwre rẹ Jihova vẹ ovwan vwẹ ọke yena re me vwọ vuẹ ovwan ota ri Jihova, kidie oshọ muẹ ovwan fikirẹ erhanre na, ovwan rhe yerin kpenu rẹ ugbenu naa. Ọ da ta:
6 “‘Mẹvwẹ Jihova Ọghẹnẹ rẹ ovwan rọ reyọ ovwan nẹ otọ rẹ Ijipt rhe, vwo nẹ uwevwin rẹ eviẹn rhe. 7 Ovwan vwo eghẹnẹ efa vwọ vrẹ vwẹẹ.*
8 “‘Ovwan kara oma vwọ kẹ oma rẹ ovwaan yẹrẹ kara obo re họhọ orọnvwọn rọhẹ idjuvwu na vwẹ obenu yẹrẹ akpọ na vwẹ obotọ yẹrẹ vwevunrẹ ame na vwẹ obotọ rẹ akpọ naa. 9 Ovwan vwẹ uyovwin kpotọ kẹ ayen yẹrẹ we jẹ e suẹn ovwan ra ga ayeen, kidie mẹvwẹ ri Jihova Ọghẹnẹ rẹ ovwan na, mẹvwẹ Ọghẹnẹ rọ guọnọ ẹga ọsoso, rọ hwosa rẹ oruchọ rẹ esẹ vwọ kẹ emọ, vwọ kẹ uvwiẹ rerha kugbe uvwiẹ rẹne rẹ ihwo ri vwo utuoma kpahen ovwẹ, 10 ẹkẹvuọvo ro dje ẹguọnọ ro jẹ rhẹriẹ vwọ kẹ ihwo ri vwo ẹguọnọ mẹ re je yọnrọn irhi mẹ re te uvwiẹ uriorin rayen.
11 “‘Ovwan reyọ odẹ ri Jihova Ọghẹnẹ rẹ ovwan vwo ruiruo vwẹ idjerhe ri jẹ ọghọ emuoo, kidie Jihova che jẹ oja egbe vwọ kẹ ohwo rọ reyọ odẹ rọyen vwo ruiruo vwẹ idjerhe ri jẹ ọghọ emuoo.
12 “‘Ovwan karophiyọ Ẹdẹ Urovwoma na rere ovwan ruo fon, kirobo rẹ Jihova Ọghẹnẹ rẹ ovwan ji iji rọyen kẹ ovwan. 13 Ovwan me wian ji ruiruo rẹ ovwan eje vwẹ ẹdẹ esan, 14 ẹkẹvuọvo ẹdẹ righwrẹn na ọyen ẹdẹ urovwoma vwọ kẹ Jihova Ọghẹnẹ rẹ ovwan. Ovwan ruiruo vuọvoo, te ovwan te emeshare rẹ ovwan te emetẹ rẹ ovwan te eviẹn rẹ ovwan eshare te eviẹn rẹ ovwan emetẹ te erhuẹn rẹ ovwan te ekẹkẹtẹ rẹ ovwan te eranvwe rẹ ovwan re dia orere kugbe erhorha rẹ ovwan re dia irere rẹ ovwan,* rere eviẹn rẹ ovwan eshare vẹ eviẹn rẹ ovwan emetẹ se vwo rovwoma kirobo rẹ ovwan ruẹ. 15 Ovwan karophiyọ nẹ ovwan dia eviẹn vwẹ otọ rẹ Ijipt jovwo, Jihova Ọghẹnẹ rẹ ovwan da reyọ ovwan nẹ etiyin rhe vẹ obọ ọgangan kugbe obọ rọ riẹn phia. Kọyensorọ Jihova Ọghẹnẹ rẹ ovwan vwo ji iji kẹ ovwan nẹ ovwan karophiyọ Ẹdẹ Urovwoma na.
16 “‘Ovwan muọghọ kẹ esẹ vẹ ini rẹ ovwan kirobo rẹ Jihova Ọghẹnẹ rẹ ovwan ji iji rọyen kẹ ovwan, rere ovwan sa vwọ dia ọke grongron, ro ji vwo yovwin kẹ ovwan vwẹ otọ rẹ Jihova Ọghẹnẹ rẹ ovwan cha vwọ kẹ ovwan na.
17 “‘Ovwan hwe ohwoo.
18 “‘Ovwan gbe igberadjaa.
19 “‘Ovwan chujii.
20 “‘Ovwan soseri rẹ efian kpahan ọrivẹ rẹ ovwaan.
21 “‘Ovwan vwo urhurusivwe kpahan aye rẹ ọrivẹ rẹ ovwaan. Ovwan ji vwo urhurusivwe kpahan uwevwin rẹ ọrivẹ rẹ ovwan yẹrẹ udju rọyeen, ọviẹn rọyen ọshare yẹrẹ ọviẹn rọyen ọmọtẹ yẹrẹ erhuẹn rọyen yẹrẹ ekẹkẹtẹ rọyen yẹrẹ kemu kemu rẹ ọrivẹ rẹ ovwan vworii.’
22 “Enana iji rẹ Jihova vwọ phia vwọ kẹ ọghwẹgbe rẹ ovwan eje vwẹ ugbenu na, vwo nẹ evunrẹ erhanre, evwru, kugbe ebri hwi vwọ rhe vẹ urhuru ọgangan, ọ vwẹ emu vuọvo vwọ baa; o de si ayen phiyọ ephapha rẹ ukuta ivẹ je vwẹ ayen kẹ vwẹ.
23 “Ẹkẹvuọvo ugege rẹ ovwan vwo nyo urhuru na ro nẹ evunrẹ ebri na rhe, ọke rẹ erhanre je vwọ la vwẹ ugbenu na, igbuyovwin rẹ ivwiẹ na eje vẹ ekpako na de bru vwe rhe. 24 Etiyin ovwan da tanẹ, ‘Asaọkiephana Jihova Ọghẹnẹ rẹ avwanre dje urinrin vẹ ọrho rọyen kẹ avwanre re, avwanre nyo urhuru rọyen vwo nẹ evunrẹ erhanre na rhe. Nonẹna avwanre rhe mrẹvughe re nẹ Ọghẹnẹ sa ta ota kẹ ohworakpọ ọ me je rhọ. 25 Asaọkiephana, kẹ diesorọ avwanre vwo ghwu? Kidie erhanre rode nana sa torhẹ avwanre. Avwanre de nyo urhuru ri Jihova Ọghẹnẹ rẹ avwanre ọkieje, o muẹro nẹ avwanre che ghwu. 26 Kidie ono vwẹ usun rẹ ihworakpọ eje yen nyo urhuru rẹ Ọghẹnẹ ro jeghwo na rọ ta ota nẹ evunrẹ erhanre rhe kirobo rẹ avwanre nyoro na, ọ da je rhọ? 27 Wẹ komobọ yen che sikẹrẹ rere wo nyo eta na eje rẹ Jihova Ọghẹnẹ rẹ avwanre cha ta, wẹ kọyen cha vuẹ avwanre eta na eje rẹ Jihova Ọghẹnẹ rẹ avwanre ta kẹ wẹ, kẹ avwanre cha kerhọ ji ru ayen.’
28 “Ọtiọyena Jihova de nyo eta rẹ ovwan ta kẹ vwẹ, Jihova da ta kẹ vwẹ nẹ, ‘Mi nyo eta rẹ ihwo nana ta kẹ wẹ. Oborẹ ayen tare eje gbare. 29 Mane kẹ ayen vwẹ ọkieje vwo vwo ubiudu rọ djoshọ mẹ rọ je sẹro rẹ iji mẹ eje, o rhe yovwin kẹ ayen vẹ emọ rayen bẹdẹ! 30 Yanran ra vuẹ ayen: “Ovwan rhivwin kpo itughẹ rẹ ovwan.” 31 Ẹkẹvuọvo wẹ vẹ ovwẹ dia etinẹ rere me vuẹ wẹ iji na eje, irhi na, kugbe orhiẹn-ebro ru wo che yono ayen, rẹ ayen ji che nene vwẹ otọ re me cha vwọ kẹ ayen kerẹ ughwẹ na. 32 Asaọkiephana ovwan gba jomaotọ vwo ru kirobo rẹ Jihova Ọghẹnẹ rẹ ovwan ji iji rọyen kẹ ovwan na. Ovwan rhẹrioma kpo obọrhen yẹrẹ obohwẹree. 33 Ovwan me yan vwẹ idjerhe eje rẹ Jihova Ọghẹnẹ rẹ ovwan ji iji rọyen kẹ ovwan na, rere ovwan vwọ rhọ, o vwo yovwin kẹ ovwan, ẹdẹ rẹ ovwan ji vwo gron vwẹ otọ rẹ ovwan cha yanran ra re ughwẹ rọyen na.