Jẹnẹsis
9 Ọghẹnẹ de bruba kẹ Noa vẹ emọ rọyen, ọ da ta kẹ ayen: “We vwiẹ we bunphiyọ rere ovwan vọn akpọ na. 2 Udidi vẹ oshọ rẹ ovwan che rhe muẹ kemama kemama ro vwo arhọ vwẹ akpọ na kugbe kemama kemama rọ rhan vwẹ idjuvwu na, kemu kemu rọ yan vwẹ otọ na kugbe iyerin eje rehẹ abadi na. Asaọkiephana mi phi ayen phiyọ obọ rẹ ovwan.* 3 Kemama kemama rọ yan ro vwo arhọ sa dia emuọre kẹ ovwan. Kirobo re me kẹ ovwan ẹbe rẹ aghwa na, me vwẹ ayen eje kẹ ovwan. 4 Uvwo vẹ arhọ* rọyen ọvo, kọyen ọbara rọyen yen ovwan che jẹriọ. 5 Ọ rha dia ọtiọyeen, me cha nokpẹn rẹ ọbara rẹ ovwan* rhivwin. Me cha nokpẹn rọyen mie kemama kemama ro vwo arhọ; ohwo ro hwe oniọvo rọyen* cha vwẹ arhọ rọyen vwọ hwosa rọyen. 6 Kohwo kohwo ro ku ọbara rẹ ohworakpọ kuotọ, ohworakpọ yen ji che ku ọbara rọyen kuotọ, kidie Ọghẹnẹ ma ohworakpọ họhọ oma rọyen. 7 Vwọ kẹ ovwan, ovwan vwiẹ rere ovwan ji bunphiyọ, ovwan vọn akpọ na rere ovwan dia buebun.”
8 Ọtiọyena Ọghẹnẹ da ta kẹ Noa vẹ emọ rọyen: 9 “Asaọkiephana me vẹ ovwan re ọphọ, ọtiọyen ji te emọ rẹ ovwan che vwiẹ, 10 kugbe kemama kemama* ro vwo arhọ rọ vẹ ovwan gba herọ, ephran na, eranvwe na, emama eje ri vwo arhọ re vẹ ovwan gba hẹ otọrakpọ na, i ri nẹ evunrẹ okọ na rhe eje—kemama kemama ro vwo arhọ vwẹ akpọ na. 11 E, me vẹ ovwan re ọphọ: Me rha cha vwẹ ame oghwe vwọ ghwọrọ uvwo eje* ọfaa, me je cha vwẹ oghwe vwọ ghwọrọ akpọ na ọfaa.”
12 Vwọba, Ọghẹnẹ da ta: “Ọnana yen oka rẹ ọphọ re me vẹ ovwan kugbe kemama kemama* ro vwo arhọ eje re vẹ ovwan gba herọ rere, vwẹ uvwiẹ re cha ejobi. 13 Mi phi aphoro mẹ phiyọ evwru na, ọ cha dia oka rẹ ọphọ rọhẹ uvwre mẹ vẹ akpọ na. 14 Kọke kọke re me da vwẹ evwru vwo rhurhu akpọ na, aphoro na kọ cha vwomaphia vwẹ evwru na. 15 Ke me cha karophiyọ ọphọ mẹ re me vẹ ovwan kugbe kemama kemama ro vwo arhọ dohwo koka rọyen* rere; ame na rha cha dia oghwe rọ cha ghwọrọ uvwo eje ọfaa. 16 Aphoro na kọ cha vwomaphia vwẹ evwru na, ke me cha mrẹ, ke me karophiyọ ọphọ ri bẹdẹ rọhẹ uvwre rẹ Ọghẹnẹ kugbe kemama kemama ro vwo arhọ dohwo doka rọyen* vwẹ otọrakpọ na.”
17 Ọghẹnẹ da vwanriẹn eta nana kẹ Noa: “Ọnana yen oka rẹ ọphọ re me vẹ uvwo eje rehẹ akpọ na rere.”
18 Emọ ri Noa ri nẹ evunrẹ okọ na rhe yen Shẹm, Ham, kugbe Jefẹt. Ukuko na Ham da rhe dia ọsẹ ri Kenan. 19 Erha nana yen emọ ri Noa, oma rayen yen ihworakpọ eje nurhe, ayen da hrabọ ro asan ejobi.
20 Asaọkiephana Noa da rhe dia ọghwẹrẹ, ọ da kọn ogba rẹ ivaini. 21 Ọke rọ vwọ da iwaini na, o de muo, ọ da banphiyọ vwevunrẹ utughẹ rọyen. 22 Ham ọsẹ ri Kenan da mrẹ ẹban rẹ ọsẹ rọyen, ọ da ra vuẹ iniọvo rọyen ivẹ rehẹ otafe. 23 Ọtiọyena Shẹm vẹ Jefẹt da reyọ ewun ogrongron, ayen ihwo ivẹ na da vwọ ya igabọ rayen, ayen da vwẹ ukuko yan bro ra. Ọtiọyena ayen de rhurhu ẹban rẹ ọsẹ rayen jẹ ayen kuẹrofia, ayen rha mrẹ ẹban rẹ ọsẹ rayeen.
24 Ọke rẹ Noa vwọ rhọvwọn rẹ iwaini na vwo nẹ ẹro rọyen nu, rọ je vwọ riẹn oborẹ ubrevwiẹ rọyen ruro, 25 ọ da ta:
“Ekan kẹ Kenan.
E jẹ ọ dia ọviẹn ro me kpotọ vwọ kẹ iniọvo rọyen.”
26 Ọ da je ta:
“Ejiro kẹ Jihova, Ọghẹnẹ ri Shẹm,
E jẹ Kenan dia ọviẹn rọyen.
27 E jẹ Ọghẹnẹ vwẹ asan rhuarho vwọ kẹ Jefẹt,
E jẹ ọ dia evunrẹ itughẹ ri Shẹm.
E jẹ Kenan je dia ọviẹn rọyen.”
28 Noa da je dia ikpe 350 efa rẹ Oghwe na vwo ku nu. 29 Ọtiọyena ẹdẹ rẹ Noa dia akpọ eje da dia ikpe 950, o de ghwu.