Diutaronomi
32 “Kerhọ, E idjuvwu, rere me ta ota,
E jẹ otọrakpọ na nyo eta rẹ unu mẹ.
2 Odjekẹ mẹ cha rhọ kerẹ osio;
Eta mẹ che tue kerẹ irho,
Kerẹ eghwẹghwẹ rẹ osio vwẹ enu rẹ odin
Kugbe osio vwẹ enu rẹ ekankọn.
3 Mi che ghwoghwo odẹ ri Jihova.
Ovwan ta ota kpahen ọrho rẹ Ọghẹnẹ rẹ avwanre!
4 Oragha na, iruo rọyen gbare,
Kidie idjerhe rọyen eje ọsoso.
Ọghẹnẹ rọ fuevun rọ vwẹ ọke vuọvo vwo brorhiẹn rẹ ekuu;
Ọvwata kugbe ohwo ọsoso yen o ruẹ.
5 Ayen yen ihwo ri ru obo re brare.
Ayen dia emọ rọyeen, oruchọ na ọrayen.
Ayen uvwiẹ rọ pha gugunu chachahen!
6 Enẹ yen ofori nẹ ovwan nene Jihova yerin,
E ẹkpa kugbe ihwo ri jẹ aghwanre evwo na?
Ọ dia ọyen Ọsẹ rẹ ovwan rọ nẹrhẹ ovwan dia,
Ohwo rọ ma ovwan je vwẹ ovwan muotọ kokoroko?
7 Karophiyọ ẹdẹ re wanre na;
Roro kpahen ikpe rẹ ivwiẹ re wanre na.
Nọ ọsẹ wẹn, ọ sa vuẹ wẹ;
Nọ ekpako wẹn, kẹ ayen cha vuẹ wẹ.
8 Ọke rẹ Ọ ro Me Kpenu na vwọ vwẹ uku rẹ ẹgborho na vwọ kẹ ayen,
Ọke rọ vwọ hẹriẹ emọ rẹ Adam* nẹ ohwohwo,
O de gbere ughwru kẹ ihwo na
Vwo nene oborẹ emọ rẹ Izrẹl bun te.
9 Kidie ihwo ri Jihova yen ẹkẹn rọyen;
Jekọp yen uku rọyen.
10 Ọ mrẹrẹ vwẹ aton
Vwẹ aton ofefe rẹ edo ro muoshọ hepha.
Ọ gba riariẹ phiyọ rọ vwọ chochọn rọyen, ọ vwẹrote,
Ọ da sẹro rọyen kerẹ ọmọẹro rọyen.
11 Kirobo rẹ ugo kpogho ẹho rọyen,
Ọ rhan vwẹ enu rẹ emọ rọyen,
Ọ bẹrẹ ibekpe phiyọ, o mi mu ayen,
O muẹ ayen phiyọ enu rẹ ibekpe rọyen,
12 Jihova ọvo yen suon;*
Ọghẹnẹ ọrhorha vuọvo vẹ ọyen herọọ.
13 Ọ nẹrhẹ ọ gua vwẹ enu rẹ asan ri kpenu vwẹ otọrakpọ na,
Ọ da nẹrhẹ ọ re omamọ rẹ udju na.
Ọ vwẹ ame ọnyọn ro nẹ oragha rhe vwọ ghẹrẹ
Kugbe evwri ro nẹ oragha ọgangan rhe,
14 Ibọta rẹ erhuẹn kugbe ameivie rẹ ẹvwe vẹ igodẹ,
Ọtiọyen ji te igodẹ ri me yovwin,*
Kugbe egbon ri Beshan, vẹ okri,*
Ọtiọyen ji te iwiti ri me yovwin;
Wọ je da iwaini ro nẹ ọbara* rẹ igrepu rhe.
15 Ọke rẹ oma vwọ ro Jẹshurọn,* o de gbe vwọso.
Wọ rhuoma re, wọ rhe dia tubie tubie re, oma ro owẹ re.
Ọtiọyena Ọghẹnẹ da chọrọ ẹro, ohwo rọ marọ na,
O de ni Oragha rẹ usivwin rọyen sakamu.
16 Ayen vwẹ eghẹnẹ erhorha vwọ kpare ophu rọyen;
Kẹ ayen nẹrhẹ ivun miovwo fikirẹ erọnvwọn rẹ ẹgua rayen.
17 Ayen ze izobo kẹ emekashe rẹ Idẹbono, ọ dia Ọghẹnẹẹ,
Vwọ kẹ eghẹnẹ rẹ ayen riẹnre jovwoo,
Eghẹnẹ kpokpọ re rhere obọ,
Vwọ kẹ eghẹnẹ rẹ esẹ rẹ ovwan ride riẹnre jovwoo.
18 Oragha rọ dia ọsẹ wẹn na chọrọ owẹ ẹro,
Wọ karophiyọ Ọghẹnẹ ro vwiẹ wẹẹ.
19 Ọke rẹ Jihova vwọ mrẹ, ọ da sen ayen
Kidie emetẹ rọyen vẹ emeshare rọyen gbe re ku.
20 Ọtiọyena ọ da tanẹ, ‘Mi che si opharo mẹ nu vwọ kẹ ayen;
Me cha mrẹ obo re cha phia kẹ ayen.
Kidie ayen uvwiẹ umwemwu,
Emọ ri jẹ evun ẹfuọn.
21 Ayen nẹrhẹ mi muophu* fikirẹ obo re dia ọghẹnẹẹ,
Ayen vwẹ ema rayen ri fiemuu vwo gbe vwe ku.
Ọtiọyena me cha nẹrhẹ ayen rioma fikirẹ obo re dia ihwoo;
Me cha vwẹ ẹgborho ro vwo ọhọọ vwo gbe ayen ku.
22 Kidie ophu mẹ la erhanre
Rọ cha torhẹ re te obotọ rẹ Ushi,
Ọ cha torhẹ otọrakpọ na vẹ ekankọn rọyen
O ji che phi erhanre phiyọ ichivwo rẹ igbenu.
23 Mi che ru okpetu rayen bunphiyọ;
Me cha vwẹ edada mẹ eje vwọ sa ayen.
24 Oma che bru ayen ku fikirẹ owẹnvwe
Odo ọgangan kugbe oghwọrọ ọgangan che mu ayen rọ.
Mi che ji akon rẹ eranvwe rẹ aghwa ro ohri rayen
Kugbe obi rẹ eranvwe ri kpono vwẹ otọ na.
25 Vwẹ otafe, ọlọkọ cha nẹrhẹ ayen vwere uvweri;
Vwẹ obevun, uguegue cha dia
Vwọ kẹ eghene ọshare vẹ ọmọtobẹ,
Omotete vẹ ọshare rọ djẹ esha re.
26 Me rha tanẹ, “Me cha hra ayen;
Mi che ruo rere ihwo vwo jẹ ayen ẹkarophiyọ ọfa,”
27 Ọ rha dia oshọ rẹ oborẹ ivwighrẹn na cha taa,
Kidie ivwighrẹn na se roro chọ.
Ayen sa ta: “Egba rẹ avwanre phi kparobọ re;
Ọ dia Jihova yen ru enana ejee.”
28 Kidie ayen ẹgborho rẹ ọhọ kanre,*
Ẹruọ jehẹ ohri rayeen.
29 Mane kẹ ayen vwo ọhọ jovwo! Ayen rhe roro kpahen ọnana.
Ayen rhe roro kpahen obo re cha phia kẹ ayen.
30 Mavọ ohwo ọvo sa vwọ reyọ vwọtua ihwo 1,000,
Rẹ ihwo ivẹ je vwọ nẹrhẹ ihwo 10,000 djẹ?
Jokpanẹ Oragha rayen shẹ ayen
Jihova je vwẹ ayen kpahotọ.
31 Kidie oragha rayen họhọ Oragha rẹ avwanree,
Ivwighrẹn rẹ avwanre dede riẹn ọnana re.
32 Ivaini rayen nẹ ivaini ri Sọdọm rhe
O ji nẹ aghwa ri Gomora rhe.
Igrepu rayen igrepu rẹ eruan,
Ekrun rayen mwenu.
33 Iwaini rayen obi rẹ eredekọ,
Obi ọgangan rẹ ọrobiebi.
34 Ọ dia omẹvwẹ yen ohwo rọ sẹro rẹ ọnana,
Rọ kanre ayen phiyọ asan re me sẹro rẹ erọnvwọn phiyọ?
35 Ihriẹriọ ọmẹ, kugbe osaẹhwa,
Vwẹ ọke re bruphiyọ rẹ owọ rayen da ghworiẹ,
Kidie ẹdẹ rẹ ukpokpogho rayen sikẹre re,
Obo re je hẹrhẹ ayen cha rhe kpakpata.’
36 Kidie Jihova che guẹdjọ rẹ ihwo rọyen,
O ji che gbe arodọnvwẹ* kẹ idibo rọyen
Ọke rọ da mrẹ nẹ ẹgba rayen reri,
Ọ da je mrẹ nẹ i ri jẹ ọchuko evwo kugbe e re vwiẹrẹre yen chekọ.
37 Ọke yena kọ cha tanẹ, ‘Eghẹnẹ rayen rhọ,
Oragha rẹ ayen vwo ru adjarhọ na,
38 E re ria ivwri rẹ izobo rayen jovwo,*
Re da iwaini rẹ izobo rẹ udi rayen jovwo?
E jẹ ayen vrẹn rere ayen cha ovwan uko.
E jẹ ayen rhe dia asan rẹ adjarhọ rẹ ovwan.
39 Riẹn asaọkiephana nẹ mẹvwẹ—mẹvwẹ yen ọyen,
Eghẹnẹ efa herọ vwọ vrẹ vwẹẹ,
Me teyan hwe, me je nẹrhẹ e rhọ.
Me sua omaẹwan, mi ji che sivwin,
O vwo ohwo vuọvo ro se sivwin ohwo nẹ obọ mẹẹ.
40 Me kpare obọ mẹ kpo odjuvwu,
Mi de duvwun iyorin: “Me vwọ herọ bẹdẹ na,”
41 Me da lọ ọlọkọ mẹ rọ nyavwaro na
Ji muegbe rẹ obọ mẹ vwọ kẹ ẹdjọeguo,
Ke me cha hwosa vwọ kẹ ivwighrẹn mẹ
Je hwosa vwọ kẹ ihwo ri vwo utuoma kpahen ovwẹ.
42 Me cha nẹrhẹ edada mẹ da ọbara vrẹ oma,
Ọlọkọ mẹ cha re uvwo,
Ọbara rẹ ihwo re hweri vẹ ihwo re mu reyọ,
Kugbe iyovwin rẹ isun rẹ ivwighrẹn na.’
43 Ghọghọ, ovwan ẹgborho na, vẹ ihwo rọyen,
Kidie ọ cha reihri rẹ ọbara rẹ idibo rọyen,
Ọ cha hwosa vwọ kẹ ivwighrẹn rọyen
O ji che ru arhuẹrẹ vwọ kẹ otọ rẹ ihwo rọyen.”
44 Ọtiọyena Mosis da rhe, ọ da vwanriẹn eta rẹ une nana eje vwọ kẹ ihwo na nyo, ọ vẹ Hoshia* ọmọ ri Nọn. 45 Mosis vwọ ta eta nana ejobi vwọ kẹ Izrẹl eje nu, 46 ọ da ta kẹ ayen: “Ovwan kọn eta rẹ orhọesio mẹ eje re me ta kẹ ovwan nonẹna phiyọ ubiudu rere ovwan vwẹ iji vwọ kẹ emọ rẹ ovwan, rẹ ayen vwọ jomaotọ ru nene eta rẹ Urhi nana eje. 47 Kidie ọnana dia ota ofefe vwọ kẹ ovwaan, ẹkẹvuọvo o mudiaphiyọ arhọ rẹ ovwan, womarẹ ota nana yen ovwan sa vwọ dia ọke grongron vwẹ otọ rẹ ovwan cha shariẹ Jọdan na vrẹ ra re ughwẹ rọyen na.”
48 Jihova da ta ota kẹ Mosis vwẹ ẹdẹ vuọvo nana, ọ da ta: 49 “Yerin kpo enu rẹ ugbenu rẹ Abarim nana, Ugbenu ri Nibo, rọhẹ otọ ri Moab, ro hirharoku Jẹriko, rere wo ni otọ ri Kenan re me cha vwọ kẹ ihwo rẹ Izrẹl kerẹ ughwẹ na. 50 Ku wo che ghwu vwẹ enu rẹ ugbenu wo che yerin na, ke che koko uwe bru ihwo wẹn ra,* kirobo rẹ Erọn oniọvo wẹn ghwuru vwẹ enu rẹ Ugbenu ri Họ, re de koko bru ihwo rọyen ra, 51 kidie ovwan ihwo ivẹ na fuevun kẹ vwẹ vwẹ ohri rẹ ihwo rẹ Izrẹl vwẹ asan ame ri Mẹriba ri Kedẹsh vwẹ aton ri Zinii, kidie ovwan ru vwe fon vwẹ obaro rẹ ihwo rẹ Izrẹẹl. 52 Wọ cha mrẹ otọ na vwẹ ugboko, ẹkẹvuọvo wọ cha ro otọ re me cha vwọ kẹ ihwo rẹ Izrẹl naa.”