Livitikọs

5 “‘Ọ da dianẹ ohwo* ru umwemwu kidie nẹ o nyo use rẹ azagba re vwo soseri,* jẹ ọyen oseri yẹrẹ ọ mrẹre yẹrẹ ọ riẹn kpahọn, jẹ ọ niyẹnrẹn rọyeen, ọ cha rioja fikirẹ oruchọ rọyen na.

2 “‘Yẹrẹ ohwo* da vwẹ obọ vwo te orọnvwọn ro jẹfuọn, owenẹ ọ dia orivwin rẹ eranvwe ro jẹfuọn rọ dia aghwa, eranvwe ro jẹfuọn rọ dia orere, yẹrẹ emama itete efa ri jẹfuọn re yan ẹkuẹko, ohwo na rha foon, ọ je riabe ọ da tobọ dianẹ ọ riẹnree. 3 Yẹrẹ ọ da dianẹ ohwo ọvo djobọte orọnvwọn ro jẹfuọn vwọrẹ jẹriẹn rọ nẹrhẹ ọ dia ohwo ro jẹfuọn, ọ da rhe riẹn kpahọn, ohwo tiọyena riabe.

4 “‘Yẹrẹ ohwo* de brokpakpa duvwun iyorin nẹ ọyen che ru orọnvwọn, owenẹ ọ dia erhuvwu yẹrẹ umiovwo yen o che ru, o toro obo rọ hephaa, jẹ ọ riẹnree, ẹkẹvuọvo ọ da rhe riẹn ukuko na nẹ ọyen brokpakpa duvwun iyorin, jẹ ọ riabe.*

5 “‘Ọ da riabe rẹ ọvo vwẹ usun rẹ erọnvwọn nana, kọ fan umwemwu rọyen. 6 Ọ je cha vwẹ izobo rẹ abe rọyen vwo rhe Jihova fikirẹ umwemwu ro ruru na, kọyen, ogodẹ aye otete, yẹrẹ ẹvwe aye otete yen o che vwo ze izobo rẹ umwemwu, orherẹn na mi ru arhuẹrẹ vwọ kẹ fikirẹ umwemwu rọyen na.

7 “‘Ọ da dianẹ ọ cha sa dẹ ogodẹẹ, ọ me vwẹ erurẹ itete ivẹ yẹrẹ ilekuku itete ivẹ vwo rhe Jihova kerẹ izobo rẹ abe rọyen vwọ kẹ umwemwu na, ọvo vwọ kẹ izobo rẹ umwemwu, ọvo vwọ kẹ izobo rẹ ẹtorhẹ. 8 Ọ me vwẹ ayen vwo rhe orherẹn na, orherẹn na me ka vwẹ ọ re che vwo ze izobo rẹ umwemwu na vwọ kpahotọ, ọ me sanvwe ẹbẹre ọvo rẹ ohọre rọyen no vwẹ obaro rọyen, jẹ o che bro noo. 9 Orherẹn na me fẹrẹn evo vwẹ usun rẹ ọbara rẹ izobo rẹ umwemwu na ku orhoma rẹ agbada na, ẹkẹvuọvo o mi ku ọbara ro chekọ na kuotọ kẹrẹ agbada na. Ọyen izobo rẹ umwemwu. 10 O mi ru ọ ro chekọ na kerẹ izobo rẹ ẹtorhẹ vwo nene obo re ruo wan jovwo; orherẹn na mi ru arhuẹrẹ vwọ kẹ fikirẹ umwemwu ro ruru na, ke vwo ghovwo.

11 “‘Ọ da dianẹ ọ sa dẹ erurẹ itete ivẹ yẹrẹ ilekuku itete ivẹẹ, ọ me vwẹ ẹkẹn ọvo rẹ ẹkẹn ihwe rẹ ovwanvwọ rẹ ifah* rẹ omamọ rẹ iflawa rhe vwọ kẹ izobo rẹ umwemwu rọyen. E jẹ o ku evwri phiyọ yẹrẹ vwẹ ifrankisẹnsi vwọ baa, kidie ọyen izobo rẹ umwemwu. 12 O mi vwo rhe orherẹn na, orherẹn na me ghwẹ obọ rọyen vọn vẹ evo vwẹ usun rọyen kerẹ ẹkẹn rẹ ẹkarophiyọ, ọ me nẹrhẹ o bru ivwirhi vwẹ agbada na, vwẹ enu rẹ izobo ri Jihova ra vwẹ erhanre torhẹ. Ọyen izobo rẹ umwemwu. 13 Orherẹn na ko che ru arhuẹrẹ kẹ fikirẹ umwemwu ro ruru na, ọ ro ruru vwẹ usun rẹ imwemwu nana, ke vwo ghovwo. Ọ ro chekọ vwẹ izobo na kọ dia ọ rẹ orherẹn na, kirobo re ru izobo rẹ eka na.’”

14 Jihova da ta kẹ Mosis kpobarophiyọ: 15 “Ohwo* de jẹ evun ẹfuọn womarẹ o vwo ru umwemwu vwọrẹ jẹriẹn vwọso erọnvwọn efuanfon ri Jihova, ọ me reyọ egbon rẹ oma rọyen gbare vwo nẹ ichuru rọyen vwo rhe Jihova kerẹ izobo rẹ abe; e bru uwan ri shẹkẹl rẹ idọnọ efuanfon rọyen vwo nene uwan ri shẹkẹl rẹ asan ọfuanfon na.* 16 Ọ cha hwosa fikirẹ umwemwu ro ru vwọso asan ọfuanfon na, ọ je cha vwẹ ẹkẹn ọvo rẹ ẹkẹn iyorin rẹ uchunu rọyen vwọ ba. Ọ cha vwọ kẹ orherẹn na, orherẹn na kọ cha vwẹ ogodẹ rẹ izobo rẹ abe na vwo ru arhuẹrẹ vwọ kẹ, ke vwo ghovwo.

17 “Ohwo* de ru umwemwu womarẹ o vwo ru ọvo vwẹ usun rẹ erọnvwọn rẹ Jihova ji iji rọyen nẹ e ruẹẹ na, ọ da tobọ dianẹ ọ riẹn kpahọọn, ọ je riabe, ọ cha rioja fikirẹ oruchọ rọyen na. 18 Ọ me reyọ egbon rẹ oma rọyen gbare, ro ji shephiyọ vẹ uwan re rorori na vwo nẹ ichuru rọyen rhe vwo rhe orherẹn na vwọ kẹ izobo rẹ abe. Orherẹn na ko che ru arhuẹrẹ vwọ kẹ fikirẹ oruchọ ro ruru vwọrẹ jẹriẹn na, ke vwo ghovwo. 19 Ọyen izobo rẹ abe. Vwọrẹ imuẹro, ọ riabe fikirẹ umwemwu ro ru vwọso Jihova.”