Iguẹdjọ

15 Ọmọke vwọ wan nu, vwẹ ọke rẹ orhọ rẹ iwiti, Samsin da yanran ra mrẹ aye rọyen, o mu ẹmẹvwe nene oma. Ọ da ta: “Me guọnọ bru aye mẹ ra vwẹ obo uvun na.”* Ẹkẹvuọvo ọsẹ rẹ aye na rhọnvwe kẹ nẹ ọ ro evun rọyeen. 2 Ọsẹ rẹ aye na da ta: “Mi rorori nẹ, ‘Wo che vwo utuoma kpahọn.’ Ọtiọyena me da vwọ kẹ ọvo vwẹ usun rẹ eshare ri nene uwe dia na. Oniọvo rọyen ọmọtẹ otete rhe vwo erhuvwu nọ? Biko reyọ ukperẹ ọyen.” 3 Ẹkẹvuọvo Samsin da ta kẹ ayen nẹ: “Udje nana ihwo ri Filistia na rha cha sa hanrhe ovwẹ nẹ me so omaẹwan vwọ kẹ ayeen.”

4 Ọtiọyena Samsin da yanran o de mu irhirako 300. Ọ da reyọ ituerhanre, ọ da gare irhurhu rẹ irhirako na vi ohwohwo, o de phi utuerhanre ọvo phiyọ uvwre rẹ irhurhu ivivẹ. 5 O de phi erhanre phiyọ ituerhanre na, o de siobọnẹ irhirako na ro evunrẹ idju rẹ eka rẹ ihwo ri Filistia na. Ọ da tọrhẹ erọnvwọn eje vwo nẹ ekrun rẹ eka ra gbare re te e ra je rhe kọrọọ, ọtiọyen ji te egba rẹ ivaini kugbe idju rẹ oliv.

6 Ihwo ri Filistia na da nọ: “Ono yen ru ọnana?” A da vuẹ ayen nẹ: “Samsin, ọgọ rẹ ohwo ri Timna na, kidie ọgọ rọyen na reyọ aye rọyen ọ da vwọ kẹ ọvo vwẹ usun rẹ eshare ri nenire dia na.” Ọtiọyena ihwo ri Filistia na da yanran, ayen da vwẹ erhanre torhẹ aye na vẹ ọsẹ rọyen. 7 Ọtiọyena Samsin da ta kẹ ayen nẹ: “Ọ da dianẹ enẹ yen ovwan hepha, me cha dobọjii bẹsiẹ me vwọ reihri.” 8 O de hwe ayen vọn otọ minimini, ọyena vwọ wan nu ọ da yanran ra dia unu rẹ oragha re se Itam.

9 Ọke vwọ yan obaro ihwo ri Filistia na da rhe, ayen de wonphiyọ* Juda, kẹ ayen yancha yankpo vwẹ Lihai. 10 Ọtiọyena eshare ri Juda da ta: “Diesorọ ovwan vwọ rhe rhe vwọso avwanre?” Ayen da kpahen nẹ: “Avwanre rhere rhi mu* Samsin, rere avwanre ruo kirobo ro ru avwanre.” 11 Ọtiọyena eshare ri Juda 3,000 da yan kpo asan unu rẹ oragha re se Itam na, ayen da ta kẹ Samsin nẹ: “Wọ rha riẹn nẹ ihwo ri Filistia na yen suẹn avwanre? Diesorọ wo vwo ru avwanre ọnana?” Ọ da ta kẹ ayen nẹ: “Kirobo rẹ ayen ru vwe, ọtiọyen mi ji ru ayen.” 12 Ẹkẹvuọvo ayen da ta kẹ nẹ: “Avwanre rhere rhi mu* we rere a vwẹ owẹ kpahotọ kẹ ihwo ri Filistia na.” Ọtiọyena Samsin da tanẹ: “Ovwan duvwun iyorin kẹ vwẹ nẹ ovwan komobọ cha vwẹ obọ te vwee.” 13 Ayen da ta kẹ nẹ: “Ẹjo, avwanre cha de gba wẹ je vwẹ owẹ kpahotọ kẹ ayen, ẹkẹvuọvo avwanre che hwe wee.”

Ọtiọyena ayen da vwẹ ifi kpokpọ ivẹ vwọ gba, ayen de muo vwo nẹ unu rẹ oragha na rhe. 14 Ọke ro vwo te Lihai, ihwo ri Filistia na vwọ mrẹ ayen de kperi ukperi rẹ ophikparobọ. Ọtiọyena ẹwẹn ri Jihova da kẹ ẹgba, ifi rehẹ abọ rọyen na da rhe dia kerẹ ẹbẹre amwa* ra vwẹ erhanre torhẹ, ifi ra vwọ gba abọ rọyen na de vwrẹ kufia. 15 Ọ da mrẹ ubeku kpokpọ rẹ ọhwa rẹ ekẹkẹtẹ ọshare; o de re gbabọ phiyọ, ọ da reyọ vwọ teyen eshare 1,000 hwe. 16 Ọtiọyena Samsin da tanẹ:

“Vẹ ubeku rẹ ọhwa rẹ ekẹkẹtẹ—ekrun ọvo, ekrun ivẹ!

Me reyọ ubeku rẹ ọhwa rẹ ekẹkẹtẹ vwọ teyen eshare 1,000 hwe.”

17 Ọke rọ vwọ ta ota nu, o de do ubeku rẹ ọhwa na kufia, o de se asan na Remat-lihai.* 18 Ọyena vwọ wan nu, urhuru rẹ ame ko sio mamọ, o de kperi se Jihova, ọ da tanẹ: “Wẹwẹ yen nẹrhẹ odibo wẹn phikparobọ vwẹ idjerhe rode nana. Ẹkẹvuọvo enẹna, mi gbe ghwu fikirẹ urhuru rẹ ame ro si vwe na, ji shephiyọ obọ rẹ ihwo re yanvweree na?” 19 Ọtiọyena Ọghẹnẹ de rhie unu ọvo rọhẹ Lihai phiyọ, ame da djẹ nẹ evun rọyen rhe. Ọke rọ vwọ da, ẹwẹn* rọyen de rhivwin o de gegẹrovi. Ọyensorọ ro vwo se asan na Ẹn-hakore* rọhẹ Lihai te ọke na.

20 O de guẹdjọ rẹ Izrẹl vwẹ ẹgbukpe 20 vwẹ ọke rẹ ihwo ri Filistia vwo suẹn otọ na.