Iguẹdjọ
14 Samsin de kpo Timna, ọ da mrẹ ọmọtẹ ri Filistia ọvo* vwẹ Timna. 2 Ọtiọyena ọ da yanran, ọ da vuẹ ọsẹ vẹ oni rọyen nẹ: “Vwẹ Timna, me mrẹ ọmọtẹ ri Filistia ọvo ro je vwe, me guọnọre nẹ ovwan reyọ kẹ vwẹ kerẹ aye.” 3 Ẹkẹvuọvo ọsẹ vẹ oni rọyen da ta kẹ nẹ: “Kọyen wọ mrẹ aye vuọvo vwẹ ohri rẹ ihwo rẹ orua wẹn kugbe ohri rẹ ihwo rẹ avwanre eje? Kẹ ohri rẹ ihwo ri Filistia re yanvweree na ọyen wọ da cha reyọ aye?” Ẹkẹvuọvo Samsin da ta kẹ ọsẹ rọyen: “Reyọ kẹ vwẹ kidie ọyen yen je vwe.”* 4 Ọsẹ vẹ oni rọyen riẹnre nẹ obọ ri Jihova yen ọnana nurhee, kidie ọ guọnọ uphẹn rọ vwọ reyọ vwọso ihwo ri Filistia, kidie ihwo ri Filistia na yen suẹn Izrẹl vwẹ ọke yena.
5 Ọtiọyena Samsin vẹ ọsẹ kugbe oni rọyen de kpo Timna. Ọke ro vwo te egba rẹ ivaini ri Timna, nighere! okpohrokpo ọvo* de bro rhe jẹ ọ guan. 6 Ọtiọyena ẹwẹn ri Jihova da kẹ ẹgba, ọ da bẹrẹ okpohrokpo na kpo ẹkẹn ivẹ kirobo rẹ ohwo vwẹ ababọ vwọ bẹrẹ ọmọ rẹ ẹvwe kpo ẹkẹn ivẹ. Ẹkẹvuọvo ọ vuẹ ọsẹ yẹrẹ oni rọyen obo ro ruru naa. 7 Samsin da yanran ra ta ota kẹ aye na, aye na yen ji je.
8 Ọke vwọ yan obaro, ro vwo rhivwin ra reyọ aye na kpo, ọ da vwẹriẹ re ni orivwin rẹ okpohrokpo na, ọ da mrẹ ekrun rẹ enyọn vẹ ame ọnyọn vwevunrẹ orivwin rẹ okpohrokpo na. 9 Ọtiọyena ọ da ghwiẹ ame ọnyọn na phiyọ abọ rọyen, ọ da rarọ rọ vwọ yanran na. Ọke rọ vwọ rhoma vwomaba ọsẹ vẹ oni rọyen, ọ da kẹ ayen rare. Ẹkẹvuọvo ọ vuẹ ayen nẹ vwevunrẹ orivwin rẹ okpohrokpo yen ọyen da ghwiẹ ame ọnyọn naa.
10 Ọsẹ rọyen da yan bru aye na ra, Samsin de chere emu vwẹ etiyin kidie ọyen oborẹ ighene eshare na ruẹ vwẹ ọke yena. 11 Ọke rẹ ayen vwọ mrẹ, ayen da reyọ eshare 30 rhe nẹ i nene dia. 12 Ọtiọyena Samsin da ta kẹ ayen: “Biko ji mi gbe ido ọvo kẹ ovwan. Ovwan da sa fan je vuẹ vwẹ otọ rọyen vwẹ uvwre rẹ ẹdẹ ighwrẹn rẹ emuẹriọ na, ke me cha vwẹ iwun rẹ obevun 30 kugbe iwun rẹ obotafe 30 vwọ kẹ ovwan. 13 Ẹkẹvuọvo ovwan rha sa vuẹ vwẹ otọ rọyeen, kẹ ovwan cha kẹ vwẹ iwun rẹ obevun 30 kugbe iwun rẹ obotafe 30.” Ayen da ta: “Gbe ido na kẹ avwanre; avwanre guọnọ nyo.” 14 Ọtiọyena ọ da ta kẹ ayen nẹ:
“Oma rẹ ọ rọ ria na, ọyen obo ra sa re nurhe,
Obo re goma yen obo re miẹmiẹ nurhe.”
Ayen sa fan otọ rẹ ido na vwẹ ẹdẹ erhaa. 15 Vwẹ ẹdẹ rẹne ayen da ta kẹ aye ri Samsin nẹ: “Phiẹn ọshare wẹn rere ọ vuẹ avwanre otọ rẹ ido na. Ọ rha dia ọtiọyeen, avwanre cha vwẹ erhanre torhẹ owẹ vẹ uwevwin rẹ ọsẹ wẹn. Wo durhie avwanre rhe etinẹ rhe reyọ ekuakua rẹ avwanre?” 16 Ọtiọyena aye ri Samsin da viẹ kẹ ọ da tanẹ: “Wo ghini vwo utuoma kpahen ovwẹ; wo vwo ẹguọnọ mẹẹ. Wo gbe ido ọvo vwọ kẹ ihwo mẹ, ẹkẹvuọvo wọ je rhe fan otọ rọyen kẹ vwẹẹ.” Ọtiọyena Samsin da ta kẹ: “Me tobọ vuẹ ọsẹ vẹ oni mẹ kpahọọn! Kẹ owẹ yen me cha vuẹ?” 17 Ẹkẹvuọvo ọ da viẹ kẹ vwẹ ẹdẹ ri chekọ rẹ emuẹriọ rẹ ẹdẹ ighwrẹn na eje. Ukuotọ rọyen, ọ da vuẹ vwẹ ẹdẹ righwrẹn na, kidie o kpokpiro mamọ. Etiyin aye na da vuẹ ihwo rọyen otọ rẹ ido na. 18 Ọtiọyena tavwen ọnre ki she* vwẹ ẹdẹ righwrẹn na, eshare rẹ orere na da ta kẹ nẹ:
“Die yen miẹmiẹ nọ ame ọnyọn,
Die yen goma nọ okpohrokpo?”
Ọ da kpahen kẹ ayen nẹ:
“Mane kẹ ovwan reyọ ọmọ rẹ erhuẹn mẹ vwo voroo,
Ovwan rha sa fan otọ rẹ ido mẹ naa.”
19 Ọtiọyena ẹwẹn ri Jihova da kẹ ẹgba, o de kpo Ashkẹlọn, ọ da teyen eshare rayen 30 hwe, ọ da reyọ iwun rayen, ọ da vwẹ iwun na vwọ kẹ ihwo re fan otọ rẹ ido na. O de rhivwin kpo uwevwin rẹ ọsẹ rọyen vẹ ophu ọgangan.
20 A da vwẹ aye ri Samsin vwọ kẹ ọvo vwẹ usun rẹ eshare ri nenire dia na.