Ẹyano

25 Jihova da ta kẹ Mosis: 2 “Vuẹ ihwo rẹ Izrẹl nẹ ayen toro utoro kẹ vwẹ; wọ me reyọ utoro mẹ mie kohwo kohwo rẹ ẹwẹn* rọyen muru. 3 Ọnana yen utoro ru wọ cha reyọ mie ayen: iro, idọnọ efuanfon, ẹrovwo, 4 oruru rẹ iblu, ẹton rẹ ogodẹ rẹ ipọpo,* amwa ọvwavware, amwa oyoyovwin, ẹton rẹ ẹvwe, 5 ophiẹn rẹ egbon ra vwẹ ikọlọ ọvwavware vwo gbe, ophiẹn rẹ eranvwe,* urhe rẹ akesha, 6 evwri vwọ kẹ irhukpẹ na, balsam vwọ kẹ evwri rẹ ẹjẹreyọ kugbe insẹnsi ro gbon phanphanphan na, 7 ibiukuta rẹ ọniks vẹ ibiukuta efa ra cha rhuẹrẹphiyọ ẹfọd na kugbe orhurhudu na. 8 Ayen cha bọn asan ọfuanfon vwọ kẹ vwẹ, ke me cha dia ohri rayen. 9 Ovwan mi ru itabanako na vẹ erọnvwọn eje ra vwọ rhuẹrẹ fia vwo nene ona ri mi che dje kẹ wẹ na dẹn.

10 “Ayen me vwẹ urhe rẹ akesha vwo ru ekpeti ọvo, ugrongron rọyen kubit* ivẹ gbubro, ohẹhẹre rọyen kubit ọvo gbubro, o mi rhe kpenu te kubit ọvo gbubro. 11 Wọ me vwẹ uvi rẹ oro vwọ pharọ, wọ me phare obevun vẹ obotafe rọyen, wọ me je ma oro vwo bru ona phiyọ unu rọyen riariẹ. 12 Wọ me vwẹ oro vwo duvwun isa ẹne rere wọ vwẹ ayen tamu obenu rẹ awọ ẹne rọyen, vwẹ isa ivẹ vwọ tamu ẹbẹre ọvo rere wọ vwẹ isa ivẹ vwọ tamu ẹbẹre ro chekọ na. 13 Wọ me vwẹ urhe rẹ akesha vwo ru ekpọ, wọ me vwẹ oro vwọ phare ayen. 14 Wo mi duvwun ekpọ na phiyọ isa rehẹ orhoma rẹ Ekpeti na rere a vwẹ ayen vwo mu Ekpeti na. 15 Ekpọ na cha dia evunrẹ isa rẹ Ekpeti na; e siẹ ayen noo. 16 Wo mi phi Oseri re me cha kẹ wẹ na phiyọ evunrẹ Ekpeti na.

17 “Wọ me vwẹ uvi rẹ oro vwo ru urhurho, ugrongron rọyen kubit ivẹ gbubro, ohẹhẹre rọyen ke rha kubit ọvo gbubro. 18 Wọ me reyọ oro vwo ru chẹrub ivẹ; wọ me vwẹ ihama vwo ru ayen phiyọ te obonẹ te obonẹ rẹ urhurho na. 19 Ru chẹrub na phiyọ oba ivẹ na, chẹrub ọvuọvo me dia te obonẹ te obonẹ rẹ urhurho na. 20 Chẹrub na me bẹrẹ ibekpe ivẹ rayen na kpenu, ayen me vwẹ ibekpe rayen vwo rhurhu urhurho na, ayen mi hirharoku ohwohwo. Chẹrub na mi hirhe opharo ku urhurho na. 21 Wọ me vwẹ urhurho na vwo rhurhu Ekpeti na, wo mi phi Oseri re me cha vwọ kẹ wẹ na phiyọ evunrẹ Ekpeti na. 22 Me cha vwomaphia kẹ wẹ vwẹ etiyin je ta ota kẹ wẹ vwo nẹ obenu rẹ urhurho na rhe. Vwo nẹ uvwre rẹ chẹrub ivẹ rehẹ enu rẹ ekpeti rẹ Oseri na rhe, yen me da cha nẹrhẹ wọ riẹn erọnvwọn eje ri mi che ji iji rọyen kẹ wẹ vwọ kẹ ihwo rẹ Izrẹl.

23 “Wọ je cha vwẹ urhe rẹ akesha vwo ru imẹjẹ ọvo, ugrongron rọyen kubit ivẹ, ohẹhẹre rọyen kubit ọvo, o mi rhe kpenu te kubit ọvo gbubro. 24 Wọ me vwẹ uvi rẹ oro vwọ pharọ, wọ me je ma oro vwo bru ona phiyọ igogo ẹne rẹ obenu rọyen riariẹ. 25 Wo mi phi orọnvwọn rọ hẹre te omarẹ inshisi 3* phiyọ obotọ rẹ ona ru wo bru phiyọ obenu rọyen riariẹ na, wọ me rha ma oro vwo bru ona phiyọ obotọ rẹ orọnvwọn na riariẹ. 26 Wọ me vwẹ oro vwo duvwun isa ẹne, wo mi phi isa na phiyọ igogo ẹne rọyen, asan rẹ awọ ẹne na hepha. 27 Isa na me kẹrẹ orọnvwọn re ru riariẹ imẹjẹ na phiyọ, kerẹ orọnvwọn re che duvwun ekpọ na phiyọ vwo mu imẹjẹ na. 28 Wọ me vwẹ urhe rẹ akesha vwo ru ekpọ na, wọ me vwẹ oro vwọ phare ayen rere a reyọ ayen vwo mu imẹjẹ na.

29 “Wo mi ji ru imize rọyen, iko rọyen, ijọgu rọyen, kugbe imize ikokodo rọyen rẹ ayen che vwo ku izobo rẹ udi. Wọ me vwẹ uvi rẹ oro vwo ru ayen. 30 Wo mi mu ibrẹdi re vwo dje na phiyọ imẹjẹ na vwẹ obaro mẹ ọkieje.

31 “Wọ me vwẹ uvi rẹ oro vwo ru ogburhukpẹ. Ogburhukpẹ na me dia obo ra vwẹ ihama vwo ru. Obotọ rọyen, ugbẹn rọyen, eghọn rọyen, iko rọyen, ipho rọyen, kugbe idodo rọyen me dia ọvo. 32 Eghọn esan che nẹ orhoma rẹ ogburhukpẹ na rhe, eghọn erha che kpo ẹbẹre ọvo, eghọn erha mi rhe kpo ẹbẹre ro chekọ. 33 Iko erha re họhọ ododo rẹ almọnd me dia eghọn rehẹ ẹbẹre ọvo vẹ ipho kugbe idodo re vwọ kpahen ohwohwo, iko erha re họhọ idodo rẹ almọnd me je dia eghọn rehẹ ẹbẹre ro chekọ na vẹ ipho kugbe idodo re vwọ kpahen ohwohwo. Enẹ yen oborẹ eghọn esan na che vwo nẹ ugbẹn rẹ ogburhukpẹ na rhe. 34 Iko ẹne re họhọ idodo rẹ almọnd hẹ ugbẹn rẹ ogburhukpẹ na vẹ ipho kugbe idodo re vwọ kpahen ohwohwo. 35 Ipho me dia obotọ rẹ eghọn ivẹ rẹsosuọ ri nẹ ugbẹn na rhe, ipho me dia obotọ rẹ eghọn ivẹ re vwọ kpahen ayen, ipho me je dia obotọ rẹ eghọn ivẹ re vwọ kpahen eyena, enẹ yen ọ cha dia vwọ kẹ eghọn esan ri nẹ ugbẹn na rhe na. 36 Ipho na vẹ eghọn na kugbe ọsoso rẹ ogburhukpẹ na me dia uvi rẹ oro ọvo ra vwẹ ihama vwo ru. 37 Wo mi ru irhukpẹ ighwrẹn phiyọ, ọke ra da vwẹ irhukpẹ na vwo mu, ayen mi lo mu asan rọhẹ obaro rọyen. 38 Orọnvwọn rọyen ra vwọ yọnrọn iwiki vẹ orọnvwọn rọyen ra vwọ torhẹ insẹnsi me dia obo ra vwẹ uvi rẹ oro vwo ru. 39 Wọ me vwẹ italẹnti ọvo* rẹ uvi rẹ oro vwo ruo vẹ ekuakua nana. 40 Jẹ o muwẹro nẹ wo ru ayen vwo nene ona re dje kẹ wẹ vwẹ enu rẹ ugbenu na.