Ẹyano
40 Ọyena vwọ wan nu, Jihova da ta kẹ Mosis: 2 “Vwẹ ẹdẹ rẹsosuọ rẹ emeranvwe rẹsosuọ na, wọ me bọn itabanako na, utughẹ ra da vwoma na. 3 Mu okọ rẹ Oseri na phiyọ evun rọyen, rere wọ vwẹ ikọtini vwọ hẹriẹ asan rẹ Okọ na hepha. 4 Wo mi mu imẹjẹ na ro evun rọyen, wọ me rhuẹrẹ ekuakua re cha dia enu rọyen phiyọ. Wo mi ji mu ogburhukpẹ na rhe, wọ me vwẹ irhukpẹ rọyen vwo mu. 5 Wo mi mu agbada rẹ oro ra da torhẹ insẹnsi na phiyọ obaro rẹ okọ rẹ Oseri na, rere wo phi obo re vwo gbere asan ra wan rua itabanako na phiyọ ẹdia rọyen.
6 “Wo mi mu agbada rẹ izobo rẹ ẹtorhẹ na phiyọ obaro rẹ asan ra wan rua itabanako na, utughẹ ra da vwoma na, 7 wo mi mu oze na phiyọ uvwre rẹ utughẹ ra da vwoma na vẹ agbada na rere wo ku ame phiyọ. 8 Wo de ru ọyena nu, gbe ru otegodo na riariẹ phiyọ rere wo phi obo re vwo gbere asan ra wan rua otegodo na phiyọ. 9 Wọ me rha reyọ evwri rẹ ẹjẹreyọ na, wo mi vwo ghworo itabanako na vẹ erọnvwọn eje rehẹ evun rọyen, wo mi ruo fon vẹ ekuakua rọyen eje rere ọ vwọ dia orọnvwọn ọfuanfon. 10 Wọ me vwẹ evwri ghworo agbada rẹ izobo rẹ ẹtorhẹ na vẹ ekuakua rọyen eje, wo mi ru agbada na fon rere ọ vwọ dia agbada rọ ma fon. 11 Wọ me je vwẹ evwri ghworo oze na vẹ awọ rọyen, wo mi ruo fon.
12 “Wo de ru ọyena nu, gba reyọ Erọn vẹ emọ rọyen kẹrẹ asan ra wan rua utughẹ ra da vwoma na, rere wọ vwẹ ame hworhẹ ayen. 13 Wo mi ku iwun rẹ orherẹn na phiyọ Erọn, wo mi ku evwri kuo ji ruo fon, kọ cha ga kerẹ orherẹn vwọ kẹ vwẹ. 14 Wo de ru ọyena nu, gba reyọ emọ rọyen rhe rere wo ku iwun igrongron phiyọ ayen. 15 Wo mi ku evwri ku ayen kirobo ru wo ku evwri ku ọsẹ rayen, rere ayen ga kerẹ irherẹn vwọ kẹ vwẹ, evwri ru wo ku kuẹ ayen na cha nẹrhẹ ayen dia irherẹn bẹdi bẹdẹ.”
16 Mosis ru erọnvwọn eje rẹ Jihova ji iji rọyen kẹ. Ọtiọyen o ghini ruo.
17 Vwẹ emeranvwe rẹsosuọ, vwẹ ukpe rivẹ, vwẹ ẹdẹ rẹsosuọ rẹ emeranvwe na, a da vwẹ itabanako na vwo vi. 18 Ọke rẹ Mosis vwọ vwẹ itabanako na vwo vi, o de phi inu rọyen phiyọ otọ, ọ da vwẹ ifremu na vwo vi, ọ da chọrọ ekpọ rọyen phiyọ, ọ da je vwẹ ichivwo rọyen vwo vi. 19 Mosis da vwẹ amwa rẹ utughẹ na vwo rhurhu itabanako na, ọ da vwẹ urhurho na vwo rhurhu amwa rẹ utughẹ na, kirobo rẹ Jihova ji iji rọyen kẹ.
20 Ọyena vwọ wan nu, ọ da reyọ Oseri na, o de phio phiyọ evunrẹ Okọ na, ọ da chọrọ ekpọ na phiyọ Okọ na, ọ da vwẹ urhurho rẹ Okọ na vwo rhurho. 21 Mosis de mu Okọ na phiyọ evunrẹ itabanako na, o de phi ikọtini rẹ ohẹriẹ na phiyọ ẹdia rọyen, ọ da hẹriẹ asan rẹ okọ rẹ Oseri na hepha, kirobo rẹ Jihova ji iji rọyen kẹ.
22 O vwo ru ọyena nu, o de mu imẹjẹ na phiyọ evunrẹ utughẹ ra da vwoma na, vwẹ ẹbẹre rẹ obohwẹre ọnre rẹ itabanako na vwẹ obaro rẹ ikọtini na, 23 ọ da rhuẹrẹ ibrẹdi re mu kpahen ohwohwo na phiyọ enu rọyen vwẹ obaro ri Jihova, kirobo rẹ Jihova ji iji rọyen kẹ Mosis.
24 O de mu ogburhukpẹ na phiyọ evunrẹ utughẹ ra da vwoma na, vwẹ obaro rẹ imẹjẹ na, vwẹ ẹbẹre rẹ obọrhen ọnre rẹ itabanako na. 25 Ọ da vwẹ irhukpẹ na vwo mu vwẹ obaro ri Jihova, kirobo rẹ Jihova ji iji rọyen kẹ Mosis.
26 O vwo ru ọyena nu, o de mu agbada rẹ oro na phiyọ evunrẹ utughẹ ra da vwoma na, vwẹ obaro rẹ ikọtini na, 27 rere ọ vwọ nẹrhẹ insẹnsi ro gbon phanphanphan bru ivwirhi vwẹ enu rọyen, kirobo rẹ Jihova ji iji rọyen kẹ Mosis.
28 O de phi obo re vwo gbere asan ra wan rua itabanako na phiyọ ẹdia rọyen.
29 O de mu agbada rẹ izobo rẹ ẹtorhẹ na phiyọ asan ra wan rua itabanako na, utughẹ ra da vwoma na, rere o se vwo ze izobo rẹ ẹtorhẹ na kugbe izobo rẹ eka na vwẹ enu rọyen, kirobo rẹ Jihova ji iji rọyen kẹ Mosis.
30 O de mu oze na phiyọ uvwre rẹ utughẹ ra da vwoma na vẹ agbada na, o de ku ame phiyọ. 31 Mosis kugbe Erọn vẹ emeshare rọyen da vwẹ ame na vwọ hworhẹ abọ vẹ awọ rayen. 32 Kọke kọke rẹ ayen da ro evunrẹ utughẹ ra da vwoma na yẹrẹ ayen de sikẹrẹ agbada na, ayen me hworhẹ abọ vẹ awọ rayen, kirobo rẹ Jihova ji iji rọyen kẹ Mosis.
33 Ukuotọ rọyen, ọ da vwẹ otegodo na vi riariẹ itabanako na vẹ agbada na phiyọ, o de phi obo re vwo gbere asan ra wan rua otegodo na phiyọ ẹdia rọyen.
Ọtiọyena Mosis de ruiruo na re. 34 Evwru na ko rhurhẹ utughẹ ra da vwoma na, urinrin ri Jihova da vọn itabanako na. 35 Mosis rha sa ro utughẹ ra da vwoma naa, kidie evwru na rhurhiro, urinrin ri Jihova vọn evunrẹ itabanako na.
36 Ọke rẹ evwru na de vrẹn nẹ enu rẹ itabanako na, ihwo rẹ Izrẹl mi vrẹn nẹ asan rẹ ayen wonphiyọ* vwẹ oyan rayen eje. 37 Ẹkẹvuọvo evwru na rhe vrẹn noo, ayen che vrẹn nẹ asan rẹ ayen wonphiyọ naa, rhirin re te ẹdẹ rẹ evwru na vwo vrẹn no. 38 Kidie evwru ri Jihova dia enu rẹ itabanako na vwẹ aruphẹn, erhanre me rha dia enu rọyen vwẹ ason, vwẹ irharo rẹ uwevwin rẹ Izrẹl eje vwẹ oyan rayen ejobi.