Ọrẹsosuọ re si Rhe Ihwo ri Kọrẹnt

13 Me da vwẹ ejajẹ rẹ ihworakpọ yẹrẹ ọ rẹ emekashe vwọ ta ota, jẹ mi vwo ẹguọnọ-ọ, kọyen mi hirhephiyọ agogo ra teyan yẹrẹ erọnvwọn re pha kerẹ imize ivẹ ra vwọ teyan ohwohwo. 2 Mi de vwo okẹ rẹ aroẹmrẹ ji vwo ẹruọ rẹ odjahọn efuanfon na eje kugbe erianriẹn eje, mi de ji vwo esegbuyota ro se ghwie igbenu, jẹ mi vwo ẹguọnọ-ọ, mẹvwẹ dia ohwo emuọvo-o.* 3 Me da vwẹ erọnvwọn ri mi vwori eje vwọ ghẹrẹ ihwo efa, mi de ji vwo owenvwe me vwọ vwẹ arhọ mẹ kpahotọ rere me sa vwọ yonma, jẹ mi vwo ẹguọnọ-ọ, mi vwo erere vuọvo-o.

4 Ẹguọnọ vwo edirin ji ruẹse. Ẹguọnọ rioma-a. Ọ yan eya-an, ọ kparoma-a, 5 o muẹ ruẹ-ẹ, ọ guọnọ erhuvwu romobọ rọyen ọvo-o, ọ fobọ muophu-u. O phiẹ oruchọ phiyọ evu-un. 6 Ọ ghọghọ fikirẹ obo re brare-e, ẹkẹvuọvo ọ ghọghọ fikirẹ uyota na. 7 O vwo edirin rẹ emu ejobi, o se emu ejobi gbuyota, o phiẹrophiyọ emu ejobi, o chirakon rẹ emu ejobi.

8 Ẹguọnọ vwoba-a. Ẹkẹvuọvo ọ da dianẹ okẹ rẹ aroẹmrẹ herọ, o che vwoba; ọ da dianẹ okẹ rẹ ejajẹ* herọ, o che vwoba; ọ da dianẹ okẹ rẹ erianriẹn herọ, o che vwoba. 9 Kidie erianriẹn rẹ avwanre gbare-e,* aroẹmrẹ rẹ avwanre je gba-a,* 10 Ẹkẹvuọvo, ọ rọ gbare na da rhe, ọ rọ gbare-e na ko che no. 11 Ọke re me vwọ hẹ omotete, me ta ota kerẹ omotete, mi roro kerẹ omotete, me fuẹrẹn erọnvwọn kerẹ omotete; jẹ mi vwo te omiragua re na, mi siobọnu iruemu rẹ omotete re. 12 Enẹna, avwanre mrorẹ phorophoro womarẹ ughegbe rẹ utehru, ẹkẹvuọvo vwẹ ọke yena avwanre cha mrorẹ fiotọ. Asaọkiephana, erianriẹn mẹ gbare-e, ẹkẹvuọvo vwẹ ọke yena erianriẹn mẹ cha gba kirobo rẹ Ọghẹnẹ riẹn vwẹ gbagba na. 13 Ẹkẹvuọvo vwẹ asaọkiephana, erha nana je herọ: esegbuyota, iphiẹrophiyọ, ẹguọnọ; jẹ ọ rọ ma rho vwẹ usun rayen yen ẹguọnọ.