Iruo rẹ Iyinkọn Na
12 Vwẹ ọke yena ovie Hẹrọd ko muẹkpahan ihwo evo vwevunrẹ ukoko na. 2 Ọ vwẹ ọlọkọ vwo hwe Jems rọ dia oniọvo ri Jọn. 3 Rọ vwọ mrẹ nẹ ọnana vwerhen ihwo ri Ju oma, o de ji re mu Pita. (Ọnana phiare vwẹ uvwre ọke rẹ orẹ rẹ Ibrẹdi ro Jephuo na.) 4 O de muo, o de do phiyọ uwodi, ọ da vwọ kẹ ẹko rẹ isodje ẹne nẹ e rhẹrẹ okpokpahọn, ẹko ọvuọvo vwo isodje ẹne, o vwo ẹwẹn rọ vwọ reyọ phia kẹ ihwo na* siẹrẹ e de ru Orẹ rẹ Ọwanvrẹ na nu. 5 Ọtiọyena Pita vwọ hẹ evunrẹ uwodi na, jẹ ukoko na nẹrhovwo gangan rhe Ọghẹnẹ fiki rọyen.
6 Vwẹ ason a ke mrẹ ẹdẹ ri Hẹrọd jiroro nẹ ọyen cha vwọ vwẹ Pita phia, jẹ Pita vwerhẹn, a vwẹ ejọnrọn ivẹ vwọ kanrọ vwẹ uherevie rẹ isodje ivẹ, jẹ ihwo re rhẹrẹ uwodi na mudia obaro rẹ ẹchẹ na. 7 Ẹkẹvuọvo nighere! amakashe ri Jihova* mudia etiyin, urhukpẹ ọvo de lo vwẹ uwodi na. Amakashe na da vwẹ obọ fa Pita, ọ da rhọvwọn, ọ da tanẹ: “Vrẹn kpakpata!” Ejọnrọn na de she nẹ abọ rọyen. 8 Amakashe na da ta kẹ nẹ: “Ku ewun wẹn phiyọ,* wo ji ku isabato wẹn phiyọ.” O de ru ọtiọyen. Ukuotọ rọyen, ọ da ta kẹ nẹ: “Ku ewun rẹ obotafe wẹn phiyọ wo nene uvwe.” 9 Ọ da yan phia, ko nene, ẹkẹvuọvo ọ riẹnre nẹ obo re phia womarẹ amakashe na ghini obo re phia vwẹ aruakpọ-ọ. Vwọrẹ uyota, o rorori nẹ ọyen mrẹ emramrẹ. 10 Ayen vwọ wanvrẹ ẹko rẹ isodje rẹsosuọ vẹ ọrivẹ re rhẹrẹ na nu, ayen de te anurhoro rẹ utehru ra wan rua evunrẹ orere na, ọyen ọvo de mu rhie kẹ ayen. Ayen vwọ ro otafe nu, ayen da ro evunrẹ urhuvwun ọvo, ugege yena amakashe na da yan jovwo. 11 Pita vwo vwo ẹruọ rẹ obo re phia na nu, ọ da tanẹ: “Asaọkiephana, me rhe riẹnre nẹ Jihova* yen ji amakashe rọyen rhe rhi sivwin uvwe vwo nẹ obọ rẹ Hẹrọd kugbe vwo nẹ erọnvwọn ejobi rẹ ihwo ri Ju rhẹro rọyen nẹ e cha phia.”
12 Rọ vwọ mrẹ ọnana vughe nu, o de kpo uwevwin ri Meri, oni ri Jọn re ji se Mak, asan rẹ imihwo evo da ghwẹ oma koko jẹ ayen nẹrhovwo. 13 Ọke rọ vwọ vwẹ obọ hworo ẹchẹ rẹ anurhoro na, odibo ọmọtẹ ọvo re se Roda da rhe kpahen kẹ. 14 Rọ vwọ mrẹvughe nẹ ọyen urhuru ri Pita, oma da vwerhọn gangan te ẹdia rẹ o rhe rhie ẹchẹ na-a, ẹkẹvuọvo ọ da djẹ rhivwin ra niyẹnrẹn nẹ Pita mudia anurhoro na. 15 Ayen da ta kẹ nẹ: “Wọ mwa orhuẹ.” Ẹkẹvuọvo ko siẹ nẹ ọtiọyen ọ hepha. Kẹ ayen tanẹ: “Amakashe rọyen.” 16 Ẹkẹvuọvo Pita mudia etiyin, ọ je vwẹ obọ hworo ẹchẹ na. Ọke rẹ ayen vwo rhie ẹchẹ na, ayen da mrẹ, o de gbe ayen unu. 17 Ẹkẹvuọvo ọ da vwẹ obọ vuẹ ayen nẹ ayen fotovwin, ọ da nabọ gbikun rẹ oborẹ Jihova* siro nẹ uwodi na wan kẹ ayen, ọ da tanẹ: “Ovwan niyẹnrẹn rẹ erọnvwọn nana kẹ Jems vẹ iniọvo na.” Ọtiọyena ọ da ro otafe, o de kpo asan ọfa.
18 Asaọkiephana ọke vwo rhie, isodje na ki ruẹ gedegede kpahen obo re phia kẹ Pita. 19 Hẹrọd da nabọ frẹkotọ guọnọ, ẹkẹvuọvo ọ mrẹrẹ-ẹ, ọ da nọ ihwo re rhẹrẹ na enọ, o de jurhi nẹ a ra vwẹ oja re ayen; o de vrẹn nẹ Judia kpo Sizaria, ọ da ghwọrọ ọmọke vwẹ oboyin.
20 Asaọkiephana ophu muo gangan* kpahen ihwo ri Taya kugbe Saidọn. Ayen de bro rhe vẹ ẹwẹn ọvo, ayen vwo nene Blastọs rọ vwẹrote irueru rẹ evwruwevwin rẹ ovie na ta ota nu, ayen da tanẹ ayen guọnọ arhuẹrẹ, kidie otọ rẹ ovie na yen e muẹ emuọre rẹ ẹkuotọ rayen nẹcha. 21 Vwẹ ẹdẹ ọvo, Hẹrọd de ku ewun rẹ ovie rọyen phiyọ, o de chidia agbara rẹ ẹdjọeguo na, kọ ta ota kẹ ihwo na. 22 Ọtiọyena ihwo ri kokori na ki kperẹ phia nẹ: “Urhuru rẹ Ọghẹnẹ, ọ dia ọ rẹ ohworakpọ-ọ!” 23 Ugege yena, amakashe ri Jihova* da ghwiẹ, kidie ọ vwẹ urinrin na kẹ Ọghẹnẹ-ẹ, ihori da riọ, o de ghwu.
24 Ẹkẹvuọvo ota ri Jihova* kọ hẹrẹphiyọ, ihwo buebun ki ji segbuyota.
25 Vwọ kẹ Banabas vẹ Sọl, ayen vwọ nabọ ruiruo rẹ ukẹcha na re nu vwẹ Jerusalẹm, ayen de rhivwin, ayen da reyọ Jọn re ji se Mak nene oma.