Luk

18 Ọyena vwọ wan nu, o de ru udje ọvo kẹ ayen kpahen oboresorọ ayen vwọ nẹrhovwo ọkieje, ofu vwo jẹ ayen e dje, 2 ọ da tanẹ: “Vwevunrẹ orere ọvo, oguẹdjọ ọvo herọ rọ djoshọ rẹ Ọghẹnẹ-ẹ, o ji muọghọ kẹ ohworakpọ-ọ. 3 Ayeuku ọvo jehẹ evunrẹ orere yena ro bro ra kọke kọke rọ vwọ tanẹ, ‘Brorhiẹn ọsoso vwẹ uvwre mẹ vẹ ohwo ro nene uvwe guẹdjọ na.’ 4 Vwẹ uvwre rẹ ọke evo, o vwo owenvwe ro vwo ru ọtiọye-en, ẹkẹvuọvo ọke vwọ yan obaro, ọ da ta kẹ oma rọyen nẹ, ‘Dede nẹ me djoshọ rẹ Ọghẹnẹ yẹrẹ muọghọ kẹ ohworakpọ vuọvo-o, 5 jẹ kidie nẹ ayeuku nana dje uvwe ekpekpokpo na, me cha mrẹvughe nẹ e brorhiẹn ọsoso kẹ rere o vwo juvwe ebro cha ọfa, ofu rẹ oyare rọyen na de rhi dje vwe hwe.’” 6 Ọrovwori na da tanẹ: “Ovwan nyo oborẹ oguẹdjọ na tare dede nẹ ọ dia ọvwata-a! 7 Kẹ o rhe mu ovwan ẹro nẹ Ọghẹnẹ cha nẹrhẹ e brorhiẹn ọsoso vwọ kẹ ihwo rọ jẹreyọ ri kperẹ se te ason te uvo, jẹ o vwo edirin rayen? 8 Me ta kẹ ovwan nẹ, ọ cha nẹrhẹ e brorhiẹn ọsoso kẹ ayen kpakpata. Dedena ọke rẹ Ọmọ rẹ ohwo da rhe, ọ cha ghene mrẹ esegbuyota nana* vwẹ akpọ na?”

9 O de ji ru udje nana vwọ kẹ ihwo evo re vwẹroso ophiọnphiọn romobọ rayen, ri ji nẹ ihwo efa nẹ ayen fiemu-u: 10 “Eshare ivẹ kpo evunrẹ uwevwin rẹ ẹga na ra nẹrhovwo, ọvo ohwo ri Farisi, ọ ro chekọ, ohwo ro phi osa uyovwin. 11 Ohwo ri Farisi na de mudia, kọ nẹrhovwo rọ vwọ ta eta nana kẹ oma rọyen, ‘E Ọghẹnẹ, me kpẹvwẹ owẹ nẹ me họhọ ihwo efa-a—igborhugborho, ihwo re dia evwata-a, igberadja—me tobọ họhọ ohwo nana ro phi osa uyovwin na-a. 12 Mi chiri owẹnvwe abọ ivẹ vwẹ udughwrẹn, me hwa ẹkẹn ọvo rẹ ẹkẹn ihwe rẹ erọnvwọn ejobi ri mi vwori.’ 13 Ẹkẹvuọvo ohwo ro phi osa uyovwin na mudia asan oshesheri, ọ tobọ guọnọ kpare ẹro rọyen kpenu vwo ni odjuvwu-u, ẹkẹvuọvo kọ teyan udu rọyen rọ vwọ tanẹ, ‘E Ọghẹnẹ, gbe arodọnvwẹ kẹ vwẹ, mẹvwẹ orumwemwu.’ 14 Me ta kẹ ovwan nẹ, ọshare nana kpo uwevwin rọyen, e de dje phiyọ ọvwata vwọ vrẹ ohwo ri Farisi yena. Kidie kohwo kohwo rọ kpare oma rọyen kpenu, a cha phọphọ, ẹkẹvuọvo kohwo kohwo rọ vwẹ oma rọyen kpotọ, a cha kparọ kpenu.”

15 Asaọkiephana ihwo ki ji muẹ emeboba rayen bro ra rere o djobọte ayen, ẹkẹvuọvo ọke rẹ ayen vwọ mrẹ ọnana, idibo na ke ghwọkuẹ ayen. 16 Ẹkẹvuọvo Jesu de se emeboba na te oma, ọ da tanẹ: “Ovwan jẹ imitete na bru vwe rhe, ovwan davwẹngba rẹ ovwan vwọ dobọ rayen ji-i, kidie Uvie rẹ Ọghẹnẹ na ọ rẹ ihwo tiọyena. 17 Uyota me ta kẹ ovwan nẹ, kohwo kohwo ro rhiabọreyọ Uvie rẹ Ọghẹnẹ na kerẹ omotete-e, o vwo ọke vuọvo rọ cha vwọ ruọ-ọ.”

18 Ọvo vwẹ usun rẹ isun na da nọ nẹ: “Oyono esiri, die yen mi che ru rere mi se vwo vwo arhọ ri bẹdẹ?” 19 Jesu da ta kẹ nẹ: “Diesorọ wo vwo se vwe ọresiri? O vwo ohwo vuọvo rọ dia ọresiri-i, jokparẹ Ọghẹnẹ ọvo. 20 Wọ riẹn iji na: ‘Wo gbe igberadja-a, wo hwe ohwo-o, wo chuji-i, wo soseri rẹ efia-an, muọghọ kẹ ọsẹ wẹn vẹ oni wẹn.’” 21 Ọ da tanẹ: “Nẹ ọke rẹ eghene mẹ rhe yen mi vwo ruẹ enana eje.” 22 Ọke ro vwo nyo ọyena nu, Jesu da ta kẹ nẹ, ‘O ji vwo emu ọvo ru wo ji rhi ru-u: Shẹ erọnvwọn eje ru wo vwori, wọ ghare igho na vwọ kẹ igbere, ku wo che vwo efe vwẹ idjuvwu; gba yanrhe wọ rhe dia odibo mẹ.” 23 Ọke ro vwo nyo ọnana, o de muomaphiyọ gangan, kidie o feri mamọ.

24 Jesu de no, ọ da tanẹ: “Ọ cha bẹn rẹ ihwo ri vwo igho vwọ ro Uvie rẹ Ọghẹnẹ na! 25 Vwọrẹ uyota, ọ lọhọre rẹ ikamẹl vwọ wan ẹro* rẹ ukoti* re vwo ko emwa vwọ vrẹ ọ rẹ ọdafe vwọ ro Uvie rẹ Ọghẹnẹ na.” 26 Ihwo ri nyo ọnana da tanẹ: “Kẹ ono yen se sivwin rhọ?” 27 Ọ da tanẹ: “Erọnvwọn rẹ ihworakpọ che se ru-u, Ọghẹnẹ se ru ayen.” 28 Ẹkẹvuọvo Pita da tanẹ: “Nighere! Avwanre yanjẹ erọnvwọn rẹ avwanre vwo, avwanre de nene uwe.” 29 Ọ da ta kẹ ayen nẹ: “Uyota me ta kẹ ovwan nẹ, o vwo ohwo vuọvo rọ yanjẹ uwevwin yẹrẹ aye yẹrẹ iniọvo eshare yẹrẹ ọsẹ vẹ oni yẹrẹ emọ vwo fikirẹ Uvie rẹ Ọghẹnẹ na 30 ro che jẹ ayen evwo abọ buebun vwẹ uvwre ọke nana-a, kugbe arhọ ri bẹdi bẹdẹ vwẹ eyeren* rọ cha na.”

31 Ọyena vwọ wan nu, ọ da reyọ Ihwivẹ na kpo ọkọkọ, ọ da ta kẹ ayen nẹ: “Nighere! Avwanre kpo Jerusalẹm, erọnvwọn ejobi re si kpahen Ọmọ rẹ ohwo womarẹ emraro na che rugba. 32 Kerẹ udje, e che phio phiyọ obọ rẹ ihwo rẹ ẹgborho na, ayen cha reyọ vwọ jehwẹ,* gboja kẹ ji dje enya kuo. 33 Ọke rẹ ayen da fa nu, kẹ ayen che hwe, ẹkẹvuọvo vwẹ ẹdẹ rerha, ko che vrẹn.” 34 Dedena ayen vwo ẹruọ rẹ ọvuọvo vwẹ usun rẹ eta nana-a, kidie e si eta nana nu kẹ ayen, ayen rhe vwo ẹruọ rẹ erọnvwọn rọ tare na-a.

35 Asaọkiephana ri Jesu vwo siẹkẹrẹ Jẹriko re, ọshare ọvo ro rhuẹro chidia orhoma rẹ idjerhe na, ọ yara emu. 36 Kidie nẹ o nyo edo rẹ otu re wanvrẹ, kọ nọ kpahen obo re phia. 37 Ayen da vuẹ nẹ: “Jesu ohwo ri Nazarẹt na yen wanvrẹ!” 38 Ọtiọyena o de kperi phia nẹ: “Jesu, Ọmọ ri Devid, gbe arodọnvwẹ kẹ vwẹ!” 39 Ihwo ri mudia obaro ke ghwọkuo rẹ ayen vwọ vuẹ nẹ o fotovwin, ẹkẹvuọvo kọ rhoma kperẹ ganphiyọ nẹ: “Ọmọ ri Devid, gbe arodọnvwẹ kẹ vwẹ!” 40 Ọtiọyena Jesu da domaji, ọ da tanẹ a reyọ ọshare na rhe. Ọke ro vwo sikẹrẹ, Jesu da nọ nẹ: 41 “Die yen wọ guọnọre nẹ mi ru kẹ wẹ?” Ọ da tanẹ: “Ọrovwori, juvwe rhoma mrorẹ.” 42 Ọtiọyena Jesu da ta kẹ nẹ: “Gba rhoma mrorẹ; esegbuyota wẹn nẹrhẹ oma wẹn gan nure.” 43 Ugege yena, ọ da rhoma mrorẹ, ko nene, jẹ ọ vwẹ urinrin kẹ Ọghẹnẹ. Vwọba, ọke rẹ ayen vwọ mrẹ, ihwo na eje de jiri Ọghẹnẹ.