Jẹnẹsis
21 Jihova da karophiyọ Sera kirobo rọ tare, Jihova de ru obo ro veri vwọ kẹ Sera. 2 Ọtiọyena Sera da mrevun, o de vwiẹ ọmọshare kẹ Ebraham vwẹ ọke ọghwo rọyen, vwẹ ọke rẹ Ọghẹnẹ ve kẹ. 3 Ebraham de se ọmọboba rọyen rẹ Sera vwiẹ kẹ na, Aizik. 4 Ebraham da yanvwe ọmọ rọyen Aizik ọke ro vwo te ẹdẹ ẹrenren, kirobo rẹ Ọghẹnẹ ji iji kẹ. 5 Ebraham hẹ ẹgbukpe 100 ọke re vwo vwiẹ ọmọ rọyen Aizik kẹ. 6 Sera da ta: “Ọghẹnẹ nẹrhẹ ovwẹ hwẹ re; kohwo kohwo ro nyo kpahọn ko nene uvwe hwẹ.”* 7 Vwọba, ọ da ta: “Ono yen rha ta kẹ Ebraham jovwo nẹ, ‘Sera che ghini vwiẹ emọ’? Dedena mi vwiẹ ọmọshare kẹ vwẹ ọke ọghwo rọyen.”
8 Asaọkiephana ọmọ na da rho, o de bru evie, Ebraham de muegbe rẹ orẹ rode vwẹ ẹdẹ rẹ Aizik bru evie na. 9 Ẹkẹvuọvo Sera ko nosua nẹ ọmọ ri Hega rẹ ohwo rẹ Ijipt na vwiẹ kẹ Ebraham na reyọ Aizik vwọ jehwẹ. 10 Ọtiọyena ọ da ta kẹ Ebraham: “Djẹ odibo ọmọtẹ nana vẹ ọmọ rọyen na phia, kidie ọmọ rẹ odibo ọmọtẹ nana vẹ ọmọ mẹ Aizik cha dia iriuku kugbee!” 11 Ẹkẹvuọvo obo rọ ta kpahen ọmọ rọyen na miovwo Ebraham ivun mamọ. 12 Ọtiọyena Ọghẹnẹ da ta kẹ Ebraham: “Wo jẹ ivun miovwo uwe fikirẹ oborẹ Sera vuẹ wẹ kpahen ọmọ na kugbe odibo ọmọtẹ wẹn naa. Kerhọ rọyen,* kidie ọ re che se ọmọ* wẹn na, oma rẹ Aizik yen o che nurhe. 13 Vwọ kpahen ọmọ rẹ odibo ọmọtẹ na, mi ji che ruo rere ẹgborho nẹ oma rọyen rhe, kidie ọyen ọmọ* wẹn.”
14 Ọtiọyena Ebraham de vrẹn vwẹ edegburhiọke, ọ da reyọ ibrẹdi vẹ ọtoto* rẹ ame, ọ da vwọ kẹ Hega. O de mu ayen kpahen igabọ rọyen, o de siobọno vẹ ọmọshare na. Ọ da yanran, ko beghe vwevunrẹ aton ri Biẹ-shiba. 15 Ukuotọ rọyen, ame rọhẹ evunrẹ ọtoto rẹ ame na de re, o de genre ọmọ na phiyọ otọ rẹ ọvo vwẹ usun rẹ imirhe na. 16 Ọtiọyena ọ da yanran, o de chidia ọ robọ rọyen vwẹ omarẹ ugbo ra sa sa umurhabọ sheri te, kidie ọ tare: “Me guọnọ mrẹ ọmọ na ọke ro de ghwẹẹ.” Ọtiọyena o de chidia vwẹ ugboko, ko kperẹ phia jẹ ọ viẹ.
17 Ọtiọyena Ọghẹnẹ de nyo urhuru rẹ ọmọ na, amakashe rẹ Ọghẹnẹ de se Hega nẹ idjuvwu na rhe, ọ da ta kẹ: “Die yen ru we, Hega? Wọ djoshọọ, kidie Ọghẹnẹ nyo urhuru rẹ ọmọ na vwẹ asan rọ hepha na re. 18 Vrẹn, kpare ọmọ na, wọ yọnrọn obọ rọyen, kidie me cha nẹrhẹ ọ dia ẹgborho rode.” 19 Ọtiọyena Ọghẹnẹ de rhiẹro rọyen, ọ da mrẹ orhare ame ọvo, ọ da yanran, o de vo ọtoto rẹ ame na vọn vẹ ame, ọ da kẹ ọmọ na ame da. 20 Ọghẹnẹ vẹ ọmọ na da dia rọ vwọ rhua na. Kọ dia evunrẹ aton na, ọ da rhe dia ohwo rọ sa umurhabọ. 21 Kọ dia evunrẹ aton ri Peran, oni rọyen da reyọ aye kẹ vwo nẹ otọ rẹ Ijipt rhe.
22 Vwẹ ọke yena, Abimẹlẹk vẹ Faikọl rọ dia onotu rẹ isodje rọyen da ta kẹ Ebraham: “Ọghẹnẹ vẹ owẹ herọ vwẹ kemu kemu ru wo ruẹ. 23 Asaọkiephana gba vwẹ Ọghẹnẹ vwo duvwun iyorin kẹ vwẹ vwẹ etinẹ na, nẹ wo che ru vwe vẹ emọ mẹ kugbe uvwiẹ mẹ obo re braree, nẹ wo che dje ẹguọnọ ro jẹ rhẹriẹ vuọvo ri mi dje kẹ wẹ na, vwọ kẹ vwẹ vẹ otọ ru wọ dia na.” 24 Ọtiọyena Ebraham da ta: “Mi duvwun iyorin kpahen ọnana.”
25 Ẹkẹvuọvo Ebraham de brenu kẹ Abimẹlẹk kpahen orhare ame rẹ idibo rẹ Abimẹlẹk vwẹ ẹgba vwọ reyọ mie. 26 Abimẹlẹk da kpahen: “Me riẹn ohwo ro ru ọnanaa; wọ vuẹ vwẹ kpahọọn, nonẹna yen mi tu vwo nyo kpahọn mie we na.” 27 Ọtiọyena Ebraham da reyọ igodẹ vẹ erhuẹn, ọ da vwẹ ayen kẹ Abimẹlẹk, ayen ihwo ivẹ na da re ọphọ. 28 Ọke rẹ Ebraham vwọ hẹriẹ igodẹ eya ighwrẹn vwo nẹ ichuru na, 29 Abimẹlẹk da ta kẹ Ebraham: “Diesorọ wọ vwọ hẹriẹ igodẹ eya ighwrẹn nana vwo nẹ i ri chekọ na?” 30 Ọtiọyena ọ da ta: “Wọ cha reyọ igodẹ eya ighwrẹn na mie vwe rere ọ vwọ dia oseri nẹ mẹvwẹ yen tọn orhare nana.” 31 Kọyensorọ o vwo se asan na Biẹ-shiba,* kidie ayen ihwo ivẹ na duvwun iyorin vwẹ etiyin. 32 Ọtiọyena ayen da re ọphọ vwẹ Biẹ-shiba, ayen vwo ru ọtiọyen nu, Abimẹlẹk vẹ Faikọl rọ dia onotu rẹ isodje rọyen de vrẹn, ayen de rhivwin kpo otọ rẹ ihwo ri Filistia. 33 Ọyena vwọ wan nu, ọ da kọn urhe ri tamarisk vwẹ Biẹ-shiba, o de se odẹ ri Jihova, Ọghẹnẹ ri bẹdẹ na vwẹ etiyin. 34 Ebraham da dia* otọ rẹ ihwo ri Filistia vwẹ ọke grongron.*