Jẹnẹsis
15 Ọnana vwọ wan nu, ota ri Jihova de bru Ebram rhe vwẹ emramrẹ, ọ da ta: “Wo jẹ oshọ mu wee, Ebram. Mẹvwẹ ekpọfia kẹ wẹ. Osa wẹn cha rho gangan.” 2 Ebram da kpahen: “Ọrovwori ro Me Kpenu Jihova, die yen wọ cha vwọ kẹ vwẹ, rọ vwọ dianẹ mi ji rhi vwo ọmọọ na, Ẹlihiza rọ dia ohwo ri Damaskọs yen cha riuku rẹ uwevwin mẹ?” 3 Vwọba, Ebram da ta: “Wọ kẹ vwẹ ọmọ* vuọvoo, ohwo* ọvo vwevunrẹ evwruwevwin mẹ yen cha reyọ ẹdia mẹ kerẹ ọriuku.” 4 Ẹkẹvuọvo nighere! Ẹkpahọnphiyọ rẹ Jihova vwọ kẹ, kẹ ọna, “Ọshare nana cha reyọ ẹdia wẹn kerẹ ọriukuu, ẹkẹvuọvo ọmọ robọ wẹn* yen cha reyọ ẹdia wẹn kerẹ ọriuku.”
5 Asaọkiephana ọ da reyọ kpo otafe, ọ da ta: “Kpare opharo wẹn kpenu, biko, wo ni idjuvwu na rere wo kere isio na, sẹ wo se ru ọtiọyen.” Ọ da ta kẹ: “Ọtiọyen emọ* wẹn cha dia.” 6 O de vwo esegbuyota kpahen Jihova, O* de kere phiyọ ọvwata. 7 Vwọba, ọ da ta: “Mẹvwẹ Jihova rọ reyọ owẹ nẹ Ọr rẹ ihwo ri Kaldia rhe, rere me vwọ kẹ wẹ otọ nana kerẹ ughwẹ.” 8 Ọtiọyena ọ da ta: “Ọrovwori ro Me Kpenu Jihova, mavọ me cha vwọ riẹn nẹ me cha re ughwẹ rọyen?” 9 Ọ da kpahen kẹ: “Reyọ ọmọ rẹ erhuẹn rẹ ẹgbukpe erha, ẹvwe rẹ aye rẹ ẹgbukpe erha, egbon rẹ ẹgbukpe erha, erurẹ ọvo kugbe ilekuku otete ọvo.” 10 Ọtiọyena ọ da reyọ enana eje, o de bru ayen ivivẹ, ọ da rhuẹrẹ ayen hirharoku ohwohwo, ẹkẹvuọvo o bru emephran naa. 11 Ephran ride ke rhan muẹ eranvwe ro hweri na, ẹkẹvuọvo Ebram kọ djẹ ayen no.
12 Ọnre na vwo kpotọ re, ovwerhẹn okokodo de mu Ebram, ebri rode ro ji muoshọ de rhurho. 13 Ọtiọyena Ọ da ta kẹ Ebram: “Riẹn nẹ emọ* wẹn cha dia erhorha vwẹ otọ rọ dia ọrayeen, ihwo rehẹ etiyin cha vwẹ ayen ru eviẹn, ayen me vwẹ oja re ayen vwẹ ẹgbukpe 400. 14 Ẹkẹvuọvo me cha reyọ ẹgborho rẹ ayen cha ga na vwo guẹdjọ, ọyena da wan nu, kẹ ayen che vrẹn nẹ etiyin vẹ ekuakua buebun. 15 Vwọ kẹ wẹ, wo che bru esẹ wẹn ride ra vwọrẹ ufuoma; e che shi we ọke wọ da ghwo yẹghẹyẹghẹ re. 16 Ẹkẹvuọvo ayen che rhivwin rhe etinẹ vwẹ uvwiẹ rẹne na, kidie orukuruku rẹ ihwo rẹ Amọ ji rhi bun tee.”
17 Ọnre na vwo she nu, rẹ asan ejobi ji vwo muebri gangan re, erhanre ro brẹ ivwirhi da vwomaphia, erhanre rọ la da ro ohri rẹ eranvwe ro bruru na. 18 Vwẹ ẹdẹ yena Jihova de nene Ebram re ọphọ, rọ vwọ ta: “Me cha reyọ otọ nana vwọ kẹ emọ* wẹn, vwo nẹ urhie rẹ Ijipt re te urhie rode na, urhie ri Yufretis: 19 otọ rẹ ihwo ri Kẹn, ihwo ri Kẹniz, ihwo ri Kadmọn, 20 ihwo ri Hẹt, ihwo ri Pẹriz, ihwo ri Rẹfeim, 21 Ihwo rẹ Amọ, ihwo ri Kenan, ihwo ri Giga, kugbe ihwo ri Jẹbus.”