Ọbe rẹsosuọ ri Samuẹl
20 Ọtiọyena Devid da djẹ nẹ Naiọt vwẹ Rema. Ẹkẹvuọvo o de bru Jonatan rhe, ọ da tanẹ: “Die yen mi ruru? Die yen mi ru chọ, umwemwu vọ yen mi ru vwọso ọsẹ wẹn rọ vwọ guọnọ arhọ* mẹ reyọ na?” 2 Ọtiọyena Jonatan da ta kẹ nẹ: “Ọ cha sa phiaa! Wo che ghwuu. Nighere! Ọsẹ mẹ che ru emu vuọvo ro de juvwe ẹvuẹ kpahọọn, owenẹ ọ dia ọrode yẹrẹ otete. Diesorọ ọsẹ mẹ vwo si ọnana nu kẹ vwẹ? Ọnana cha phiaa.” 3 Ẹkẹvuọvo Devid da je tanẹ: “Vwọrẹ uyota ọsẹ wẹn riẹnre nẹ me mrẹ ẹroesiri wẹn re, ọ me tanẹ, ‘We jẹ Jonatan riẹn kpahan ọnanaa, ivun de rhi miovwo.’ Ẹkẹvuọvo Jihova vwọ herọ na, rẹ wọ* je vwọ herọ na, ughwu kọyen me kparo mrẹ na!”
4 Ọtiọyena Jonatan da ta kẹ Devid nẹ: “Kemu kemu ru wọ tare* mi che ruo kẹ wẹ.” 5 Devid da ta kẹ Jonatan nẹ: “Odẹ rọ cha na yen ẹdẹ rẹ orẹ rẹ emeranvwe kpokpọ, ofori nẹ mi nene ovie na chidia riemu; juvwe yanran, ki mi che re siomanu vwẹ aghwa na bẹsiẹ ovwọnvwọn rẹ ẹdẹ rerha na vwo te. 6 Ọ da dianẹ ọsẹ wẹn nokpẹn mẹ, gba tanẹ, ‘Devid rẹ vwẹ nẹ me kẹ ọyen uphẹn rere ọyen brokpakpa kpo Bẹtlẹhẹm orere rọyen, kidie o vwo izobo rẹ kukpe kukpe rẹ orua na eje che ze vwẹ oboyin.’ 7 Ọ da kpahen nẹ, ‘Oyoma,’ jẹ ọyena mudiaphiyọ ufuoma kẹ odibo wẹn. Ẹkẹvuọvo ivun de miovwo, gba riẹn nẹ o muegbe rọ vwọ wan vwẹ oma. 8 Dje ẹguọnọ ro jẹ rhẹriẹ kẹ odibo wẹn, kidie wẹ vẹ odibo wẹn vwẹ odẹ ri Jihova re ọphọ nure. Ẹkẹvuọvo ọ da dianẹ me riabe, wẹ komobọ teyen ovwẹ hwe. Diesorọ wọ vwọ vwẹ ovwẹ kpahotọ kẹ ọsẹ wẹn?”
9 Ọtiọyena Jonatan da tanẹ: “Me cha sa jiroro ọtiọyen kpahen owẹẹ! Me da riẹn nẹ ọsẹ mẹ brorhiẹn rọ vwọ wan wẹ oma, me rha vuẹ wẹ?” 10 Devid da ta kẹ Jonatan nẹ: “Ono yen cha vuẹ vwẹ sẹ ọsẹ wẹn kẹ wẹ ẹkpahọnphiyọ ri gbagbagba?” 11 Jonatan da ta kẹ Devid nẹ: “Yanrhe, jẹ a ro evunrẹ aghwa na.” Ọtiọyena ayen ihwo ivẹ da ro evunrẹ aghwa na. 12 Jonatan da ta kẹ Devid nẹ: “E jẹ Jihova Ọghẹnẹ rẹ Izrẹl dia oseri nẹ mi che nene ọsẹ mẹ ta ota omarẹ ọke tiọna rẹ odẹ rọ cha na yẹrẹ ẹdẹjerọ. O de vwo omamọ ẹwẹn kpahen Devid, me cha vwẹ ovuẹ rhe we je vuẹ wẹ kpahọn. 13 Ẹkẹvuọvo ọ da dianẹ ọsẹ mẹ vwo ẹwẹn rọ vwọ wan wẹ oma, e jẹ Jihova ru vwe ọtiọyen je vwọ ba, siẹrẹ me rha vuẹ wẹ kpahọn je nẹrhẹ wọ djẹ vabọ vwọrẹ ufuomaa. E jẹ Jihova nene uwe dia kirobo ọ vẹ ọsẹ mẹ diarọ. 14 Wo rhe dje ẹguọnọ ro jẹ rhẹriẹ ri Jihova kẹ vwẹ re me vwọ hẹ akpọ na vẹ ọke ri mi de ghwu dede? 15 Wo jẹ ẹguọnọ wẹn ro jẹ rhẹriẹ vrẹn nẹ uwevwin mẹẹ, ọ da tobọ dianẹ Jihova ghwọrọ ivwighrẹn ri Devid eje nẹ otọrakpọ na.” 16 Ọtiọyena Jonatan de nene uwevwin ri Devid re ọphọ rọ vwọ tanẹ, “Jihova cha nọ ivwighrẹn ri Devid orhiẹn.” 17 Jonatan da nẹrhẹ Devid rhoma duvwun iyorin nẹ ọyen vwo ẹguọnọ rọyen, kidie Jonatan vwo ẹguọnọ rọyen kerẹ omobọ rọyen.*
18 Jonatan da ta kẹ nẹ: “Odẹ rọ cha na yen ẹdẹ rẹ orẹ rẹ emeranvwe kpokpọ na, a cha nokpẹn wẹn kidie asan ru wo chidia phiyọ che rhiephiyọ. 19 A cha nokpẹn wẹn mamọ vwẹ ẹdẹ rerha na, gbe kpo asan ru wo de siomanu dẹvọ ye rere wọ dia kẹrẹ ukuta rọhẹ etinẹ na. 20 Ke me cha sa edada erha kpo ẹbẹre ọvo rọyen, kerẹsiẹ ra da mrẹ nẹ me sa orọnvwọn. 21 Ọke ri mi de ji odibo na, me cha tanẹ, ‘Yanran ra guọnọ edada na.’ Me da ta kẹ odibo na nẹ, ‘Nighere! Edada na hẹ ẹbẹre obonẹ wẹn, reyọ ayen rhe,’ ọke yena wo se rhivwin rhe, kidie Jihova vwọ herọ na, o mudiaphiyọ nẹ erọnvwọn ejobi shephiyọ kẹ wẹ, imuoshọ vuọvo herọọ. 22 Ẹkẹvuọvo me da ta kẹ ọmọ na nẹ, ‘Nighere! Edada na hẹ obaro wẹn,’ gba yanran, kidie Jihova guọnọre nẹ wọ yanran. 23 E jẹ Jihova dia oseri vwẹ uvwre mẹ vẹ owẹ bẹdẹ fikirẹ ọphọ ra rere na.”
24 Ọtiọyena Devid de siomanu vwẹ aghwa na. Ẹdẹ rẹ orẹ rẹ emeranvwe kpokpọ na vwo te, ovie na de chidia ẹdia rọyen vwẹ asan ra da riemu na rere ọ riemu. 25 Ovie na chidia agbara ro chidia jovwo vwẹ asan igbẹhẹ na. Jonatan chidia hirharokuo, Abna chidia kẹrẹ Sọl, ẹkẹvuọvo ẹdia ri Devid rhiephiyọ. 26 Sọl ta ota vuọvo vwẹ ẹdẹ yenaa, kidie ọ ta kẹ oma rọyen nẹ: ‘Emuọvo phiare rọ nẹrhẹ o jẹfuọn. O muẹro nẹ ọ fonroo.’ 27 Ẹdẹ rọ vwọ kpahen ẹdẹ orẹ rẹ emeranvwe kpokpọ na, vwẹ ẹdẹ rivẹ na, agbara ri Devid ji rhiephiyọ. Sọl da ta kẹ Jonatan ọmọ rọyen nẹ: “Diesorọ ọmọ ri Jẹsi rhe emuọre na odẹ rọ wanre na yẹrẹ nonẹnaa?” 28 Jonatan da kpahen kẹ Sọl nẹ: “Devid rẹ vwẹ nẹ me kẹ ọyen uphẹn rere ọyen kpo Bẹtlẹhẹm. 29 Ọ da ta, ‘Biko juvwe yanran, orua mẹ vwo izobo re che ze vwẹ orere na, oniọvo robọ mẹ ji se vwe. Ọtiọyena me da mrẹ ẹroesiri vwẹ obọ wẹn, biko juvwe fiaoma yanran ra mrẹ iniọvo mẹ.’ Ọnana yen sorọ ọ je rhe rhi nene ovie riemuu.” 30 Ophu de mu Sọl gangan kpahen Jonatan, ọ da ta kẹ nẹ: “Wẹwẹ rẹ ẹkpa rẹ ọmọ rẹ aye ro gbe vwọsua na, wo rorori nẹ me riẹnre nẹ wọ ka ẹbẹre rẹ ọmọ ri Jẹsi na? Ọnana cha ghwa ophọphọvwe rhe we vẹ oni wẹn.* 31 Ọmọ ri Jẹsi vwọ hẹ akpọ na, wọ da tobọ dia ovie, usuon wẹn cha tọọn. Ọtiọyena ji ohwo ra reyọ rhe vwe asaọkiephana kidie o che jeghwoo.”*
32 Ẹkẹvuọvo Jonatan da ta kẹ Sọl ọsẹ rọyen nẹ: “Diesorọ a vwọ teyọn hwe? Die yen o ruru?” 33 Sọl da reyọ oshuẹ na vwo phi Jonatan rere o vwo hwe, ọtiọyena Jonatan da riẹn nẹ ọsẹ rọyen muegbe rọ vwọ teyen Devid hwe. 34 Jonatan de vrẹn nẹ udemu na ugege yena vẹ ophu ọgangan, ọ rha riemu vuọvo vwẹ ẹdẹ rivẹ na re vwo ru orẹ rẹ ẹdẹ rẹ emeranvwe kpokpọ na nuu, kidie ivun miovwo fikirẹ Devid kugbe nẹ ọsẹ robọ rọyen je phọphọ.
35 Ọke vwo rhie, Jonatan da yan kpo obo aghwa na fikirẹ obo rọ vẹ Devid ta phiyotọ jovwo, odibo ọvo rọ dia eghene nenire. 36 Ọ da ta kẹ odibo rọyen nẹ: “Biko djẹ ra guọnọ edada re me cha sa na.” Odibo na da djẹ yanran, Jonatan da sa odada na sheri vrẹ asan rọ hepha. 37 Ọke rẹ odibo na vwọ djẹ te asan rẹ Jonatan sa odada na ra, Jonatan de kperi se odibo na nẹ: “Odada na hẹ obaro wẹn?” 38 Jonatan de kperi se odibo na: “Jọphẹre! Yanran kpakpata! Wo hwọkee!” Odibo ri Jonatan da tọrọ edada na, o de rhivwin bru onini rọyen rhe. 39 Odibo na riẹn emu vuọvo kpahen obo re phiaa; Jonatan vẹ Devid ọvo yen riẹn obo ro mudiaphiyọ. 40 Ọtiọyena Jonatan da ghwẹ ekuakua ofovwin rọyen kẹ odibo rọyen, ọ da ta kẹ nẹ: “Yanran, ghwẹ ayen kpo obo orere na.”
41 Ọke rẹ odibo na vwọ yanran nu, Devid de nẹ asan ro de siomanu rọ kẹrẹ ayen rọhẹ ẹbẹre rẹ obọrhen ọnre na rhe. O de shiguẹ, ọ da vwẹ uyovwin kpotọ abọ erha, ayen da fiọnfiọn ohwohwo je viẹ kẹ ohwohwo, ẹkẹvuọvo Devid yen ma viẹ. 42 Jonatan da ta kẹ Devid nẹ: “Yanran vwọrẹ ufuoma, rọ vwọ dianẹ avwanre vwẹ odẹ ri Jihova vwo duvwun iyorin nure nẹ, ‘E jẹ Jihova dia uvwre mẹ vẹ owẹ, kugbe uvwre rẹ emọ mẹ vẹ emọ wẹn bẹdẹ.’”
Ọtiọyena Devid de vrẹn ọ da yanran, Jonatan de rhivwin kpo orere na.