Ọbe rẹsosuọ ri Samuẹl
21 Ọke vwọ yan obaro, Devid de bru Ahimẹlẹk rẹ orherẹn na rhe vwẹ Nọb. Ahimẹlẹk kọ phariẹ ọke rọ vwọ mrẹ Devid, ọ da nọ nẹ: “Diesorọ wẹ ọvo vwọ rhe rẹ ohwo vuọvo vwo juwe enene?” 2 Devid da kpahen kẹ Ahimẹlẹk rẹ orherẹn na nẹ: “Ovie na vuẹ vwẹ nẹ mi ru orọnvwọn ọvo, ẹkẹvuọvo ọ tare nẹ, ‘Wo jẹ ohwo vuọvo riẹn emu vuọvo kpahan uwevwin nana ri mi ji we na vẹ obo re me tare nẹ wo ru naa.’ Mẹvwẹ vẹ ighene eshare mẹ bru ọke phiyọ rẹ avwanre cha vwọ vwoma vwẹ asan ọvo. 3 Asaọkiephana ọ da dianẹ ibrẹdi iyorin rhe we, biko vwẹ ayen kẹ vwẹ, yẹrẹ kemu kemu rọ herọ.” 4 Ẹkẹvuọvo orherẹn na da kpahen kẹ Devid nẹ: “Ibrẹdi ghevweghe herọọ, ẹkẹvuọvo ibrẹdi re ru fon kẹ Ọghẹnẹ yen herọ—takpe nẹ ighene eshare na kẹnoma kẹ eya* vwẹ ọmọke ọvo rhire na.” 5 Devid da kpahen kẹ orherẹn na nẹ: “Vwọrẹ uyota, avwanre kẹnoma kẹ eya vwẹ ọmọke ọvo rhire na kirobo rẹ avwanre ruẹ jovwo ọke mi de kpo oyan rẹ ofovwin. Ọ da dianẹ oma rẹ ighene eshare na dia fuanfon ọke rẹ oyan na da dia ọ ri ghevweghe dede, kọyen oma rayen nabọ fon nonẹna!” 6 Ọtiọyena orherẹn na da vwẹ ibrẹdi re ru fon na vwọ kẹ, kidie ibrẹdi ọfa hẹ etiyiin jokparẹ ibrẹdi re vwo dje na, re si vwo nẹ obaro ri Jihova re, rere a vwẹ ibrẹdi re ruru obọ vwo wene vwẹ ẹdẹ re siro no na.
7 Asaọkiephana ọvo vwẹ usun rẹ idibo ri Sọl hẹ etiyin vwẹ ẹdẹ yena, ọ hẹ ẹdia* rọ nẹrhẹ ọ domaji vwẹ obaro ri Jihova. Odẹ rọyen Doẹg ohwo rẹ Idọm, onotu rẹ isuigodẹ ri Sọl.
8 Devid da ta kẹ Ahimẹlẹk nẹ: “Wo vwo oshuẹ yẹrẹ ọlọkọ vwẹ etiyin? Me ghwa ọlọkọ yẹrẹ ekuakua ofovwin mẹ nene omaa, kidie uwevwin rẹ ovie ji vwe na ọ rẹ okpakpa.” 9 Ọtiọyena orherẹn na da tanẹ: “Ọlọkọ ri Golayat ohwo ri Filistia, ru wọ teyen hwe vwẹ Iyara* rẹ Ilah hẹ etinẹ, a vwẹ amwa pharọ vwẹ obuko rẹ ẹfọd na. Wọ da guọnọ reyọ, reyọ, kidie ọyen ọvo yen etinẹ.” Devid da ta: “O vwo ọfa rọ họherọọ. Vwọ kẹ vwẹ.”
10 Vwẹ ẹdẹ yena, Devid de vrẹn, ọ da je djẹ kẹ Sọl kpobarophiyọ, ukuotọ rọyen o de bru ovie Ekish ri Gat rhe. 11 Idibo rẹ Ekish da ta kẹ nẹ: “Ọnana dia Devid, ovie rẹ otọ na? Ọ dia ọyen yen ayen so une kpahen ọke rẹ ayen vwo gbeha nẹ,
‘Sọl teyen uriorin hwe,
Devid uriorin ihwe’?”
12 Devid de roro kpahen eta nana vwẹ ubiudu rọyen, oshọ rẹ Ovie Ekish ri Gat de rhi muo mamọ. 13 Ọtiọyena o de wene uruemu rọyen vwẹ irharo rayen, ko ruẹ kerẹ ohwo rọ mwa orhuẹ rọ vwọ hẹ ohri rayen* na. Ko siẹ erọnvwọn phiyọ ẹchẹ rẹ anurhoro na, jẹ o bo enya kuẹ ẹtuegban rọyen. 14 Ukuotọ rọyen, Ekish da ta kẹ idibo rọyen nẹ: “Ovwan mrẹrẹ nẹ ọshare nana mwa orhuẹ! Diesorọ ovwan vwọ reyọ bru vwe rhe? 15 Erhuẹ ri mi vwori terii kọyensorọ me vwọ vwẹ ọnana ro ruẹ kerẹ ọrhuẹ vwẹ obaro mẹ na vwọ ba? Diesorọ a vwọ vwẹ uphẹn kẹ ọshare nana nẹ ọ ro uwevwin mẹ?”