Ọbe rẹsosuọ ri Samuẹl
16 Ọke vwọ yan obaro, Jihova da ta kẹ Samuẹl nẹ: “Brọke yen wo che vweri Sọl kri te, enẹna re me vwọ siọn nure nẹ o rhe che sun kerẹ ovie vwẹ enu rẹ Izrẹẹl na? Ku evwri phiyọ ukoko wẹn rere wọ yanran. Mi che ji we bru Jẹsi ohwo ri Bẹtlẹhẹm, kidie me sane ovie kẹ oma mẹ nure vwẹ usun rẹ emọ rọyen.” 2 Ẹkẹvuọvo Samuẹl da ta: “Mavọ me sa vwọ yanran? Ọke rẹ Sọl de nyo kpahọn, ọ cha teyen ovwẹ hwe.” Jihova da kpahen nẹ: “Reyọ ọmọ rẹ erhuẹn nene oma rere wọ ta, ‘Me rhere rhi ze izobo kẹ Jihova.’ 3 Durhie Jẹsi kpo asan wo de che ze izobo na; ọtiọyena ke me cha vuẹ wẹ oborẹ wo che ru. Ku wọ jẹ ohwo ri mi che dje kẹ wẹ reyọ vwọ kẹ vwẹ.”
4 Samuẹl ru oborẹ Jihova tare. Ọke rọ vwọ rhe Bẹtlẹhẹm, ekpako rẹ orere na ke phariẹ rẹ ayen vwọ mrẹ, ayen da nọ nẹ: “Ufuoma yen wọ ghwa rhe?” 5 Ọtiọyena ọ da ta: “Ufuoma yen me ghwa rhe. Me rhere rhi ze izobo kẹ Jihova. Ovwan ru oma rẹ ovwan fon rere ovwan nene uvwe kpo asan re de che ze izobo na.” Ọtiọyena o de ru Jẹsi vẹ emọ rọyen fon, o vwo ru ọyena nu, o de se ayen kpo asan re de che ze izobo na. 6 Ayen vwọ rhe rẹ Samuẹl vwọ mrẹ Elayab, ọ da tanẹ: “Vwọrẹ uyota, ọ rẹ Jihova jẹreyọ na yen mudia obaro rọyen na.” 7 Ẹkẹvuọvo Jihova da ta kẹ Samuẹl nẹ: “Wọ tẹnroviẹ ekroma rọyen vẹ obo ro gron tee, kidie me senrọ nure. Ọ dia ẹro rẹ ohwo vwo nẹ emu yen Ọghẹnẹ vwo noo, kidie oborẹ ẹro mrẹ ọyen ohworakpọ nẹ, ẹkẹvuọvo ubiudu na yen Jihova nẹ.” 8 Ọtiọyena Jẹsi de se Abinadab, ọ da reyọ rhe obaro ri Samuẹl, ẹkẹvuọvo Samuẹl da tanẹ: “Jihova je jẹ ọnanaa.” 9 Jẹsi da je reyọ Shama rhe obaro rọyen, ẹkẹvuọvo Samuẹl da tanẹ: “Jihova je jẹ ọnanaa.” 10 Ọtiọyen kọyen Jẹsi reyọ emeshare rọyen ighwrẹn rhe obaro ri Samuẹl, ẹkẹvuọvo Samuẹl da ta kẹ Jẹsi nẹ: “Jihova jẹ ọvuọvo vwẹ usun rẹ enanaa.”
11 Ukuotọ rọyen Samuẹl da ta kẹ Jẹsi nẹ: “Emeshare wẹn ejobi na?” Ọ da tanẹ: “Mi vwo ọmọshare ọfa, ọyen ọ rẹ otete; o suẹn igodẹ na.” Ọtiọyena Samuẹl da ta kẹ Jẹsi nẹ: “Ji ohwo re se, kidie avwanre che chidia riemu na bẹsiẹ rọ vwọ rhee.” 12 Ọtiọyena o de ji ohwo re se, ọ da reyọ rhe. Asaọkiephana ọyen eghene ọshare vẹ ẹro yoyovwin ro ji vwo erhuvwu. Ọtiọyena Jihova da tanẹ: “Vrẹn, jẹreyọ, kidie ọnana yen ohwo na!” 13 Ọtiọyena Samuẹl da reyọ ukoko rẹ evwri na, o de ku evwri na kuo vwọ jẹreyọ vwẹ obaro rẹ iniọvo rọyen. Ẹwẹn ri Jihova kọ kẹ Devid ẹgba vwo nẹ ọke yena yanran. Ọyena vwọ wan nu, Samuẹl de vrẹn, o de kpo Rema.
14 Asaọkiephana ẹwẹn ri Jihova nẹ oma ri Sọl re, orharhe ẹwẹn ro nẹ obọ ri Jihova rhe ko kpokpo. 15 Idibo ri Sọl da ta kẹ nẹ: “Nighere, orharhe ẹwẹn ro nẹ obọ rẹ Ọghẹnẹ rhe yen kpokpo uwe na. 16 Biko e jẹ ọrovwavwanre vwẹ iji kẹ idibo rọyen rehẹ obaro rọyen nẹ, ayen ra guọnọ ọshare rọ tẹn ona rẹ obo re hworo ihapu. Kọke kọke rẹ orharhe ẹwẹn ro nẹ obọ rẹ Ọghẹnẹ rhe da ro owẹ oma, ko che hworo, oma wẹn ko che totọ.” 17 Ọtiọyena Sọl da ta kẹ idibo rọyen nẹ: “Biko, ovwan guọnọ ohwo rọ nabọ riẹn ihapu hworo, rere ovwan reyọ rhe vwe.”
18 Ọvo vwẹ usun rẹ idibo rọyen da tanẹ: “Nighere! mi vughe ọmọ ri Jẹsi ọvo ohwo ri Bẹtlẹhẹm na rọ nabọ tẹn ona rẹ ihapu ehworo, ọyen ọgba ofovwin ro fiudugberẹ. Ọ nabọ riẹn ota ta, o vwo erhuvwu, Jihova vẹ ọyen je herọ.” 19 Ọtiọyena Sọl de ji ikọn bru Jẹsi ra, ọ da tanẹ: “Ji ọmọ wẹn Devid ro suẹn ichuru na rhe vwe.” 20 Ọtiọyena Jẹsi da reyọ ibrẹdi, ọgọ rẹ ophiẹn rẹ iwaini, kugbe ọmọ rẹ ẹvwe, o de mu ayen phiyọ enu rẹ ekẹkẹtẹ, ọ da tanẹ ọmọ rọyen Devid mu ayen nene oma rhe Sọl. 21 Ọtiọyena Devid de bru Sọl rhe, kọ ga. Sọl de rhi vwo ẹguọnọ rọyen mamọ, ọ da rhe dia ohwo rọ ghwẹ ekuakua ofovwin rọyen. 22 Sọl da vwẹ ovuẹ rhe Jẹsi nẹ: “Biko jẹ Devid wian kẹ vwẹ, kidie ọ mrẹ ẹroesiri mẹ re.” 23 Kọke kọke rẹ orharhe ẹwẹn ro nẹ obọ rẹ Ọghẹnẹ rhe da ro Sọl oma, Devid kọ reyọ ihapu na o mi hworo, Sọl kọ mrẹ urovwoma, oma rọyen ko totọ, orharhe ẹwẹn na me yan jovwo.