Diutaronomi

7 “Ọke rẹ Jihova Ọghẹnẹ rẹ ovwan da reyọ ovwan ro otọ rẹ ovwan cha re ughwẹ rọyen na, o ji che si ẹgborho sansan rẹ ihwo rayen pha buebun vwo nẹ obaro rẹ ovwan: ihwo ri Hẹt, ihwo ri Giga, ihwo rẹ Amọ, ihwo ri Kenan, ihwo ri Pẹriz, ihwo ri Haiv, kugbe ihwo ri Jẹbus, ẹgborho ighwrẹn rẹ ihwo rayen pha buebun ri ji vwo ẹgba nọ ovwan. 2 Jihova Ọghẹnẹ rẹ ovwan cha vwẹ ayen kẹ ovwan, kẹ ovwan che phi ayen kparobọ. O vwo obo rọ wanree, ovwan me ghwọrọ ayen. Ovwan nene ayen ria ọphọ vuọvo yẹrẹ dje ẹroesiri vuọvo kẹ ayeen. 3 Ovwan vẹ ayen vwo obọechuro rẹ orọnvwe vuọvoo.* Ovwan reyọ emetẹ rẹ ovwan vwọ kẹ emeshare rayen yẹrẹ reyọ emetẹ rayen vwọ kẹ emeshare rẹ ovwaan. 4 Kidie ayen che ku emọ rẹ ovwan rhẹriẹ juvwe vwo ra ga eghẹnẹ efa; ọke yena re, ophu ri Jihova kọ cha tua kpahen ovwan, kọ cha ghwọrọ ovwan kpakpata.

5 “Ukperẹ ọtiọyen, ọnana yen oborẹ ovwan che ru ayen: Ovwan kporon egbada rayen, guọghọ ichivwo rẹ ẹga rayen, nyavwe ekpọ rẹ ẹga* rayen she, je torhẹ ema rayen totọ. 6 Kidie ovwan ihwo efuanfon vwọ kẹ Jihova Ọghẹnẹ rẹ ovwan, Jihova Ọghẹnẹ rẹ ovwan jẹ ovwan reyọ rere ovwan vwọ dia ihwo rọyen, ekuakua rẹ oghẹresan* rọyen, vwo nẹ ohri rẹ ihwo eje rehẹ enu rẹ akpọ na.

7 “Ọ dia kidie nẹ ovwan yen me bun kparobọ yen sorọ Jihova vwo dje ẹguọnọ kẹ ovwan je sane ovwaan, kidie ovwan yen ma hanvwe vwẹ usun rẹ ihwo na eje. 8 Ukperẹ ọtiọyen, kidie nẹ Jihova vwo ẹguọnọ rẹ ovwan, ọ je sẹro rẹ iyorin ro duvwunru kẹ esẹ rẹ ovwan ride, kọyensorọ Jihova vwọ reyọ ovwan rhe vẹ obọ ọgangan, rọ vwọ tan ovwan vwo nẹ uwevwin rẹ eviẹn, vwo nẹ ẹgba* ri Fero ovie rẹ Ijipt. 9 Ovwan nabọ riẹn nẹ Jihova Ọghẹnẹ rẹ ovwan yen Ọghẹnẹ rẹ uyota na, Ọghẹnẹ rọ fuevun rọ sẹro rẹ ọphọ kugbe ẹguọnọ rọyen ro jẹ rhẹriẹ vwọ kẹ uvwiẹ uriorin rẹ ihwo ri vwo ẹguọnọ rọyen, re je sẹro rẹ iji rọyen. 10 Ẹkẹvuọvo vwọ kẹ ihwo ri vwo utuoma kpahọn, ọ cha vwẹ oghwọrọ vwọ hwosa kẹ ayen komobọ. O che gbeghẹrẹ ro vwo gboja kẹ ihwo ri vwo utuoma kpahọọn; o che gboja kẹ ayen komobọ. 11 Ọtiọyena, ovwan gbẹrophiyotọ vwọ sẹro rẹ iji na vẹ irhi na kugbe orhiẹn-ebro ri mi ji iji rọyen kẹ ovwan nonẹna womarẹ ovwan vwo ruẹ nene ayen.

12 “Ovwan da vwẹ ọkieje vwọ kerhọ rẹ orhiẹn-ebro nana, ovwan de ru nene ayen je sẹro rayen, Jihova Ọghẹnẹ rẹ ovwan kọ cha sẹro rẹ ọphọ kugbe ẹguọnọ ro jẹ rhẹriẹ ro duvwun iyorin rọyen kẹ esẹ rẹ ovwan ride na. 13 O che vwo ẹguọnọ rẹ ovwan, bruba kẹ ovwan je nẹrhẹ ovwan bunphiyọ. E, o che bruba kẹ ovwan vẹ emọ buebun* kugbe ekankọn rẹ otọ rẹ ovwan, eka rẹ ovwan, iwaini kpokpọ rẹ ovwan, evwri rẹ ovwan, emọ rẹ erhuẹn rẹ ovwan, kugbe emọ rẹ igodẹ rẹ ovwan, vwẹ otọ ro duvwun iyorin rọyen kẹ esẹ rẹ ovwan ride nẹ ọyen cha vwọ kẹ ovwan. 14 Ovwan cha dia ihwo re me bruba kẹ vwẹ usun rẹ ihwo na eje; o vwo ọshare yẹrẹ aye vuọvo vwẹ usun rẹ ovwan ro che jẹ ọmọ evwoo, yẹrẹ ichuru rẹ ovwan ri che jẹ emọ evwoo. 15 Jihova che si koka koka rẹ ọga nẹ ovwan oma, ọ cha reyọ ọvuọvo vwẹ usun rẹ ega ebrabra rẹ ovwan riẹnre vwẹ Ijipt bru ovwan rhee. Ukperẹ ọtiọyen, ọ cha reyọ ayen rhe enu rẹ ihwo eje ri vwo utuoma kpahen ovwan. 16 Ovwan ghwọrọ ihwo eje rẹ Jihova Ọghẹnẹ rẹ ovwan phi phiyọ obọ rẹ ovwan. Ovwan gbe arodọnvwẹ kẹ ayeen, ovwan je ga eghẹnẹ rayeen kidie ọyena cha dia ufi vwọ kẹ ovwan.

17 “Ovwan da ta vwẹ ubiudu rẹ ovwan nẹ, ‘Ẹgborho nana bun nọ avwanre. Mavọ avwanre sa vwọ djẹ ayen yanran?’ 18 ovwan djoshọ rayeen. Ovwan karophiyọ oma rẹ ovwan oborẹ Jihova Ọghẹnẹ rẹ ovwan ru Fero vẹ Ijipt eje, 19 ẹdjọeguo* ride rẹ ovwan vwẹ ẹro rẹ ovwan mrẹ kugbe eka, igbevwunu, obọ ọgangan vẹ obọ rẹ Jihova Ọghẹnẹ rẹ ovwan riẹn phia rọ vwọ reyọ ovwan vwo nẹ Ijipt. Ọyena yen oborẹ Jihova Ọghẹnẹ rẹ ovwan che ru ihwo eje rẹ ovwan djoshọ rayen. 20 Jihova Ọghẹnẹ rẹ ovwan cha nẹrhẹ oshọ mu ayen* bẹsiẹ rẹ ihwo ri chekọ vẹ ihwo ri siẹ oma rayen nẹ vwo nẹ obaro rẹ ovwan vwọ ghwọrọ. 21 Ovwan phariẹ fiki rayeen, kidie Jihova Ọghẹnẹ rẹ ovwan vẹ ovwan herọ, Ọghẹnẹ rode vẹ udidi.

22 “Vwọrẹ imuẹro, Jihova Ọghẹnẹ rẹ ovwan cha djẹ ẹgborho nana yanran nẹ obaro rẹ ovwan ememerha. Ọ cha vwẹ uphẹn kẹ ovwan nẹ ovwan phioba phiyọ ayen siẹvuọvoo, rere eranvwe rẹ aghwa rẹ udju na vwo jẹ ebuonphiyọ, e me vwọso ovwan. 23 Jihova Ọghẹnẹ rẹ ovwan che phi ayen phiyọ obọ rẹ ovwan, kẹ ovwan che rhe phiẹ ayen kparobọ bẹsiẹ rẹ ovwan vwọ ghwọrọ ayen re. 24 O che phi ivie rayen phiyọ obọ rẹ ovwan, kẹ ovwan che phoro edẹ rayen vwo nẹ obotọ rẹ idjuvwu na. O vwo ohwo vuọvo ro se mudia vwọso ovwaan, bẹsiẹ rẹ ovwan vwọ ghwọrọ ayen re. 25 Ovwan me vwẹ erhanre vwọ torhẹ ema rẹ eghẹnẹ rayen. Ovwan jẹ idọnọ efuanfon vẹ iro rayen siẹ ovwan urhuruu yẹrẹ ovwan reyọ ayen kẹ oma rẹ ovwaan, rere i vwo jẹ ufi ẹdia vwọ kẹ ovwan, kidie ayen emu rẹ ẹgua vwọ kẹ Jihova Ọghẹnẹ rẹ ovwan. 26 Ovwan reyọ orọnvwọn rẹ ẹgua rua evunrẹ uwevwin rẹ ovwaan rere ovwan vwo jẹ dia kerẹ orọnvwọn tiọyen ra cha ghwọrọ na. Ovwan mi vwo utuoma ọgangan kpahọn kidie ọyen orọnvwọn ra cha ghwọrọ.