Joshua
4 Ugege rẹ ẹgborho na eje vwọ shariẹ Jọdan na vrẹ nu, Jihova da ta kẹ Joshua nẹ: 2 “Sane eshare 12 vwo nẹ uvwre rẹ ihwo na rhe, ọshare ọvo vwo nẹ uvwiẹ ọvuọvo, 3 rere wọ vwẹ iji nana kẹ ayen: ‘Ovwan mu ikuta 12 vwo nẹ uherevie ri Jọdan na, asan rẹ irherẹn na mudiaphiyọ na, ovwan mu ayen nene oma je rhuẹrẹ ayen phiyọ asan rẹ ovwan cha vwerhẹn hrọke na.’”
4 Ọtiọyena Joshua de se eshare 12 ro vwo mu vwo nẹ ohri rẹ ihwo rẹ Izrẹl na, ọshare ọvo vwo nẹ uvwiẹ ọvuọvo rhe, 5 Joshua da ta kẹ ayen: “Ovwan kpo uherevie ri Jọdan na, vwẹ obaro rẹ Ekpeti rẹ Ọphọ ri Jihova Ọghẹnẹ rẹ ovwan, rere ovwan ọvuọvo mu ukuta kpahen igabọ rọyen, vwo nene uchunu rẹ uvwiẹ rẹ Izrẹl, 6 rere ọ vwọ dia oka vwẹ ohri rẹ ovwan. Ọ da dianẹ emọ* rẹ ovwan nọ ovwan vwẹ obaro na nẹ, ‘Diesorọ ovwan vwọ rhuẹrẹ ikuta nana phiyọ etinẹ?’ 7 Ovwan me ta kẹ ayen nẹ: ‘Kidie ame ri Jọdan na daji vwẹ obaro rẹ ekpeti rẹ ọphọ ri Jihova. Ọke re vwo muo wan Jọdan na vrẹ, ame ri Jọdan na da daji. Ikuta nana cha dia ẹkarophiyọ ri bẹdẹ vwọ kẹ ihwo rẹ Izrẹl.’”
8 Ọtiọyena ihwo rẹ Izrẹl de ghwe ru nene iji rẹ Joshua vwọ kẹ ayen na. Ayen de mu ikuta 12 vwo nẹ uherevie ri Jọdan na, kirobo rẹ Jihova vwẹ odjekẹ vwọ kẹ Joshua, rere ikuta na vẹ uchunu rẹ uvwiẹ rẹ ihwo rẹ Izrẹl na vwọ dia abavo. Ayen de mu ayen nene oma kpo asan rẹ ayen cha vwerhẹn hrọke na, ayen da rhuẹrẹ ayen phiyọ etiyin.
9 Joshua je rhuẹrẹ ikuta 12 phiyọ asan rẹ irherẹn ri mu ekpeti rẹ ọphọ na mudiaphiyọ vwẹ uherevie ri Jọdan na, ikuta na jehẹ etiyin rhi te ọke na.
10 Irherẹn ri mu Ekpeti rẹ Ọphọ na mudia uherevie ri Jọdan na bẹsiẹ re vwo ru erọnvwọn eje rẹ Jihova vwẹ iji kẹ Joshua nẹ ọ vuẹ ihwo na nẹ ayen ru re, vwo nene iji eje rẹ Mosis vwọ kẹ Joshua. Vwẹ ọke nana eje, ihwo na de brokpakpa wanvrẹ. 11 Ugege rẹ ihwo na eje vwọ wanvrẹ nu, irherẹn ri mu Ekpeti rẹ Ọphọ ri Jihova na da je wanvrẹ vwẹ irharo rẹ ihwo na. 12 Uvwiẹ ri Rubẹn, Gad, kugbe ubro rẹ uvwiẹ ri Manasẹ da tẹnrẹn urhiẹ rẹ ofovwin kobaro kẹ ihwo rẹ Izrẹl ri chekọ shariẹ vrẹ kirobo rẹ Mosis vuẹ ayen. 13 Omarẹ isodje 40,000 re choma rẹ ofovwin da shariẹ vrẹ vwẹ obaro rẹ Jihova ro aton ri Jẹriko.
14 Vwẹ ẹdẹ yena Jihova da kpare Joshua kpenu vwẹ ẹro rẹ ihwo rẹ Izrẹl eje, ayen de muọghọ okokodo kẹ* vwẹ ẹdẹ rẹ akpeyeren rọyen eje, kirobo rẹ ayen ji muọghọ okokodo vwọ kẹ Mosis.
15 Jihova da ta kẹ Joshua nẹ: 16 “Vwẹ iji kẹ irherẹn ri mu ekpeti rẹ Iseri na nẹ ayen vrẹn nẹ evunrẹ Jọdan na rhe.” 17 Ọtiọyena Joshua da vuẹ irherẹn na nẹ: “We vrẹn nẹ evunrẹ Jọdan na rhe.” 18 Ọke rẹ irherẹn ri mu ekpeti rẹ ọphọ ri Jihova na vwo vrẹn nẹ uherevie ri Jọdan na rẹ ẹhẹrhawọ rayen vwo te ugbenu,* ame ri Jọdan na da rhoma tuẹn ẹdjẹ phiyọ, ọ da vọn ro orhoma rọyen na kirobo rọ hepha jovwo.
19 Vwẹ ẹdẹ rihwe rẹ emeranvwe rẹsosuọ, ihwo na de vrẹn nẹ Jọdan, ayen de wonphiyọ* Gilga vwẹ ẹbẹre ọnre va nẹcha vwẹ ughwru ri Jẹriko.
20 Joshua da vwẹ ikuta 12 rẹ ayen mu nẹ Jọdan rhe na vwo vi vwẹ Gilga. 21 Ọ da ta kẹ ihwo rẹ Izrẹl na nẹ: “Vwẹ obaro na, ọke rẹ emọ rẹ ovwan da nọ esẹ rayen nẹ, ‘Die yen ikuta nana mudiaphiyọ?’ 22 ovwan me kpahen kẹ emọ rẹ ovwan nẹ: ‘Izrẹl wan urhie ri Jọdan na vrẹ vwẹ otọ ọyaya 23 ọke rẹ Jihova Ọghẹnẹ rẹ ovwan vwọ nẹrhẹ ame ri Jọdan na kpọ yamu vwẹ obaro rayen bẹsiẹ ayen vwọ wanvrẹ nu, kirobo rẹ Jihova Ọghẹnẹ rẹ ovwan ru Abadi Ọvwavware na, ọke rọ vwọ nẹrhẹ ọ kpọ yamu vwẹ obaro rẹ avwanre bẹsiẹ avwanre vwọ wanvrẹ nu. 24 O ru ọnana rere ihwo rẹ akpọ na eje sa vwọ riẹn oborẹ obọ ri Jihova gan te, rere ovwan sa vwọ djoshọ rẹ Jihova Ọghẹnẹ rẹ ovwan ọkieje.’”