Joshua
21 Asaọkiephana igbuyovwin rẹ iwevwin rẹ esẹ rẹ ihwo ri Livae de bru Ẹlieza rẹ orherẹn na, Joshua ọmọ ri Nọn, kugbe igbuyovwin rẹ iwevwin rẹ esẹ rẹ uvwiẹ rẹ Izrẹl ra, 2 ayen da ta kẹ ayen vwẹ Shailo vwẹ otọ ri Kenan nẹ: “Jihova womarẹ Mosis vwẹ iji phia nẹ a kẹ avwanre irere rẹ avwanre cha dia vẹ asan rẹ ichuru rẹ avwanre da cha re odin vwẹ evun rayen.” 3 Ọtiọyena vwo nene iji ri Jihova, ihwo rẹ Izrẹl na da vwẹ irere nana vẹ asan rẹ ichuru da sa re odin vwẹ evun rayen vwọ kẹ ihwo ri Livae na vwevunrẹ uku rayen.
4 Itẹ na de mu erua ri Kohat, a da womarẹ itẹ ghare irere 13 vwo nẹ uvwiẹ ri Juda, uvwiẹ ri Simiọn, kugbe uvwiẹ ri Bẹnjamin vwọ kẹ ihwo ri Livae, re dia uvwiẹ rẹ Erọn orherẹn na.
5 Vwọ kẹ emọ ri Kohat ri chekọ, a da vwẹ itẹ ghare irere ihwe vwọ kẹ ayen vwo nẹ otọ rẹ erua rẹ uvwiẹ rẹ Ifrem, uvwiẹ ri Dan, vẹ ubro rẹ uvwiẹ ri Manasẹ.
6 Vwọ kẹ emọ ri Gẹshọn, a da vwẹ itẹ ghare irere 13 vwọ kẹ ayen vwo nẹ erua rẹ uvwiẹ rẹ Isaka, uvwiẹ rẹ Asha, uvwiẹ ri Naftalai, kugbe ubro rẹ uvwiẹ ri Manasẹ vwẹ Beshan.
7 Vwọ kẹ emọ ri Mẹrerai vwo nene erua rayen, a da ghare irere 12 kẹ ayen vwo nẹ uvwiẹ ri Rubẹn, uvwiẹ ri Gad, kugbe uvwiẹ ri Zẹbulọn.
8 Ọtiọyen kọyen ihwo rẹ Izrẹl womarẹ itẹ vwọ ghare irere nana vẹ asan ichuru da sa re odin vwẹ evun rayen vwọ kẹ ihwo ri Livae na, kirobo rẹ Jihova vwẹ iji na phia womarẹ Mosis.
9 Ọtiọyena vwo nẹ uvwiẹ ri Juda kugbe uvwiẹ ri Simiọn, a da vwẹ irere nana re che se odẹ rayen na vwọ kẹ ayen, 10 ayen da vwẹ ayen kẹ emọ rẹ Erọn rẹ orua ri Kohat, ohwo ri Livae, kidie ayen yen itẹ na ke mu. 11 Ayen da vwẹ Kiriat-aba (Aba ọyen ọsẹ rẹ Enak), kọyen Hẹbrọn vẹ asan rẹ ichuru da sa re odin re riarierẹ phiyọ vwẹ ekogho rẹ igbenu ri Juda vwọ kẹ ayen. 12 Ẹkẹvuọvo ayen da vwẹ etọ rẹ orere na kugbe eko rọyen vwọ kẹ Kelẹb ọmọ ri Jẹfunẹ kerẹ ughwẹ rọyen.
13 Vwọ kẹ emọ rẹ Erọn orherẹn na, ayen da vwẹ orere rẹ adjarhọ rẹ ohwo ro hwe ohwo djẹ ra na, kọyen Hẹbrọn vẹ asan rẹ ichuru da sa re odin vwẹ evun rọyen vwọ kẹ ayen, ji te Libna vẹ asan rẹ ichuru da sa re odin vwẹ evun rọyen, 14 Jatiẹ vẹ asan rẹ ichuru da sa re odin vwẹ evun rọyen, Ẹshtamoa vẹ asan rẹ ichuru da sa re odin vwẹ evun rọyen, 15 Holọn vẹ asan rẹ ichuru da sa re odin vwẹ evun rọyen, Dibiẹ vẹ asan rẹ ichuru da sa re odin vwẹ evun rọyen, 16 Ein vẹ asan rẹ ichuru da sa re odin vwẹ evun rọyen, Jọta vẹ asan rẹ ichuru da sa re odin vwẹ evun rọyen, kugbe Bẹt-shimẹsh vẹ asan rẹ ichuru da sa re odin vwẹ evun rọyen—irere irhirin yen a reyọ vwo nẹ uvwiẹ ivẹ nana rhe.
17 Vwo nẹ uvwiẹ ri Bẹnjamin: Gibiọn vẹ asan rẹ ichuru da sa re odin vwẹ evun rọyen, Giba vẹ asan rẹ ichuru da sa re odin vwẹ evun rọyen, 18 Anatọt vẹ asan rẹ ichuru da sa re odin vwẹ evun rọyen, kugbe Almọn vẹ asan rẹ ichuru da sa re odin vwẹ evun rọyen—irere ẹne.
19 Irere eje ra vwọ kẹ emọ rẹ Erọn, irherẹn na, da dia irere 13 vẹ asan rẹ ichuru da sa re odin vwẹ evun rayen.
20 A da vwẹ itẹ vwọ ghare irere vwo nẹ uvwiẹ rẹ Ifrem vwọ kẹ erua ri Kohat ri chekọ vwẹ ohri rẹ ihwo ri Livae na. 21 Ayen da vwẹ orere rẹ adjarhọ rẹ ohwo ro hwe ohwo djẹ ra na vwọ kẹ ayen, kọyen Shikẹm vẹ asan rẹ ichuru da sa re odin vwẹ evun rọyen vwẹ ekogho rẹ igbenu rẹ Ifrem, Giza vẹ asan rẹ ichuru da sa re odin vwẹ evun rọyen, 22 Kibzeim vẹ asan rẹ ichuru da sa re odin vwẹ evun rọyen, kugbe Bẹt-horọn vẹ asan rẹ ichuru da sa re odin vwẹ evun rọyen—irere ẹne.
23 Vwo nẹ uvwiẹ ri Dan: Ẹlteka vẹ asan rẹ ichuru da sa re odin vwẹ evun rọyen, Gibẹtọn vẹ asan rẹ ichuru da sa re odin vwẹ evun rọyen, 24 Aijalọn vẹ asan rẹ ichuru da sa re odin vwẹ evun rọyen, Gat-rimọn vẹ asan rẹ ichuru da sa re odin vwẹ evun rọyen—irere ẹne.
25 Vwo nẹ ubro rẹ uvwiẹ ri Manasẹ: Teanak vẹ asan rẹ ichuru da sa re odin vwẹ evun rọyen, kugbe Gat-rimọn vẹ asan rẹ ichuru da sa re odin vwẹ evun rọyen—irere ivẹ.
26 Irere na eje vẹ asan rẹ ichuru da sa re odin vwẹ evun rayen ra vwọ kẹ erua rẹ ihwo ri Kohat ri chekọ da dia ihwe.
27 Ubro rẹ uvwiẹ ri Manasẹ da vwẹ orere rẹ adjarhọ rẹ ohwo ro hwe ohwo djẹ ra na, kọyen Golan vwẹ Beshan, vẹ asan rẹ ichuru da sa re odin vwẹ evun rọyen kugbe Biẹshtira vẹ asan rẹ ichuru da sa re odin vwẹ evun rọyen vwọ kẹ emọ ri Gẹshọn rẹ erua ri Livae—irere ivẹ.
28 Vwo nẹ uvwiẹ rẹ Isaka: Kishiọn vẹ asan rẹ ichuru da sa re odin vwẹ evun rọyen, Daberat vẹ asan rẹ ichuru da sa re odin vwẹ evun rọyen, 29 Jamọt vẹ asan rẹ ichuru da sa re odin vwẹ evun rọyen, kugbe Ẹn-ganim vẹ asan rẹ ichuru da sa re odin vwẹ evun rọyen—irere ẹne.
30 Vwo nẹ uvwiẹ rẹ Asha: Maishal vẹ asan rẹ ichuru da sa re odin vwẹ evun rọyen, Abdọn vẹ asan rẹ ichuru da sa re odin vwẹ evun rọyen, 31 Hẹlkat vẹ asan rẹ ichuru da sa re odin vwẹ evun rọyen, kugbe Rihọb vẹ asan rẹ ichuru da sa re odin vwẹ evun rọyen—irere ẹne.
32 Vwo nẹ uvwiẹ ri Naftalai: orere rẹ adjarhọ rẹ ohwo ro hwe ohwo djẹ ra na, kọyen Kidẹsh vwẹ Galili vẹ asan rẹ ichuru da sa re odin vwẹ evun rọyen, Hemọt-dọ vẹ asan rẹ ichuru da sa re odin vwẹ evun rọyen, kugbe Katan vẹ asan rẹ ichuru da sa re odin vwẹ evun rọyen—irere erha.
33 Irere rẹ emọ ri Gẹshọn eje vwo nene erua rayen da dia irere 13 vẹ asan rẹ ichuru da sa re odin vwẹ evun rayen.
34 A da reyọ irere nana nẹ uvwiẹ ri Zẹbulọn vwọ kẹ erua rẹ emọ ri Mẹrerai, ihwo ri Livae ri chekọ: Jọkniam vẹ asan rẹ ichuru da sa re odin vwẹ evun rọyen, Kata vẹ asan rẹ ichuru da sa re odin vwẹ evun rọyen, 35 Dimna vẹ asan rẹ ichuru da sa re odin vwẹ evun rọyen, kugbe Nahalọ vẹ asan rẹ ichuru da sa re odin vwẹ evun rọyen—irere ẹne.
36 Vwo nẹ uvwiẹ ri Rubẹn: Biza vẹ asan rẹ ichuru da sa re odin vwẹ evun rọyen, Jehaz vẹ asan rẹ ichuru da sa re odin vwẹ evun rọyen, 37 Kẹdẹmọt vẹ asan rẹ ichuru da sa re odin vwẹ evun rọyen, kugbe Mẹfeat vẹ asan rẹ ichuru da sa re odin vwẹ evun rọyen—irere ẹne.
38 Vwo nẹ uvwiẹ ri Gad: orere rẹ adjarhọ rẹ ohwo ro hwe ohwo djẹ ra na, kọyen Remọt vwẹ Giliẹd vẹ asan rẹ ichuru da sa re odin vwẹ evun rọyen, Mehaneim vẹ asan rẹ ichuru da sa re odin vwẹ evun rọyen, 39 Hẹshbọn vẹ asan rẹ ichuru da sa re odin vwẹ evun rọyen, kugbe Jeza vẹ asan rẹ ichuru da sa re odin vwẹ evun rọyen—ejobi da dia irere ẹne.
40 Irere na eje ra vwẹ itẹ ghare kẹ emọ ri Mẹrerai vwo nene erua rayen, kọyen erua rẹ ihwo ri Livae ri chekọ na da dia irere 12.
41 Irere rẹ ihwo ri Livae eje rehẹ evunrẹ ughwẹ rẹ ihwo rẹ Izrẹl da dia irere 48 vẹ asan rẹ ichuru da sa re odin vwẹ evun rayen. 42 Irere nana ọvuọvo vwo asan rẹ ichuru da sa re odin rọ riarierẹ phiyọ—enẹ yen ọ hepha vwọ kẹ irere nana eje.
43 Ọtiọyena Jihova da vwẹ otọ na eje ro duvwun iyorin nẹ ọyen cha vwọ kẹ esẹ rayen ride na vwọ kẹ Izrẹl, ayen da reyọ je dia evun rọyen. 44 Vwọba, Jihova da kẹ ayen urovwoma vwẹ kẹbẹre kẹbẹre, kirobo ro duvwun iyorin vwọ kẹ esẹ rayen ride, o vwo ọvuọvo vwẹ usun rẹ ivwighrẹn rayen ejobi ro se mudia vwọso ayeen. Jihova phi ivwighrẹn rayen eje phiyọ ayen obọ. 45 O vwo ọvuọvo ro shefia vwẹ usun rẹ ive* esiri eje rẹ Jihova ve vwọ kẹ uwevwin rẹ Izrẹl naa; eje rugba re kpai.