Ọbe Rivẹ ri Samuẹl
12 Ọtiọyena Jihova de ji Netan bru Devid. O de bro rhe, ọ da tanẹ: “O vwo eshare ivẹ vwẹ orere ọvo, ọvo ọdafe, ọ ro chekọ ovwiogbere. 2 Ọdafe na vwo igodẹ vẹ erhuẹn buebun; 3 ẹkẹvuọvo ovwiogbere na vwo emu vuọvoo jokparẹ omogodẹ aye otete ọvo rọ dẹre. Ọ da vwẹrote, je dia obọ rọyen vẹ emeshare rọyen da ghwanre. Ememu ro vwori yen omogodẹ na da ria, uko rọ vwọ da ame yen omogodẹ na je vwọ da ame, o mi sherhẹn phiyọ abọ rọyen. Ọ da rhe dia kerẹ ọmọtẹ rọyen. 4 Ọke vwọ yan obaro, ọrhorha ọvo de won ọdafe na, ẹkẹvuọvo ọ reyọ ọvuọvo vwẹ usun rẹ igodẹ vẹ erhuẹn rọyen na vwo chere emu kẹ ọrhorha ro wonro naa. Ukperẹ ọtiọyen, ọ da reyọ ogodẹ rẹ ovwiogbere na, o de vwo chere emu kẹ ohwo ro wonro na.”
5 Ivun rẹ ọshare na de miovwo Devid mamọ, ọ da ta kẹ Netan nẹ: “Rẹ Jihova vwọ herọ na, ọshare ro ru emu nana fo ughwu! 6 Ọ me je hwosa rẹ omogodẹ na asakuẹne, kidie o ru emu nana o ji dje arodọnvwẹ phiaa.”
7 Ọtiọyena Netan da ta kẹ Devid nẹ: “Wẹ yen ohwo na! Ọnana yen oborẹ Jihova Ọghẹnẹ rẹ Izrẹl tare: ‘Mẹvwẹ komobọ yen jẹ wẹ reyọ kerẹ ovie vwẹ enu rẹ Izrẹl, mi de sivwin uwe nẹ obọ ri Sọl. 8 Me vwẹ uwevwin rẹ onini wẹn kẹ wẹ, mi phi eya rẹ onini wẹn phiyọ obọ wẹn, me da je vwẹ uwevwin rẹ Izrẹl kugbe ọ ri Juda kẹ wẹ. Kerẹsiẹ ra da mrẹ nẹ eyena terii, mi ji vwo owenvwe me vwọ vwẹ efa vwọ ba kẹ wẹ. 9 Diesorọ wọ vwọ jẹ ota ri Jihova fia, ru wo vwo ru obo re brare vwẹ ẹro rọyen? Wọ vwẹ ọlọkọ vwo hwe Yuraya ohwo ri Hẹt! Wo vwo ru ọyena nu, wọ da vwẹ aye rọyen vwo ru aye ọke wọ vwọ vwẹ ọlọkọ rẹ ihwo rẹ Amọn vwo hwe nu. 10 Asaọkiephana, ọlọkọ che nẹ uwevwin wẹẹn, kidie wọ jẹ vwẹ fia ru wọ vwọ reyọ aye rẹ Yuraya ohwo ri Hẹt vwo ru aye.’ 11 Ọnana yen oborẹ Jihova tare: ‘Me cha nẹrhẹ orua robọ wẹn so okpetu kẹ wẹ; me cha dia irharo wẹn da vwẹ eya wẹn vwọ kẹ ọshare ọfa,* ko che nene eya wẹn vwerhẹn vwẹ oghẹruvo koko.* 12 Dede nẹ wo ruro vwẹ odjahọn, mi che ru ọnana vwẹ obaro rẹ Izrẹl eje vwẹ oghẹruvo koko.’”*
13 Devid da ta kẹ Netan nẹ: “Mi ru umwemwu vwọso Jihova.” Netan da kpahen kẹ Devid nẹ: “Jihova je vwẹ umwemwu wẹn vwo ghovwo uwe.* Wo che ghwuu. 14 Dedena, kidie nẹ wo dje ọghọ phia kẹ Jihova womarẹ emu nanaa na, ọmọ re ghwe vwiẹ kẹ wẹ na che ghwu.”
15 Ọyena vwọ wan nu, Netan de kpo uwevwin rọyen.
Jihova da nẹrhẹ ọmọ rẹ aye rẹ Yuraya vwiẹ kẹ Devid na shero ọga. 16 Devid da rẹ Ọghẹnẹ rẹ uyota na fikirẹ ọmọ na. Devid da ton owẹnvwe echiro phiyọ, kọ rua uwevwin ji sherhẹ otọ diodi hrọke. 17 Ọtiọyena ekpako rẹ uwevwin rọyen de mudia kẹrẹ, ayen da vuẹ nẹ o vrẹ nẹ otọ, ẹkẹvuọvo ọ senre, ọ je rhọnvwa nene ayen riemuu. 18 Vwẹ ẹdẹ righwrẹn, ọmọ na de ghwu, ẹkẹvuọvo oshọ muẹ idibo ri Devid rẹ ayen vwọ vuẹ nẹ ọmọ na ghwuru. Ayen da ta: “Ọke rẹ ọmọ na vwọ hẹ akpọ avwanre ta ota kẹ, jẹ ọ kerhọ rẹ avwanree. Kẹ mavọ yen avwanre sa vwọ vuẹ nẹ ọmọ na ghwuru? O se ru emu ọbrabra.”
19 Ọke rẹ Devid vwọ mrẹ nẹ idibo rọyen bẹbẹ ta ota kẹ ohwohwo, ọ da riẹn nẹ ọmọ na ghwure. Devid da nọ idibo rọyen nẹ: “Ọmọ na ghwure?” Ayen da kpahen nẹ: “O ghwure.” 20 Ọtiọyena Devid de vrẹn nẹ otọ na. Ọ da họ je vwẹ ori vwo ghworo, o de wene iwun rọyen, o de kpo uwevwin ri Jihova, ọ da ga ẹga. Ọyena vwọ wan nu, o de kpo uwevwin* rọyen, ọ da tanẹ e mu emu rhe ọyen, ọ da re. 21 Idibo rọyen da nọ nẹ: “Diesorọ wo vwo ru ọtiọna? Ọke rẹ ọmọ na vwọ hẹ akpọ, wo chiri owẹnvwe je viẹ; ẹkẹvuọvo ọmọ na ghwe vwo ghwu nu, wo de vrẹn, wọ da riemu.” 22 Ọ da kpahen nẹ: “Ọke rẹ ọmọ na vwọ hẹ akpọ, mi chiri owẹnvwe je viẹ kidie me ta kẹ oma mẹ nẹ, ‘Ono yen riẹnre sẹ Jihova se dje ẹroesiri kẹ vwẹ je nẹrhẹ ọmọ na dia?’ 23 Enẹna ro vwo ghwure na, diesorọ mi vwo chiri owẹnvwe? Me sa reyọ rhivwin rhe? Mi che bro ra, ẹkẹvuọvo o che rhivwin bru vwe rhee.”
24 Ọtiọyena Devid de bru aye rọyen Bat-shiba uche. O de bro ra, o de nene vwerhẹn. Ọke vwọ yan obaro, o de vwiẹ ọmọshare, e de se Solomọn.* Jihova vwo ẹguọnọ rọyen, 25 ọ da vwẹ ovuẹ rhe womarẹ Netan ọmraro na nẹ e se ọmọ na Jẹdidaya,* fikirẹ Jihova.
26 Joab ji nene Raba rẹ ihwo rẹ Amọn họnra, ọ da reyọ orere rẹ ovie na.* 27 Ọtiọyena Joab de ji ikọn bru Devid nẹ: “Mi nene Raba họnre, mi ji phi orere rẹ ame na kparobọ re.* 28 Asaọkiephana, koko ituofovwin ri chekọ na rere ovwan won kẹrẹ orere na rere ovwan phio kparobọ. Ọ rha dia ọtiọyeen, mẹvwẹ kọyen che phi orere na kparobọ, ujiri na me dia ọmẹ.”*
29 Ọtiọyena Devid de koko ituofovwin na eje, ayen de kpo Raba, ayen de nene họnre ji phio kparobọ. 30 O de ku erhu rẹ ovie re vwo tughẹ Malcam nẹ uyovwin rọyen. Ọ họhọ te italẹnti* rẹ oro ọvo, vẹ ibiukuta eghanghanre, e de kuophiyọ uyovwin ri Devid. Ọ je ghwẹ ekuakua buebun vwo nẹ orere na. 31 Ọ da ghwẹ ihwo rehẹ evun rọyen phia, o de phi ayen phiyọ iruo rẹ ikuta ebro, iruo ra da vwẹ ekuakua rẹ utehru re pha dandan vẹ ishurhe rẹ utehru vwo ruiruo, kugbe iruo ra da ma ikori ekpẹn. Ọtiọyen yen o ru irere rẹ ihwo rẹ Amọn ejobi. Vwẹ ukuotọ rọyen, Devid vẹ isodje rọyen eje de rhivwin kpo Jerusalẹm.