Ẹyano

13 Jihova da rhoma ta kẹ Mosis nẹ: 2 “Ru emekpako eje re dia emeshare* vwẹ ohri rẹ ihwo rẹ Izrẹl fon kẹ vwẹ. Ọmọshare ọkpako re vwiẹre, ọ rẹ ohworakpọ vẹ ọ rẹ eranvwe emẹ.”

3 Ọtiọyena Mosis da ta kẹ ihwo na: “Ovwan karophiyọ ẹdẹ nana rẹ ovwan vrẹn nẹ Ijipt, vwo nẹ uwevwin rẹ eviẹn, kidie obọ ọgangan yen Jihova vwọ reyọ ovwan nẹ etinẹ. Ovwan riemu vuọvo ro vwo iphuephuu. 4 Ovwan che vrẹn nẹ etinẹ na nonẹna vwẹ emeranvwe rẹ Ebib.* 5 Ọke rẹ Jihova da reyọ owẹ ro otọ rẹ ihwo ri Kenan, ihwo ri Hẹt, ihwo rẹ Amọ, ihwo ri Haiv, kugbe ihwo ri Jẹbus, ro duvwun iyorin kẹ esẹ rẹ ovwan ride nẹ ọyen cha vwọ kẹ wẹ, otọ rọ djẹ ọkẹre ameivie vẹ ame ọnyọn nu, wọ me rha karophiyọ irueru nana vwẹ emeranvwe nana. 6 Wọ me re ibrẹdi ro jephuo vwẹ ẹdẹ ighwrẹn, vwẹ ẹdẹ righwrẹn na, wọ me re orẹ kẹ Jihova. 7 Wọ me re ibrẹdi ro jephuo vwẹ ẹdẹ ighwrẹn na; e jẹ a mrẹ orọnvwọn vuọvo ro vwo iphuephu vwẹ obọ wẹẹn, e jẹ a je mrẹ egun rẹ ibrẹdi ro vwo iphuephu vwẹ ekogho* wẹẹn. 8 Wọ me vuẹ ọmọ* wẹn vwẹ ẹdẹ yena nẹ, ‘Fikirẹ oborẹ Jihova ru kẹ vwẹ ọke mi vwo vrẹn nẹ Ijipt.’ 9 Ọnana cha dia kerẹ oka vwẹ obọ wẹn kugbe ẹkarophiyọ vwẹ arhare wẹn,* rere urhi ri Jihova sa vwọ dia unu wẹn, kidie obọ ọgangan yen Jihova vwọ reyọ ovwan nẹ Ijipt rhe. 10 Wọ me yọnrọn urhi nana vwẹ ọke re bruphiyọ na kukpe kukpe.

11 “Ọke rẹ Jihova da reyọ ovwan ro otọ rẹ ihwo ri Kenan ro duvwun iyorin nẹ ọyen cha vwọ kẹ ovwan vẹ esẹ rẹ ovwan ride na, 12 wọ me vwẹ emekpako wẹn eje re dia emeshare* vwọ kpahotọ kẹ Jihova, ọtiọyen ji te emekpako rẹ ichuru wẹn re dia eshare. Eshare na i ri Jihova. 13 Wọ me vwẹ ogodẹ ọvo vwọ dẹ kọmọkpako kọmọkpako rẹ ekẹkẹtẹ reyọ, wọ rha dẹ reyọọ, wo mi vwirhin ohọre rọyen. Kọmọkpako kọmọkpako rọ dia ọshare vwẹ usun rẹ emeshare wẹn, wọ me dẹ reyọ.

14 “Ọke vwọ yanran na, ọmọ wẹn da nọ wẹ nẹ, ‘Die yen ọnana mudiaphiyọ?’ wọ me ta kẹ nẹ, ‘Obọ ọgangan yen Jihova vwọ reyọ avwanre vwo nẹ Ijipt, vwo nẹ uwevwin rẹ eviẹn. 15 Ọke rẹ Fero vwo ru uyovwin gangan, rọ vwọ sen nẹ ọyen che siobọnu avwanre yanraan, Jihova de hwe kọmọkpako kọmọkpako rọhẹ otọ rẹ Ijipt, vwo nẹ ọmọkpako rẹ ohworakpọ re te ọmọkpako rẹ eranvwe. Kọyensorọ me vwọ vwẹ emekpako eje re dia emeshare* vwo ze izobo kẹ Jihova, me me rha dẹ emekpako mẹ eje re dia emeshare reyọ.’ 16 Ọnana me dia kerẹ oka vwẹ obọ wẹn kugbe obo ra vwọ gba uyovwin vwẹ arhare wẹn,* kidie obọ ọgangan yen Jihova vwọ reyọ avwanre nẹ Ijipt.”

17 Asaọkiephana ọke rẹ Fero vwo siobọnu ihwo na yanran, Ọghẹnẹ sun ayen wan otọ rẹ ihwo ri Filistiaa dede nẹ ọ kẹrẹre. Kidie Ọghẹnẹ tare: “Ihwo na se wene ẹwẹn rayen ọke rẹ ayen de hirharoku ofovwin, ayen mi rhivwin kpo Ijipt.” 18 Ọtiọyena Ọghẹnẹ da nẹrhẹ ihwo na ghrẹnghrẹn idjerhe rẹ aton rẹ Abadi Ọvwavware na wan. Ẹkẹvuọvo ihwo rẹ Izrẹl tẹnrẹn urhiẹ rẹ ofovwin ọke rẹ ayen vwo nẹ otọ rẹ Ijipt. 19 Mosis je ghwẹ ibeku ri Josẹf nene oma, kidie Josẹf nẹrhẹ emọ rẹ Izrẹl duvwun iyorin nẹ: “Ọghẹnẹ che jẹ ovwan ẹkarophiyọọ, ovwan me ghwẹ ibeku mẹ nẹ etinẹ na.” 20 Ayen de vrẹn nẹ Sọkọt, ayen de wonphiyọ* Itam vwẹ oboba rẹ aton na.

21 Asaọkiephana Jihova kọ kobaro kẹ ayen vwẹ aruphẹn vwevunrẹ evwru* ro vwo suẹn ayen vwẹ idjerhe na, vwẹ ason vwevunrẹ erhanre* rọ vwọ kẹ ayen orẹmrẹ rere ayen sa vwọ yan te ason te uvo. 22 Evwru na che nẹ obaro rẹ ihwo na vwẹ aruphẹẹn yẹrẹ erhanre na vwẹ asoon.

Obo Rehẹ Evunrẹ Ẹyano

Ẹyano 13:2

Eta rẹ Odjefiotọ

Ẹyano 13:4

Eta rẹ Odjefiotọ

Ẹyano 13:7

Eta rẹ Odjefiotọ

Ẹyano 13:8

Eta rẹ Odjefiotọ

Ẹyano 13:9

Eta rẹ Odjefiotọ

Ẹyano 13:12

Eta rẹ Odjefiotọ

Ẹyano 13:15

Eta rẹ Odjefiotọ

Ẹyano 13:16

Eta rẹ Odjefiotọ

Ẹyano 13:18

Indexes

Ẹyano 13:20

Eta rẹ Odjefiotọ

Ẹyano 13:21

Eta rẹ Odjefiotọ

Ẹyano