Ẹyano

32 Vwẹ ọke yena, ihwo na da mrẹ nẹ Mosis hwọke mamọ re, o ji rhi wontọ nẹ ugbenu na rhee. Ọtiọyena ihwo na da gba riariẹ Erọn phiyọ, ayen da ta kẹ: “Vrẹn, wọ ma ọghẹnẹ kẹ avwanre rọ cha kobaro kẹ avwanre, kidie avwanre riẹn obo re phia kẹ Mosis nanaa, ọshare ro sun avwanre nẹ otọ rẹ Ijipt rhe na.” 2 Erọn da ta kẹ ayen: “Ovwan reyọ erọnvwọn erhọ rẹ iro rehẹ erhọ rẹ eya rẹ ovwan, emeshare rẹ ovwan, kugbe emetẹ rẹ ovwan rere ovwan vwẹ ayen rhe vwe.” 3 Ọtiọyena ihwo na eje ke reyọ erọnvwọn erhọ rẹ iro rehẹ erhọ rayen vwo rhe Erọn. 4 Ọyena vwọ wan nu, ọ da reyọ iro na mie ayen, ọ da vwẹ orọnvwọn re vwo brẹ oka phiyọ emu vwo ruo phiyọ oma rẹ ọmọ rẹ erhuẹn.* Kẹ ayen ta: “Ọnana yen Ọghẹnẹ rẹ ovwan, E Izrẹl, ro sun ovwan nẹ otọ rẹ Ijipt rhe.”

5 Ọke rẹ Erọn vwọ mrẹ ọnana, ọ da so agbada vwẹ obaro rọyen. Erọn de kperi phia: “A cha re orẹ kẹ Jihova odẹ rọ cha na.” 6 Ọtiọyena ayen de vrẹn vwẹ edegburhiọke rẹ ẹdẹ rọ vwọ kpahọn, kẹ ayen ze izobo rẹ ẹtorhẹ je reyọ izobo rẹ ọrekugbe vwọ kpahotọ. Ayen vwo ru nu, ihwo na de chidia rẹ ayen vwọ re je da. Ọyena vwọ wan nu, ayen de vrẹn, oma kọ vwerhan ayen.

7 Asaọkiephana Jihova da ta kẹ Mosis: “Yanran, wontọ, kidie ihwo wẹn ru wo sun nẹ otọ rẹ Ijipt rhe na gbe oma rayen ẹgua re. 8 Ayen brokpakpa chukoku idjerhe ri mi ji iji kẹ ayen nẹ ayen nene. Ayen ma oma rẹ ọmọ rẹ erhuẹn* kẹ oma rayen, kẹ ayen vwẹ uyovwin kpotọ kẹ ji ze izobo kẹ, rẹ ayen vwọ tanẹ, ‘Ọnana yen Ọghẹnẹ rẹ ovwan, E Izrẹl, ro sun ovwan nẹ otọ rẹ Ijipt rhe.’” 9 Jihova da ta kẹ Mosis: “Me rhe mrẹvughe re nẹ enana ihwo ri vwo udu ọgangan.* 10 Asaọkiephana gbe juvwe vwo rere me ghwọrọ ayen vwevunrẹ ophu ọtuatua mẹ na, rere mi ru ẹgborho rode nẹ oma wẹn rhe.”

11 Ọtiọyena Mosis da rẹ Jihova Ọghẹnẹ rọyen,* ọ da ta: “E Jihova, diesorọ wo vwo muophu ọtuatua wẹn kpahen ihwo wẹn, ru wọ vwọ vwẹ ogangan rode kugbe obọ ọgangan vwọ reyọ ayen nẹ otọ rẹ Ijipt rhe nu? 12 Ihwo rẹ Ijipt cha tanẹ, ‘O vwo ẹwẹn ọbrabra ọke ro vwo sun ayen yanran. Ọ guọnọ hwe ayen vwẹ igbenu na je ghwọrọ ayen nẹ otọrakpọ na.’ Si ophu ọtuatua wẹn na reyọ, wọ rhoma roro* kpahen orhiẹn ru wọ cha vwọ hwarhiẹ okpetu nana rhe ihwo wẹn. 13 Karophiyọ idibo wẹn Ebraham, Aizik, kugbe Izrẹl, ihwo ru wọ vwẹ oma wẹn vwo duvwun iyorin kẹ je ta: ‘Me cha nẹrhẹ emọ* rẹ ovwan dia buebun kerẹ isio rẹ idjuvwu na, ke me cha vwẹ etọ nana eje ri mi veri na vwọ kẹ emọ* rẹ ovwan rere ayen vwọ reyọ kerẹ ughwẹ ri bẹdẹ.’”

14 Ọtiọyena Jihova da rhoma roro* kpahen ukpokpogho rọ tare nẹ o che vwo rhe ihwo rọyen na.

15 Mosis de kuomarhẹriẹ, o de wontọ nẹ ugbenu na vẹ ephapha ivẹ rẹ Oseri na vwẹ obọ rọyen. A kare eta phiyọ ẹbẹre ivẹ rẹ ephapha na; e si phiyọ obaro vẹ obuko rayen. 16 Ephapha na eyen iruo rẹ obọ rẹ Ọghẹnẹ, isiesi na eyen isiesi rẹ Ọghẹnẹ kare phiyọ ephapha na. 17 Ọke rẹ Joshua vwo nyo edo rẹ ihwo na fikirẹ ukperi rayen, ọ da ta kẹ Mosis: “Edo rẹ ofovwin hẹ asan rẹ ihwo na wonphiyọ* na.” 18 Ẹkẹvuọvo Mosis da ta:

19 Ugege rẹ Mosis vwo sikẹrẹ asan rẹ ayen wonphiyọ na, rọ vwọ mrẹ ọmọ rẹ erhuẹn na vẹ eha rẹ ayen gbe, ophu de muo gangan, o de do ephapha na nẹ abọ rọyen, ọ da guọghọ ayen vwẹ obotọ rẹ ugbenu na. 20 Ọ da reyọ ọmọ rẹ erhuẹn rẹ ayen mare na, ọ da vwẹ erhanre vwọ torhẹ, ọ da lọ vworovworo; o de tue phiyọ ame, ọ da nẹrhẹ ihwo rẹ Izrẹl da. 21 Mosis da ta kẹ Erọn: “Die yen ihwo nana ru we, ru wọ vwọ hwarhiẹ umwemwu rode nana vwo rhe ayen?” 22 Erọn da kpahen: “Wo jẹ ophu mu wee ọrovwovwe. Wọ nabọ riẹn nẹ ihwo na vwo ẹwẹn rẹ ayen vwo ru umwemwu. 23 Ọtiọyena ayen da ta kẹ vwẹ, ‘Ma ọghẹnẹ kẹ avwanre, rọ cha kobaro kẹ avwanre, kidie avwanre riẹn obo re phia kẹ Mosis nanaa, ọshare ro sun avwanre nẹ otọ rẹ Ijipt rhe na.’ 24 Ọtiọyena me da ta kẹ ayen, ‘Kohwo kohwo ro vwo oro, e jẹ o kuo nu rere ọ vwọ kẹ vwẹ.’ Mi de do phiyọ evunrẹ erhanre, ọmọ rẹ erhuẹn nana de nẹ evun rọyen rhe.”

25 Mosis da mrẹ nẹ ihwo na muẹ ruẹ kidie Erọn kẹ ayen uphẹn rẹ ayen vwo mu ru, ọtiọyena ayen da rhe phọphọ oma vwẹ obaro rẹ ihwo re vwọsua ayen. 26 Mosis de mudia anurhoro rẹ asan rẹ ayen wonphiyọ na, ọ da ta: “Ono yehẹ ẹbẹre ri Jihova? E jẹ o bru vwe rhe!” Ihwo ri Livae eje da gba riariẹ phiyọ. 27 Asaọkiephana ọ da ta kẹ ayen: “Ọnana yen oborẹ Jihova Ọghẹnẹ rẹ Izrẹl tare, ‘E jẹ ohwo ọvuọvo reyọ ọlọkọ rọyen rere ọ wan asan rẹ ovwan wonphiyọ eje, vwo nẹ anurhoro kpo anurhoro, rere o hwe oniọvo rọyen, ọrivẹ rọyen, kugbe ohwo rọ kẹrerẹ.’” 28 Ihwo ri Livae na de ru oborẹ Mosis tare. Ọtiọyena e de hwe eshare ri te omarẹ 3,000 vwẹ ẹdẹ yena. 29 Mosis da ta: “Ovwan hẹrioma rẹ ovwan* vwọ kẹ Jihova nonẹna, kidie ovwan ohwo ọvuọvo vwọso ọmọ robọ rọyen kugbe oniọvo robọ rọyen; o che bruba kẹ ovwan nonẹna.”

30 Vwẹ ẹdẹ rọ vwọ kpahọn, Mosis da ta kẹ ihwo na: “Ovwan ru umwemwu ọgangan re, asaọkiephana mi che yerin kpenu bru Jihova ra, rere me mrẹ sẹ mi se ru arhuẹrẹ vwọ kẹ imwemwu rẹ ovwan.” 31 Ọtiọyena Mosis de rhivwin bru Jihova ra, ọ da ta: “Ihwo nana ru umwemwu ọgangan! Ayen ma ọghẹnẹ rẹ oro vwọ kẹ oma rayen! 32 Ẹkẹvuọvo asaọkiephana, o de je we, reyọ imwemwu rayen vwo ghovwo ayen; ọ rha dia ọtiọyeen, biko phoro odẹ mẹ nẹ ọbe wẹn ru wo siri na.” 33 Ẹkẹvuọvo Jihova da ta kẹ Mosis: “Kohwo kohwo ro ru umwemwu vwọso ovwẹ yen mi che phoro odẹ rọyen nẹ ọbe mẹ na. 34 Yanran asaọkiephana, sun ihwo na kpo asan re me vuẹ wẹ kpahen na. Nighere! Amakashe mẹ cha kobaro kẹ wẹ, ẹdẹ re me cha nọ ihwo na orhiẹn, ki mi che gboja kẹ ayen fikirẹ umwemwu rayen na.” 35 Ọtiọyena Jihova ko gboja kẹ ihwo na kidie ayen ma ọmọ rẹ erhuẹn, ọ rẹ Erọn mare na.