Ẹyano

33 Jihova da rhoma ta kẹ Mosis: “Yanran nẹ etinẹ, wẹ vẹ ihwo ru wo sun nẹ otọ rẹ Ijipt rhe na. Kpo otọ ri mi duvwun iyorin rọyen kẹ Ebraham, Aizik, kugbe Jekọp nẹ, ‘Me cha vwọ kẹ emọ* rẹ ovwan.’ 2 Mi che ji amakashe ọvo kobaro kẹ ovwan, kọ cha djẹ ihwo ri Kenan, ihwo rẹ Amọ, ihwo ri Hẹt, ihwo ri Pẹriz, ihwo ri Haiv, kugbe ihwo ri Jẹbus nẹ obaro rẹ ovwan. 3 Yanran kpo otọ rọ djẹ ọkẹre rẹ ameivie vẹ ame ọnyọn. Ẹkẹvuọvo mi che nene ovwaan, kidie ovwan ihwo ri vwo udu ọgangan, me sa ghwọrọ ovwan vwẹ idjerhe.”

4 Ọke rẹ ihwo na vwo nyo eta egangan nana, ayen de muomaphiyọ, ọvuọvo rayen dede rhe ku ekuakua rẹ osẹnvwe rọyen phiyọọ. 5 Jihova da ta kẹ Mosis: “Ta kẹ ihwo rẹ Izrẹl, ‘Ovwan ihwo ri vwo udu ọgangan.* Me sa ro ohri rẹ ovwan je teyen ovwan hwe siẹvuọvo. Ọtiọyena we rhe kuẹ ekuakua rẹ osẹnvwe rẹ ovwan phiyọọ, ri mi vwo roro kpahan obo ri mi che ru ovwan na.’” 6 Ọtiọyena vwo nẹ Ugbenu ri Horẹb yanran, ihwo rẹ Izrẹl rhe ku ekuakua rẹ osẹnvwe rayen phiyọọ.

7 Asaọkiephana Mosis da reyọ utughẹ ọvo vwo vi vwẹ otafe rẹ asan rẹ ayen wonphiyọ* na, vwẹ asan ro sherabọ emerha vwọ kẹ asan rẹ ayen wonphiyọ na, o de se utughẹ ra da vwoma. Ihwo eje re guọnọ nọ mie Jihova ki kpo utughẹ ra da vwoma na rọhẹ otafe rẹ asan rẹ ayen wonphiyọ na. 8 Ugege rẹ Mosis de kpo asan utughẹ na, ihwo na eje ki vrẹn, kẹ ayen muẹdia anurhoro rẹ utughẹ rayen, ayen me tẹnrovi Mosis bẹsiẹ rọ vwọ ro evunrẹ utughẹ na. 9 Mosis da ghwa ro utughẹ na, evwru* na mi wontọ rhe, ọ me daji anurhoro rẹ utughẹ na ọke rẹ Ọghẹnẹ vwo nene Mosis ta ota na. 10 Ọke rẹ ihwo na eje vwọ mrẹ evwru na rọhẹ anurhoro rẹ utughẹ na, ayen ohwo ọvuọvo de vrẹn je vwẹ uyovwin kpotọ vwẹ anurhoro rẹ utughẹ robọ rọyen. 11 Jihova hirharoku Mosis ọke rọ vwọ ta ota kẹ, kirobo rẹ ohwo ọvo ta ota kẹ ohwo ọfa. Ọke ro vwo rhivwin kpo asan rẹ ayen wonphiyọ na, Joshua ọmọ ri Nọn, odibo rọyen kugbe ọ rọ vwẹ ukẹcha kẹ da daji utughẹ na.

12 Asaọkiephana Mosis da ta kẹ Jihova: “Nighere, wọ vuẹ vwẹ nẹ, ‘Sun ihwo nana yanran,’ ẹkẹvuọvo wo ji rhi juvwe riẹn ohwo ru wo che ji nene uvwee. Vwọba, wọ tare nẹ, ‘Me riẹn odẹ wẹn,* wọ je mrẹ ẹroesiri mẹ re.’ 13 Biko, me da mrẹ ẹroesiri wẹn re, juvwe riẹn idjerhe wẹn, rere me sa vwọ riẹn wẹ, me je vwọ mrẹ ẹroesiri wẹn ọkieje. Wọ me je karophiyọ nẹ ẹgborho nana ihwo wẹn.” 14 Ọtiọyena ọ da ta: “Mẹvwẹ komobọ* che nene uwe ra, ke me cha kẹ wẹ omaerovwon.” 15 Mosis da ta kẹ: “Ọ da dianẹ wẹwẹ komobọ* che nene avwanree, wo suẹn avwanre nẹ etinẹ naa. 16 Mavọ yen a sa vwọ riẹn nẹ me mrẹ ẹroesiri wẹn re, mẹvwẹ vẹ ihwo wẹn? Ọ dia wo de nene avwanre rere me vẹ ihwo wẹn sa vwọ fẹnẹ ihwo ri chekọ eje rehẹ otọrakpọ na?”

17 Jihova da ta kẹ Mosis: “Mi ji che ru orọnvwọn nana ru wọ nokpẹn rọyen na, kidie wọ mrẹ ẹroesiri mẹ re, me je riẹn odẹ wẹn.” 18 Ọtiọyena ọ da ta: “Biko dje urinrin wẹn kẹ vwẹ.” 19 Ẹkẹvuọvo ọ da ta: “Me cha nẹrhẹ uyoyovwin mẹ eje wan obaro wẹn, ki mi che ghwoghwo odẹ ri Jihova vwẹ obaro wẹn; mi che dje ẹroesiri vwọ kẹ ohwo re me guọnọ dje ẹroesiri kẹ, mi mi rhe gbe arodọnvwẹ vwọ kẹ ohwo re me guọnọ gbe arodọnvwẹ kẹ.” 20 Vwọba, ọ da ta: “Wọ cha sa mrẹ opharo mẹẹ, kidie o vwo ohwo vuọvo rọ sa mrẹ vwẹ, ọ me je diaa.”

21 Jihova da je ta: “Asan ọvo kẹrẹ ovwẹ vwẹ etinẹ. Mudia enu rẹ oragha na. 22 Ọke rẹ urinrin mẹ da wanvrẹ, mi che mu we phiyọ unu ọvo vwevunrẹ oragha na, ke me cha vwẹ obọ mẹ vwo rhurhu uwe bẹsiẹ me vwọ wanvrẹ. 23 Ọyena da wan nu, ki mi che si obọ mẹ reyọ, ku wọ cha mrẹ obuko mẹ. Ẹkẹvuọvo wọ cha mrẹ opharo mẹẹ.”