Ukeri

14 Ọtiọyena ọghwẹgbe na eje da kpare urhuru rayen kpenu, ihwo na ke viẹ ji beroma vwẹ ason yena eje. 2 Ihwo rẹ Izrẹl na eje ki brenu kpahan Mosis vẹ Erọn, ọghwẹgbe na eje ke ta ota vwọsua ayen, kẹ ayen ta: “Mane kẹ avwanre ghwuru vwẹ otọ rẹ Ijipt, yẹrẹ mane kẹ avwanre ghwuru vwẹ aton nana! 3 Diesorọ Jihova vwọ reyọ avwanre rhe otọ nana rhi ghwu ughwu rẹ ọlọkọ? Ivwighrẹn na ki che mu eya rẹ avwanre vẹ emọ rẹ avwanre reyọ. O rhe yovwin rẹ avwanre vwo rhivwin kpo Ijipt?” 4 Kẹ ayen tobọ ta kẹ ohwohwo: “E jẹ a vwẹ osun vwo mu rere e rhivwin kpo Ijipt!”

5 Ọtiọyena Mosis vẹ Erọn de she bọvwọn opharo rhuotọ vwẹ obaro rẹ ọghwẹgbe rẹ ihwo rẹ Izrẹl eje. 6 Joshua ọmọ ri Nọn kugbe Kelẹb ọmọ ri Jẹfunẹ rehẹ usun rẹ ihwo re ra bẹbẹ ni otọ na da bẹrẹ iwun rayen, 7 ayen da ta kẹ ọghwẹgbe rẹ ihwo rẹ Izrẹl na: “Otọ rẹ avwanre ra bẹbẹ ni na, ọyen otọ ro yovwirin mamọ. 8 Oma rẹ avwanre da vwerhen Jihova, o vwo obo rọ wanree, ọ cha reyọ avwanre ro otọ nana je vwọ kẹ avwanre, otọ rọ djẹ ọkẹre rẹ ameivie vẹ ame ọnyọn. 9 Ẹkẹvuọvo we gbe vwọsua Jihovaa, ovwan djoshọ rẹ ihwo rẹ otọ naa, kidie ọ cha bẹn re vwo phi ayen kparobọọ.* E si ochọnvwe rayen nẹ oma rayen re, Jihova vẹ avwanre herọ. Ovwan djoshọ rayeen.”

10 Ọghwẹgbe na ke ta ota kpahan oborẹ ayen vwo phi ayen. Ẹkẹvuọvo urinrin ri Jihova da vwomaphia kẹ ihwo rẹ Izrẹl eje vwẹ utughẹ ra da vwoma na.

11 Ọtiọyena Jihova da ta kẹ Mosis: “Mavọ yen ihwo nana cha jẹ vwẹ fia kri te, mavọ yen o kri te rẹ ayen vwo jẹ esegbuyota evwo kpahan ovwẹ, egbudugbu rẹ eka na eje ri mi ruru vwẹ ohri rayen na? 12 Je me vwẹ ọga vwọ ghwiẹ ayen je djẹ ayen yanran rere mi ru we phiyọ ẹgborho rode ro ji vwo ẹgba vwọ vrẹ ayen.”

13 Ẹkẹvuọvo Mosis da ta kẹ Jihova: “Wo de ru ọtiọyen, ihwo rẹ Ijipt ru wọ vwẹ ẹgba wẹn vwọ reyọ ihwo nana vwo nẹ ohri rayen rhe na che nyo, 14 kẹ ayen cha vuẹ ihwo re dia otọ na kpahọn. Enana ji nyo re nẹ wẹwẹ ri Jihova hẹ ohri rẹ ihwo nana, wọ je vwomaphia kẹ ayen mrẹ re. Wẹwẹ Jihova, evwru wẹn muẹdia vwẹ enu rayen, wọ kobaro kẹ ayen vwevunrẹ evwru* vwẹ aruphẹn kugbe erhanre* vwẹ ason. 15 Wo de hwe ihwo nana eje siẹvuọvo,* ẹgborho ri nyo kpahen ọrho wẹn re ke cha ta: 16 ‘Jihova sa reyọ ihwo nana vwọ ro otọ ro duvwun iyorin rọyen nẹ ọyen cha vwọ kẹ ayen naa, kọyensorọ ọ vwọ teyen ayen hwe vwevunrẹ aton na.’ 17 Biko, asaọkiephana Jihova, jẹ ẹgba wẹn rho kirobo ru wo veri ọke ru wọ vwọ ta: 18 ‘Jihova rọ fobọ muophuu, rọ vọnre vẹ ẹguọnọ ro jẹ rhẹriẹ, ro vwo ghovwo oruchọ kugbe urhiẹchọ, ẹkẹvuọvo o che jẹ oja egbe vwọ kẹ ihwo re riabee, ọ cha hwosa rẹ oruchọ rẹ esẹ vwọ kẹ emọ, uvwiẹ rerha kugbe ọrẹne.’ 19 Biko vwẹ oruchọ rẹ ihwo nana vwo ghovwo ayen fikirẹ ẹguọnọ wẹn rode ro jẹ rhẹriẹ na, kirobo ru wo vwo ghovwo ihwo nana vwo nẹ Ijipt rhi te ọke nana.”

20 Jihova da ta: “Mi vwo ghovwo ayen fikirẹ ota wẹn. 21 Ẹkẹvuọvo me vwọ herọ na, otọrakpọ na eje cha vọn vẹ urinrin ri Jihova. 22 Ẹkẹvuọvo o vwo ọvuọvo vwẹ usun rẹ ihwo re mrẹ urinrin mẹ kugbe eka mẹ ri mi ruru vwẹ Ijipt kugbe aton na, rọ davwen ovwẹ ni abọ ihwe nana, rọ je kerhọ rẹ urhuru mẹẹ 23 rọ cha nama mrẹ otọ ri mi duvwun iyorin rọyen kẹ esẹ rayen naa. Ẹjo, o vwo ọvuọvo vwẹ usun rẹ ihwo re jẹ vwẹ fia na rọ cha mrẹẹ. 24 Ẹkẹvuọvo kidie nẹ odibo mẹ Kelẹb vwo ẹwẹn rọ fẹnẹre rọ da je vwẹ ubiudu rọyen eje vwo nene uvwe, o vwo obo rọ wanree, me cha reyọ vwọ ro otọ rọ rare na, emọ rọyen ke je reyọ vwọ riuku. 25 Rọ vwọ dianẹ ihwo rẹ Amalẹk kugbe ihwo ri Kenan na dia iyara na, ovwan gbe kuomarhẹriẹ odẹ rọ cha na rere ovwan wan idjerhe rẹ Abadi Ọvwavware na vwo kpo obo aton na.”

26 Ọyena vwọ wan nu, Jihova da ta kẹ Mosis vẹ Erọn: 27 “Mavọ yen o kri te rẹ ọghwẹgbe umwemwu nana vwo rhe brenu kpahan ovwẹ? Mi nyo enuebro rẹ ihwo rẹ Izrẹl brẹ kpahan ovwẹ re. 28 Ta kẹ ayen, ‘“Me vwọ herọ na,” ọtiọyen Jihova tare, “Mi che ru ovwan vwo nene oborẹ mi nyo ovwan rẹ ovwan tare na! 29 Aton nana yen irivwin rẹ ovwan de che she, e, ovwan eje rehẹ ẹgbukpe 20 kpenu re si edẹ rayen phiyotọ, ovwan eje ri brenu kpahen ovwẹ. 30 O vwo ọvuọvo vwẹ usun rẹ ovwan rọ cha ro otọ ri mi duvwun iyorin rọyen* nẹ ovwan cha dia naa, jokparẹ Kelẹb ọmọ ri Jẹfunẹ kugbe Joshua ọmọ ri Nọn.

31 “‘“Me cha reyọ emọ rẹ ovwan ro evun rọyen, ihwo rẹ ovwan tare nẹ e che mu reyọ na, kẹ ayen cha rhe riẹn otọ rẹ ovwan senre na. 32 Ẹkẹvuọvo irivwin rẹ ovwan che she vwẹ aton nana. 33 Emọ rẹ ovwan cha dia isuigodẹ vwẹ aton na vwẹ ẹgbukpe 40, ayen cha rioja fikirẹ uruemu ri jẹ evun ẹfuọn* rẹ ovwan, re te ọke rẹ ọ rọ koba vwẹ usun rẹ irivwin rẹ ovwan che vwo she vwẹ aton na. 34 Vwo nene uchẹdẹ rẹ ovwan vwọ bẹbẹ ni otọ na, ẹdẹ 40, ẹdẹ ọvo vwọ kẹ ẹgbukpe ọvo, ẹdẹ ọvo vwọ kẹ ẹgbukpe ọvo, ovwan cha rioja rẹ oruchọ rẹ ovwan ẹgbukpe 40, kẹ ovwan cha riẹn obo ro mudiaphiyọ ovwan vwọ reyọ vwọso ovwẹ.*

35 “‘“Mẹvwẹ ri Jihova tarọ nure. Ọnana yen oborẹ mi che ru ọghwẹgbe umwemwu nana, ihwo ri koko vwọso ovwẹ na, aton nana yen ayen de che te oba rayen, etinẹ yen ayen che ghwu phiyọ. 36 Eshare rẹ Mosis jiri nẹ e ra bẹbẹ ni otọ na re nẹrhẹ ọghwẹgbe na eje brenu kpahọn ọke rẹ ayen vwo rhivwin rhe vẹ orharhe iyẹnrẹn kpahen otọ na, 37 e, eshare re ghwa orharhe iyẹnrẹn rhe kpahen otọ na, a cha teyen ayen hwe, ayen che ghwu vwẹ obaro ri Jihova. 38 Ẹkẹvuọvo Joshua ọmọ ri Nọn kugbe Kelẹb ọmọ ri Jẹfunẹ, re dia usun rẹ ihwo re ra bẹbẹ ni otọ na cha rhọ.”’”

39 Ọke rẹ Mosis vwọ ta eta nana kẹ ihwo rẹ Izrẹl eje, ihwo na de muomaphiyọ gangan. 40 Vwọba, ayen de vrẹn vwẹ edegburhiọke, kẹ ayen davwẹngba rẹ ayen vwo kpo obenu rẹ ugbenu na, rẹ ayen vwọ ta: “Asaọkiephana avwanre muegbe rẹ avwanre vwo kpo asan rẹ Jihova ta ota kpahen na re, kidie avwanre ru umwemwu.” 41 Ẹkẹvuọvo Mosis da ta: “Diesorọ ovwan vwọ shariẹ urhi ri Jihova vrẹ? Ovwan che phikparobọọ. 42 Ovwan yanraan, kidie Jihova vẹ ovwan herọọ; ivwighrẹn rẹ ovwan che phi ovwan kparobọ. 43 Ihwo rẹ Amalẹk kugbe ihwo ri Kenan hẹ etiyin hẹrhẹ ovwan, ayen cha vwẹ ọlọkọ hwe ovwan. Kidie nẹ ovwan kuomarhẹriẹ rẹ ovwan vwo jẹ Jihova enene na, Jihova vẹ ovwan rha cha diaa.”

44 Ẹkẹvuọvo ayen da gbaudu yanran kpo obenu rẹ ugbenu na, jẹ okọ rẹ ọphọ ri Jihova na kugbe Mosis vrẹn nẹ uherevie rẹ asan rẹ ayen wonphiyọ* naa. 45 Ọtiọyena ihwo rẹ Amalẹk vẹ ihwo ri Kenan re dia ugbenu yena da rhe, ayen da teyen ayen hwe, ayen da hrabọ rhirin re te Họma.